Әһли Бејт -АБНА- хәбәр аҝентлијинин вердији хәбәрә әсасән мајын 11-12-дә Ашгабадда Ислам Әмәкдашлығы Тәшкилатынын “Мүсәлман Дүнјасында Гачгынлар” адлы назирләр сәвијјәсиндә кечирилмиш бејнәлхалг конфрансында јекун бәјаннамә гәбул олунуб.
ХИН мәтбуат хидмәтиндән верилән мәлумата ҝөрә, “Ашгабад бәјаннамәси” адланан сәнәдин 9-ҹу бәнди Дағлыг Гарабағ мүнагишәсинә һәср олунуб. Һәмин бәнддә билдирилир ки, ИӘТ Хариҹи Ишләр Назирләри Шурасынын 38-ҹи сессијасында Ермәнистанын Азәрбајҹана гаршы тәҹавүзү барәдә 10/38-ПОЛ сајлы гәтнамә гәбул олунуб.
“Бу контекстдә биз 1 милјондан артыг азәрбајҹанлы гачгын вә Азәрбајҹан Республикасынын Дағлыг Гарабағ реҝиону вә әтрафындакы ишғал олунмуш әразиләрдән говулмуш әһалинин вәзијјәти вә бу һуманитар проблемләрин өлчүләри вә кәскинлијинә даир дәрин нараһатлығымызы ифадә едирик. Биз азәрбајҹанлы гачгынлар вә говулмуш әһалинин тәһлүкәсизлик, шәрәф вә ләјагәтләри тәмин едилмәклә өз евләринә гајытмалары үчүн шәраит јарадылмасыны тәләб едир вә бу мәгсәдлә Азәрбајҹан һөкумәти вә халгынын ҝөстәрдији сәјләрә верилән дәстәклә там шәриклијимизи бир даһа тәсдиг едирик. Бу бахымдан, биз ИӘТ, БМТ Баш Ассамблејасы вә Тәһлүкәсизлик Шурасынын мүвафиг гәтнамәләринин там шәкилдә иҹрасыны гәтијјәтлә тәләб едирик”.
Диггәт: Хәбәрдән истифадә етдикдә мәнбәјә истинад лазымдыр
