Әһли Бејт -АБНА- хәбәр аҝентлијинин вердији хәбәрә әсасән артыг һиҹаб мәһбусу, руһани һаҹы Һәсән Мәммәдовун һәбсиндән бир ил өтүр
Һәсән Мәммәдов өтән ил јанвар ајынын 25-дә һәбс олунуб. Һиҹаб гадағасындан сонра Ҹәлилабад рајонунда буна етираз олараг бир сыра мәҹлисләрдә чыхышлар етмишди. Лакин сон олараг Ҹәлилабад рајонунда Һиҹаб гадағасына етираз олараг тәшкил олунан аксијада тәһсил назири Мисир Мәрдановун шәкилини јандырылмыш, мәктәблиләрин һүгугларынын бәрпа едилмәси тәләб олунмушду.
Һәсән Мәммәдовун гардашы Һүсејн Мәммәдовун islamazeri.az-а вердији мәлумата ҝөрә, өтән илин бу ҝүнү сәһәр саат 10:00-да Ҹәлилабад рајон полис бөлмәсинин сержанты Турал Ағајев она зәнҝ едәрәк гардашы Һәсәнин полис бөлмәсинин рәиси Рәһим Новрузов тәрәфиндән чағырылдығыны билдириб. “Сәбәбини өјрәнмәк үчүн рәисә зәнҝ вурдум. Рәис деди ки, Ашура ҝүнү 12 ҝүнлүк һәбс олундуғуна ҝөрә һансыса сәнәдә гол чәкмәлидир. Мән дә Һәсәнлә бирҝә полис бөлмәсинә ҝетдим. Һәсәни Әфлатун Мәммәдов адлы полислә бир нечә нәфәр сәс-күј сала-сала Сәрвәр Һүсејновун хидмәти отағына апардылар. Ичәридә исә сәһнә әввәлҹәдән һазырланмышды. Һәсән ичәри ҝирән кими полисләрдән бири телевизору столгарышыг ашырдыб. Вә дедиләр ки, ҝуја Һәсән столла полиси вуруб вә налајиг сөзләр сөјләјиб. Амма о мәһкәмәдә деди ки, мән јалныз “Ја Зәһра, Ја Зејнәб” демишәм. Әҝәр мәни бу сөзләрә ҝөрә иттиһам едирсинизсә ејби јох един. Амма Аллаһдан горхун. Аллаһ бу бөһтаны ахирәтә сахламады Рәис Рәһим Новрузов ишдән чыхарылды.”
Гејд едәк ки, 2011-ҹи ил сентјабрын 12-дә Ширван шәһәриндә кечирилән Апелјасија Мәһкәмәсиндә она гаршы ирәли сүрүлән 221-ҹи маддәнин 3-ҹү бәнди гүввәдә сахланылыб. Һалбуки, бунун 221-ҹи маддәнин 1-ҹи бәнди илә әвәз олунмасы төвсијә олунурду. Белә ки, өтән мәһкәмәдә шаһид вә зәрәрчәкән гисминдә диндирилән полис ишчиси мүттәһимин она һеч бир мүгавимәт ҝөстәрмәдијини билдирмишди.
Лакин сахта иттиһамла разылашмајан Һәсән Мәммәдовун гардашы чыхарылан һөкмдән Апелјасија Мәһкәмәсинә мүраҹиәт едиб. Јанвар ајынын 17-дә исә Бакыда Али Мәһкәмәдә Фәрһад Кәримовун сәдрлији илә јенидән руһани Һәсән Мәммәдов ишинә бахылыб. Сәдр полисә мүгавимәт иттиһамы илә азадлыгдан мәһрум едилән Һәсән Мәммәдовун һәбс мүддәтинин 3,6 илдән 2 ил мүддәтинә гәдәр азалдылмасына даир гәрар чыхарыб.
Диггәт: Хәбәрдән истифадә етдикдә мәнбәјә истинад лазымдыр
