Әһли Бејт -АБНА- хәбәр аҝентлији: Ливија илә бағлы БМТ-дә гәтнамә гәбул олундугдан сонра НАТО гошунлары гыса бир мүддәт әрзиндә Ливија әразисиндә һәрби әмәлијјата башлајараг Гәззафи һакимијјәтинә ҹидди зәрбәләр вурдулар. Лакин Гарабағ мүнагишәси илә бағлы 1993-ҹү илдән БМТ Тәһлүкәсизлик Шурасында 4 гәтнамәмин гәбул олунмасына бахмајараг, бејнәлхалг иҹтимаијјәт тәрәфиндән Ермәнистана бу ҝүнә гәдәр һәр һансы бир тәзјиг едилмәјиб.
ФактХебер.ҹом-ун “Гарабағ мүнагишәсинә гаршы бу ҹүр ајры-сечкиликләр нәдән доғур” суалыны ҹавабландыран “Шәрг-Гәрб” Арашдырмалар Мәркәзинин рәһбәри Әрәстун Оруҹлу, бунун бир нечә сәбәби олдуғуну билдирди: “Илк өнҹә белә бир вәзијјәт ҝеосијаси реаллыгдан доғур. Азәрбајҹан тәрәфи реаллығы нәзәрә алараг һеч бир заман Дағлыг Гарабаға һәр һансы бејнәлхалг һәрби мүдахилә илә бағлы БМТ-дә мәсәлә галдырмајыб. БМТ-нин гәтнамәләриндә әразиләрин бошалдылмасы тәләби гојулуб. Һамыја мәлум олдуғу кими ҝеосијаси реаллығын сәбәбкарларындан бири Русијадыр.”
Русијанын БМТ Тәһлүкәсизлик Шурасынын даими үзвү вә вето һүгугуна малик олдуғуну гејд едән Әрәстун бәј, “Гарабаға бејнәлхалг һәрби мүдахилә илә бағлы БМТ-дә һәр һансы бир гәтнамәмин гәбул олунмасы мүмкүнсүздүр”, - дејә билдирди: “Диҝәр тәрәфдән Дағлыг Гарабағ рәсми статусуна ҝөрә, етник әрази мүнагишәсидир. Әслиндә бу бир статусдур. БМТ Ливијаја мүдахилә илә бағлы о вахт гәтнамә гәбул етди ки, Гәззафи һөкумәти илкин мәрһәләдә она гаршы динҹ етираз аксијалары кечирән әһалини орду вә силаһла гаршылады. Дағлыг Гарабағ мүнагишәсиндә исә Ливијанын илкин ҝүнләриндән фәргли олараг һәр ики тәрәф силаһлыдыр. Ејни һалда ону да дејә биләрик ки, Ливијада режимин дәјишмәси һамыја лазым иди. Она ҝөрә дә БМТ-дә бу гәрар гәбул олунду. Лакин Дағлыг Гарабағын ишғалдан азад олунмасы һамыја лазым дејил.”
Әрәстун Оруҹлу Дағлыг Гарабағ мүнагишәси илә әлагәдар гаршыдан ҝәлән илдә дә һеч бир ирәлиләјишин әлдә едилмәјәҹәјини сөјләјәрәк, бунун мүәјјән сәбәбләри олдуғуну гејд етди: “Гаршыдан сечкиләр өнҹәси олан бир ил ҝәлир. Үмумијјәтлә мүнагишәјә бағлы өлкәләрдә кифајәт гәдәр ҝәрҝинликләр мөвҹуддур. Азәрбајҹанын гүрур јери игтисади ҝөстәриҹиләри иди. Бу ил артыг һәмин ҝөстәриҹиләр дә јох вәзијјәтиндәдир. Өлкәнин буилки игтисади артым темпи 0,5% олуб. МДБ өлкәләри ичәрисиндә бу ҝөстәриҹи ән ашағы ҝөстәриҹидир. Артыг Азәрбајҹанын фәхр едәҹәји бир шеј галмајыб. Өлкә вә һакимијјәт дахили дә кифајәт гәдәр ҝәрҝинликләр мөвҹуддур. Белә бир шәраитдә мүһарибә етмәк ән бөјүк авантүристлик оларды. Бундан бөјүк авантүрист исә һансыса бир сазишә ҝетмәкдир. Сазиш исә һәр ики тәрәфин бу вә ја диҝәр компромисләрә ҝетмәси илә мүмкүндүр. Она ҝөрә дә белә бир һал нә Ермәнистанда олаҹаг, нә дә ки Азәрбајҹанда. Гарабағ мүнагишәси илә бағлы әлдә едилән атәшкәс режими Русија вә Гәрбин марагларына хидмәт едир. Она ҝөрә дә ҝәлән ил үчүн һәр һансы бир ирәлиләјиш ҝөзләмәк мәнҹә јерсиздир.”
Хәјал Шүкүр
Диггәт: Хәбәрдән истифадә етдикдә мәнбәјә истинад лазымдыр
