Әһли Бејт -АБНА- хәбәр аҝентлијинин вердији хәбәрә әсасән Ајәтуллаһул-Үзма Шејх Мәкарим Ширази Гум останынын Әһли-Бејт (ә) мәддаһлары вә дини һејәт рәһбәрләри илә ҝөрүшүб.
Ајәтуллаһ Мәкарим Ширази ҝөрүшдә һәзрәти.Рәсуләллаһын (сәлләллаһу әлејһи вә алиһ) "Фатимә (сәламуллаһи әлејһа) мәним бәдәнимин бир парчасыдыр. Һәр ким ону гәзәбләндирсә, мәни гәзәбләндирмишдир" һәдисинә ишарә едәрәк бујуруб ки, бу һәдис тәкҹә шиә мәзһәбинин һәдис китабларында дејил, әһли-тәсәннүнүн дә һәдис китабларында нәгл олунмушдур. Бу һәдиси һәмчинин әһли-сүннәнин ән мәшһур һәдис китабы олан "Сәһиһи-Бухари" китабында да ҝөрмәк олар. Бәс ҝөрәсән о кәсләр ки, Ханым Зәһранын(сәламуллаһи әлејһа) евини јандырыб, она силлә вуранлар бу һәдисә иман ҝәтирмәмишдиләрми?
Һәзрәти Рәсули-Әкрәмдән (сәлләллаһу әлејһи вә алиһ) сонра ҹамаатын дүнја вә мәнфәәт далынҹа дүшдүјүнү дејән мәрҹеи-тәглид билдириб ки, һәзрәти Рәсуләллаһ (сәлләллаһу әлејһи вә алиһ) өзү бујурмушдур ки, "Дүнјаја мәһәббәт бүтүн ҝүнаһларын мәншәјидир". Бу сәбәбдәндир ки, дүнја мәһәббәти өнә ҝәләндә бүтүн һәр шеј унудулмуш вә бу ҹинајәтләр баш вермишдир.
Белинә гылынҹ бағлајараг һәзрәти.Зәһранын (сәлләлаһу әлејһи вә алиһ) евинә һүҹум едәнләрлә јанашы бәзи Әһли-Бејт (әлејһис сәлам) достларынын да һәзрәти Зәһраја (сәламуллаһи әлејһа) әзијјәт вердикләрини тәәссүфлә билдирән Гуран мүфәссири дејиб ки, һиҹаб тахмајанлар вә јахуд һиҹаба камил риајәт етмәјәнләр дә һәзрәти Зәһраја (сәламуллаһи әлејһ) әзијјәт верәнләрин сырасындадырлар. Бундан башга гадын вә кишинин гарышдығы мәҹлисдә иштирак едәнләр јахуд да дүканларында гара бајраг асыб амма һәмин бајрағын алтында ҹамааты чәкидә алдадыб вә маллары баһа сатанлар јахуд да сәләмлә пул верәнләр дә һәзрәти Зәһраја (сәламуллаһи әлејһа) әзијјәт верәнләрин сырасындадырлар. Ҝәрәк елә инди киши кими Ханым Зәһра (сәламуллаһи әлејһа) илә әһд-пејман бағлајыб бүтүн она әзијјәт верә биләҹәк әмәлләри тәрк едәк.
Әза мәҹлисләринин вә дини һејәтләрин бөјүк бир сәрмајә олдуғуну дејән фигһ устады дејиб ки, јүзилләрдир јашадылан бу ишләр вә мәҹлисләр ҝәрәк һифз олунсун. Чүнки Ислам динини вә Иран Ислам Ингилабыны јашадан мәһз бунлардыр. Елә бу сәбәбдәндир ки, бу ил Иранда әзәмәтлә кечирилән Ашура мәҹлисини мүшаһидә едән Гәрб сијасәтчиләриндән бири өлкәсинә гајытдыгдан сонра билдирмишдир ки, нә гәдәр ки, онларын Ашурасы вар онлары јериндән ојнада билмәјәҹәјик. Сиз буну анламалы вә өз гәдринизи билмәлисиниз. Аллаһдан истәјин ки, әта етдији бу лүтфү әлиниздән алмасын.
Ингилабдан өнҹә шаһ заманы Меһабад останында јашајан бир әһли-сүннә алиминә "Шаһ сизә бу гәдәр зүлм етдији һалда сиз сәсинизи нијә чыхартмырсыныз" суалыны вердим ки, суалыма ҹаваб олараг мәнә белә деди: "Сиз шиәләр бизи өзүнүзлә мүгајисә етмәјин. Сиз шиәләрдә ики мүһүм шеј вардыр ки, биздә јохдур; Биринҹиси, сизин дин алимләри мүстәгилдир. Дөвләт тәрәфиндән малијјәләшмирләр. Хүмс сизин өзүнүзү бир дөвләт кими фәалијјәт ҝөстәрмәјинизә јардымчыдыр. Амма бизләр асылыјыг. Икинҹиси исә сизин Ашура мәктәбинизин олмасыдыр. Гара бајраг асырсыныз вә дәстә-дәстә ҹамааты ҹәм едиб, орада сијаси сөһбәтләр едиб наһагга өз етиразынызы чатдырырсыныз. Биз әһли-сүннә дә исә бунлар јохдур".
Амма бүтүн бунлар јахшыдыр бир шәртлә ки, Имам Һүсејнин (сәламуллаһи әлејһ) вә һәзрәти Зәһранын (сәламуллаһи әлејһа) гијамынын мәгсәдләрини ајырд едәк дејән Шејх Мәкарим Ширази дејиб ки, јалныз бу заман нәтиҹәләр әлдә едә биләрик. Имам һүсејнин (сәламуллаһи әлејһа) "Һәгигәтән, зилләт издән узагдыр" шүарыны бир вахтлар иранлылар демәклә галиб олдулар вә бу ҝүн дә бу шүарын бөлҝәдәки мәзлум халгларын шүарына чеврилдијинин шаһидијик.
Илдән-илә әзадарлыг мәҹлисләринин даһа да әзәмәтли кечирилмәсинә сәсләјән мәрҹеи-тәглид әсасән ҹаванлары бу мәҹлисләрә ҹәлб етмәјин зәрури олдуғуну билдирәрәк дејиб ки, дүшмәнин әсас һәдәфи ҹаванлардыр. Әҝәр бир ҹәмијјәтин ҹаванлары азғын оларса, ҝәләҹәк нәсилләрә һеч ҹүр хидмәт едә билмәјәҹәкдир.
Диггәт: Хәбәрдән истифадә етдикдә мәнбәјә истинад лазымдыр
