Әһли Бејт -АБНА- хәбәр аҝентлији- Ермәнистан арасында ҝедән Гарабағ савашына даир атәшкәс разылашмасынын гүввәјә минмәсиндән 18 ил өтдү. Гарабағда ҝедән һәрби әмәлијјатларын дајандырылмасыны нәзәрдә тутан бу разылашма 94-ҹү ил мајын 5-дә Гырғызыстанын пајтахты Бишкекдә кечирилмиш топланты заманы ики өлкәнин мүдафиә назирләри тәрәфиндән имзаланыб. Разылашмаја Русијанын васитәчилији илә Азәрбајҹан вә Ермәнистан парламентләринин спикерләри арасында имзаланмыш атәшкәс протоколуна әсасән имза атылыб.
Һәмин вахт Азәрбајҹан парламентинин сәдри вәзифәсини тутан Рәсул Гулијев гәзетимизә ачыгламасында Бишкек разылашмасы вә әбәди сүлһ сазиши илә бағлы мараглы мәгамлара тохунуб.
Р.Гулијев әввәлҹә мәлум разылашманын имзаландығы вахт Бишкекә ҝетмәдијини вә һәмин топлантыда иштирак етмәдијини билдириб: “Һәмин вахт Һејдәр Әлијевин Бишкекә ҝетмәк шансы јох иди. Чүнки орда президентләр јох, парламент сәдрләри ҝөрүшүрдү. Мән дә она ҝөрә ҝетмәдим ки, о дөврдә Азәрбајҹанла Ермәнистан арасында ҝедән Гарабағ савашына ҝөрә вәзијјәт чох ҝәрҝин иди. Мән дә Азәрбајҹаны тәрк етмәк имканында дејилдим. Она ҝөрә дә Бишкекдә һеч бир протокола имза атылмајыб. Бишкекдәки протокол Азәрбајҹана гајтарылыб. Азәрбајҹанда бу протокола имза атылыб. Ора мән тәк јох, Шушанын иҹра башчысынын иштиракы илә имза атмышам. Бу сәнәд атәшкәс сәнәди дејилди. Чүнки парламент сәдрләринин имзасы илә белә бир һүгуги сәнәд ола билмәзди. Бунун үчүн она һөкумәт имза атмалы иди. Атәшкәслә бағлы сәнәдә исә мај ајында мүдафиә назирләри тәрәфиндән имза атылыб. Бу, Бишкек протоколу јох, атәшкәслә бағлы сәнәд иди. Өзү дә о мүвәггәти атәшкәс мүгавиләси иди. Мүгавилә 94-ҹү илин августуна гәдәр атәшкәси нәзәрдә тутурду. Бундан сонра атәшкәс вә әбәди сүлһ сазишинә Һејдәр Әлијев имза атды. Тәәссүф доғуран о Бишкек протоколунун тарихчәси бундан ибарәтдир”.
Бу илләр әрзиндә атәшкәсин Азәрбајҹана, Гарабағ дүјүнүнүн чөзүлмәсинә нә вердијинә ҝәлинҹә, Р.Гулијев бу истигамәтдә ирәлиләјишин јох, анҹаг ҝериләмәнин олдуғуну дејир: “Һәлә 1996-ҹы илдә мән мүсаһибә вериб демишдим ки, һәмишәлик сүлһ сазишинә имза атмаг бөјүк сәһв иди. Ону да билдирмишдим ки, 94-ҹү илдә Азәрбајҹан Гарабағ проблеминин һәллинә даһа јахын иди, нәинки 96-ҹы илдә. Ынди исә Гарабағ проблеминин һәлли даһа да чәтинләшиб, һәтта мүшкүлә чеврилиб. О вахт ермәниләр бизим ишғал олунмуш рајонларымызы гајтарыб Дағлыг Гарабағ мәсәләсини мүзакирә етмәјә разы идиләрсә, инди һеч рајонлары гајтармаг истәмирләр. Бизим Шушамызда өзләринә туризм мәркәзи јарадыблар. Вә Шушаны үмумијјәтлә бизә гајтармағы дүшүнмүрләр. Тәәссүф ки, өтән дөвр әрзиндә Азәрбајҹан рәһбәрлијинин апардығы сијасәт Азәрбајҹанын ишғал олунмуш торпагларынын азад едилмәсини мүшкүлә чевирди. Буна Азәрбајҹан халгынын сејирчи мөвгеји дә тәсир едиб. Елә бил ки, ишғал олунмуш торпагларын бу халга аидијјәти јохдур. Бунун нәтиҹәсидир ки, президент Әлијев һеч нәјә мәһәл гојмадан Гарабағ проблемини һәлл етмәк истәмир”.
Диггәт: Хәбәрдән истифадә етдикдә мәнбәјә истинад лазымдыр
