Әһли Бејт -АБНА- хәбәр аҝентлијинин вердији хәбәрә әсасән: Бу ҝүн саат 15 радәләриндә 200 нәфәрә јахын такси сүрүҹүсү ҝүнләрдән бәри давам едән етираз аксијалараындан нөвбәтисини кечирибләр. Онлар бу ҝүн дә Нәглијјат Назирлијинин гаршына топлашмаға ҹәһд едибләр.
Һадисә јериндән мәлумат верән Фәраһим Илгароғлунун сөзләринә ҝөрә, полис гүввәләри такси сүрүҹүләрини назирлијин бинасына јахын бурахмамаг үчүн һәр ҹүр тәдбирләр ҝөрүбләр.
Нәглијјат Назирлијинин көһнә автомобилләрлә такси хидмәти ҝөстәрмәјә гојдуғу гадағаја етираз олараг Нәби адлы бир сүрүҹү лезва удуб. Полисләр онун ағзыны зорла ачмаг истәјиб, даһа сонра дөјә-дөјә полис мәнтәгәсинә апарыблар.
Гејд едәк ки, Нәглијјат Назирлији өз мөвгејиндән ҝери чәкилмәк истәмир. Сүрүҹүләр исә такси хидмәтинин онлар үчүн ахырынҹы доланышыг јери олдуғуну билдирир, онларын фәалијјәтинин лисензијалашдырылмасыны тәләб едирләр.
***
Ф.Илгароғлунун сөзләринә ҝөрә, полисләр сүрүҹүләрлә јанашы өз пешы борҹуну јеринә јетирән журналистләрә гаршы да агрессив давраныблар: "Онлар мәни фотокамерамы да әлимдән алдылар. Елә билдим јерә чырпыб сындыраҹаглар. Амма Мурадов сојадлы полис забитинин ишә гарышмасындан сонра камерамы гајтардылар. Мәлум олду ки, мүхтәлиф ракурслардан чәкдијим 7-8 фотошәкил камеранын јаддашындан силиниб".
Бундан башга, "Туран" аҝентлијинин фоторепортјору Етимад Будагов да тәзјигләрә мәруз галыб. О, шәкил чәкмәк истәјәркн полисләр ону итәләјиб јерә јыхыблар.
Диггәт: Хәбәрдән истифадә етдикдә мәнбәјә истинад лазымдыр
