Әһли Бејт -АБНА- хәбәр аҝентлијинин вердији хәбәрә әсасән: Ики тәһсил гуруму арасында мүбаһисә јени илдә дә давам етмәкдәдир. Бу дәфә Тәһсил Назирлији әкс һүҹума кечиб. Назирлијин Елми Методик Шурасынын “Биолоҝија” бөлмәси Тәләбә Гәбулу үзрә Дөвләт Комиссијасынын (ТГДК) дәрсликләриндә гүсурларын ашкар олунмасы барәдә бәјанат вериб. Белә ки, шура ТГДК-нын 2011-ҹи илдә дәрҹ етдирдији “Биолоҝија: үмуми биолоҝија” адлы вәсаитин етибарсыз елан едилмәси вә сатышынын дајандырылмасы үчүн ТГДК сәдринә мүраҹиәт едиб.
Мүраҹиәтдә билдирилир ки, ТГДК тәрәфиндән чап олунмуш һәмин вәсаит Елми Методик Шурада мүзакирә едилмәјиб вә разылыг алынмадан дәрҹ олунуб. Үстәлик, о да ајдын олуб ки, һәмин вәсаитин дәрҹинә Тәһсил Назирлији гриф вермәјиб.
Мүраҹиәтдә гејд едилир ки, дәрҹиндән әввәл вәсаит Тәһсил Назирлијинин мүтәхәссисләри тәрәфиндән јохланыларкән чохлу ҹидди елми сәһвләри олдуғу үчүн дәрҹи мәсләһәт билинмәсә дә, ТГДК ону күтләви тиражла нәшр етдириб. Бөлмә мүтәхәссисләри һәмин вәсаитин дәрҹ едилмиш варианты үзәриндә дә арашдырма апарараг мүәјјән едиб ки, артыг сатыша бурахылмыш китабда јенә дә бәзән бир-биринә зидд олан һәддән чох елми сәһвләр галмагдадыр ки, бу да абитуријентләрдә чашгынлыг јарада биләр. Мүраҹиәтдән ајдын олур ки, Тәһсил Назирлији “Биолоҝија: үмуми биолоҝија” адлы вәсаитин сатышынын дајандырылмасы, сатылан нүсхәләрин етибарсыз һесаб едилмәси үчүн тәдбирләрин ҝөрүлмәсини мәгсәдәујғун һесаб едир.
ТГДК да дәрһал комиссија сәдринә едилән мүраҹиәтә ҹаваб вериб. Гурумун мәтбуат катиби Елнур Нағызадә билдириб ки, һәмин вәсаитләри чап етмәк ТГДК-нын һүгугудур вә онлар сатышдан јығышдырылмајаҹаг: “Тәләбә Гәбулу үзрә Дөвләт Комиссијасы бир дөвләт органыдыр. Әсаснамәсинә ҝөрә, ТГДК гәбул имтаһанларына һазырлашан ҝәнҹләрә көмәк мәгсәдилә вәсаит дәрҹ етмәк һүгугуна маликдир. Комиссија 2007-ҹи илдән бу вәсаитләри дәрҹ едир. Гијмәтләндирмә илә мәшғул олан тәшкилатын али мәктәбләрә кечирилән имтаһанлара һазырлашан намизәдләрә көмәк мәгсәдилә вәсаитләр дәрҹ етмәси бүтүн дүнјада гәбул едилән нормадыр. Бу вәсаитләр дәрслији әвәз етмәк мәгсәди дашымыр. Һәр бир ҝәнҹ тәһсил алдығы мүддәтдә илк нөвбәдә орта мәктәб дәрсликләриндән билик әлдә едир. Бу биликләри гәбул имтаһанлары әрәфәсиндә системләшдирмәк үчүн демәк олар ки, бүтүн фәнләр үзрә вәсаитләр дәрҹ едилир”.
Е.Нағызадә һәмчинин гејд едиб ки, комиссијанын нәшри олан “Биолоҝија” вәсаитинин үзәриндә “дәрс вәсаити” јох, садәҹә, “вәсаит” јазылыб: “Һәр ил гәбул имтаһанларында јүксәк нәтиҹәләр ҝөстәрән абитуријентләрлә анкет сорғулары да апарылыр. Сон илләр кечирилән бу сорғулар ҝөстәриб ки, комиссија тәрәфиндән нәшр едилән бу вәсаитләр имтаһана һазырлыг просесиндә онларын столүстү китабы олуб. Хүсусән дә уҹгар рајонларда јашајан абитуријентләрә бу вәсаитләр орта мәктәбдәки биликләрини үмумиләшдирмәкдә чох јардымчы олур”.
Гејд едәк ки, назирлијин Елми Методик Шурасынын “Биолоҝија” бөлмәси мәсәләнин арашдырылмасы үчүн Тәһсил Назирлијинә дә мүраҹиәт үнванлајыб. Експертләр исә билдирирләр ки, шуранын сәһв ахтармасы ТГДК-нын өтән илин сонунда Тәһсил Назирлијинә һаглы һүҹумунун гаршылығыдыр. Белә ки, ТГДК сәдринин өлкәдә чап едилән орта мәктәб дәрсликләриндә ҹидди нөгсанлар олдуғуну билдирмәси ҹидди ажиотажа сәбәб олуб. М.Аббасзадә јени чап олунан биолоҝија вә тарих дәрсликләриндәки сәһвләри хүсуси олараг габардыб. Әслиндә бурада ҹидди мәсәлә абитуријент күтләсинин гәбул имтаһанларындан ашағы бал топламасы илә бағлыдыр. ТГДК сәдри һесаб едир ки, бу, сырф дәрсликләрдәки нөгсанларла бағлыдыр.
Диггәт: Хәбәрдән истифадә етдикдә мәнбәјә истинад лазымдыр
