Әһли Бејт -АБНА- хәбәр аҝентлијинин вердији хәбәрә әсасән Азәрбајҹанда кечмиш һәрби комиссарлыг ишчиләринин һамысы сәрәнҹама ҝөндәрилиб. Бу барәдә АПА-ја Сәфәрбәрлик вә Һәрби Хидмәтә Чағырыш үзрә Дөвләт Хидмәтиндән мәлумат верилиб. Мәлумата ҝөрә, хидмәтин рәиси, ҝенерал-лејтенант Арзу Рәһимов кечмиш рајон һәрби комиссарлары вә комиссарлыгларын бүтүн ишчиләрини сәрәнҹама ҝөндәриб. Апрелин 13-ә кими јени штат тәсдиг едиләҹәк. Бундан сонра исә кечмиш комиссарлыг ишчиләринин бир һиссәси јени јарадылмыш Сәфәрбәрлик вә Һәрби Хидмәтә Чағырыш үзрә Дөвләт Хидмәтиндә јенидән ишә ҝөтүрүләҹәк. Галан шәхсләрә исә һәрбидә чалышмаг тәклиф олунаҹаг. Јени штатын тәсдиг едилмәси мүддәти апрелин 13-дә баша чатса да, апрел һәгиги һәрби хидмәтә чағырыш ајы олдуғундан, бу просесин мартын сонуна кими баша чатдырылмасы ҝөзләнилир.
Илһам Әлијев февралын 13-дә “Һәрби вәзифә вә һәрби хидмәт һаггында” ганунун тәтбиги барәдә фәрман имзалајыб. Фәрмана әсасән Азәрбајҹан Республикасы Мүдафиә Назирлијинин табелијиндә олан Азәрбајҹан Республикасынын Һәрби Комиссарлығы, Нахчыван Мухтар Республикасынын Һәрби Комиссарлығы, рајон, шәһәр, шәһәр рајону һәрби комиссарлыглары ләғв едиләрәк онларын әсасында Азәрбајҹан Республикасынын Сәфәрбәрлик вә Һәрби Хидмәтә Чағырыш үзрә Дөвләт Хидмәти јарадылыб.
Илһам Әлијевин сәрәнҹамы илә Арзу Рәһимов Азәрбајҹан Республикасынын Сәфәрбәрлик вә Һәрби Хидмәтә Чағырыш үзрә Дөвләт Хидмәтинин рәиси тәјин едилиб. О, буна гәдәр Дөвләт Миграсија Хидмәтинин рәиси вәзифәсиндә чалышыб.
Арзу Рәһимовун Президент Администрасијасынын рәһбәри Рамиз Меһдијевин гоһуму олдуғу билдирилир. Онун тәјинаты мүдафиә назири Сәфәр Әбијевин нәзарәтиндә олан һәрби комиссарлыгларын Рамиз Меһдијевин ихтијарына верилмәси кими изаһ едилир. Елә бу бахымдан Арзу Рәһимов илк ҝүндән “тәмизләмәләрә” башламышды. Мәлумат үчүн билдирәк ки, һәрби комиссарлын әһәмијјәтли һиссәси Сәфәр Әбијевә јахын шәхсләрдир. Бу вәзифәләрә тәјинат мүдафиә назири илә кирвә олан кәнд тәсәррүфаты назиринин мүавинин Аслан Аслановун хејир-дуасы һәјата кечирилирди. Арзу Рәһимов да бүтүн бунлары билмәмиш дејил вә она ҝөрә дә јени команда формалашдырмаға чалышыр. Арзу Рәһимовун Сәфәр Әбијевин кадрларыны јенидән вәзифәјә тәјин едәҹәји һеч бир һалда инандырыҹы дејил. Бунун исә Арзу Рәһимовла Сәфәр Әбијев арасында зиддијјәтләрин әсасыны гојаҹағы шүбһәсиздир. Мүдафиә назири кечмиш баш һәрби комиссар Әлиаға Һүсејновла олдуғу кими, инди дә Арзу Рәһимовла вурушмаға башлајаҹаг. Бу вуруш һәм дә Сәфәр Әбијев-Рамиз Меһдијев дуеллосу олаҹаг. Саваш исә артыг башлајыб...
Диггәт: Хәбәрдән истифадә етдикдә мәнбәјә истинад лазымдыр
