Әһли Бејт -АБНА- хәбәр аҝентлијинин вердији хәбәрә әсасән: Милли Мәҹлис Ҹинајәт Мәҹәлләсинә дәјишикликләри мүзакирә едиб. Тәклиф олунан дәјишикликләр әсасән дини фәалијјәт, еләҹә дә дини китаб вә әшјаларын ганунсуз сатышы, идхалына гојулан ҹәримәләри даһа дә ағырлашдырыр, ејни заманда һәбс ҹәзасы нәзәрдә тутулур.
Дәјишикликләрә ҝөрә, дини әдәбијјат вә әшјаларын јајылмасына сәрт ҹәзалар мүәјјән олунур. ҸМ-ин 167-2.1-ҹи маддәсинә әсасән мүвафиг разылыг олмадан дини тәјинатлы әдәбијјаты, әшјалары вә дини мәзмунлу башга мәлумат материалларыны истеһсал етмә, сатыш вә јајмаг мәгсәдилә идхал етмә, сатма вә јајма 5000 манатдан 7000 манатадәк ҹәримә вә ја 2 иләдәк мүддәтиндә һәбслә ҹәзаландырылыр. 167-2.2 маддәјә әсасән ејни әмәлләр габагҹадан әлбир олан бир груп шәхс вә ја мүтәшәккил дәстә тәрәфиндән төрәдилдикдә, тәкрар төрәдилдикдә, вәзифәли шәхс тәрәфиндән вә гуллуг мөвгедән истифадә етмәклә төрәдилдикдә 7000 манатдан 9000 манатадәк ҹәримә вә ја 2 илдән 5 иләдәк һәбслә ҹәзаландырылыр.
Тәклиф олунан әлавәләр диндарлар тәрәфиндән бирмәналы гаршыланмајыб. Бир чохлары буну өлкәдә дини фәалијјәти даһа чох нәзарәт алтына алмаг ҹәһди сајыр. Гејд едәк ки, Азәрбајҹан ганунвериҹилијиндә һөкумәтин разылашдырмадығы дини әдәбијјаты јајмаг, сатмаг вә ја өлкәјә ҝәтирмәк гадағандыр. Диҝәр тәрәфдән, онсуз да мүвафиг дөвләт гурумлары артыг нечә илдир дини әдәбијјат саһәсини ҹидди нәзарәтә ҝөтүрүб, хариҹдән Азәрбајҹана дини әдәбијјат демәк олар ки, ҝәтирилмир. Дини Гурумларла Иш үзрә Дөвләт Комитәси дә гадаған олунмуш дини әдәбијјатын сијаһысыны һәр ил елан едир. Белә олан тәгдирдә ҸМ-ә дәјишиклик едиб бир дини китаб сатаны вә ја дини әшјаны - тәсбеһ, мөһүр вә ја диҝәр дини әшјаны - сатмаға ҝөрә инсанлара ағыр һәбс ҹәзасынын мүәјјән едилмәсинә нә еһтијаҹ варды?
“Мәнәви Сафлыға Дәвәт” Иҹтимаи Бирлијинин сәдри, фәлсәфә доктору, илаһијјатчы Елшән Мустафаоғлу јени дәјишиклији абсурд аддым сајыр. Онун фикринҹә, гануна јени дәјишикликдә ҹәзалар чох сәртдир: “Әхлагсызлығы, јахуд агрессијаны, ҹәһаләти, хурафаты, мәнәвијјатсызлығы тәсвир едән әдәбијјат, әшјалар вә о мәзмунлу материаллары истеһсал вә идхал етмәк, сатмаг вә јајмаға ҝөрә ганунда һеч бир манеә нәзәрдә тутулмур, бунлар ганунла мәһдудлашдырылмыр. Амма мәсәлән, бири Гуран ајәси тәсвир олунмуш бир табло - дини әшјадыр дејә, јахуд Гурани-Кәрим вә ја Инҹил - дини әдәбијјатдыр дејә, сатаҹагса, ону 2 ил һәбс дә ҝөзләјә биләр. Ганунда динә белә агрессив мүнасибәт һәтта ССРИ заманы да мүшаһидә олунмајыб”.
Е.Мустафаоғлу дејир ки, верҝиләрдән јајынан, дөвләт малыны талан едәнләрә гаршы белә 5-9 мин манатлыг ҹәримәләр тәтбиг едилмәдији тәгдирдә тәсбеһ сатаны бу шәкилдә ҹәзаландырмаға ады вермәк мүмкүн дејил: “Бири ҹанамаз, Кәбә шәкли, јахуд гибләни ҝөстәрән компас, хач сатмаға ҝөрә бу гәдәр сәрт ҹәзаларла үзләшәҹәк, амма диҝәри мәнәвијјатсызлығы тәблиғ едән мәһсуллары сәрбәст сатаҹаг. Бири дини мәзмунлу филми сатмагда әнҝәлләрлә үзләшәҹәк, диҝәри әхлагсызлығы тәблиғ едән филмләри раһатҹа јајаҹаг. Буну неҹә изаһ едәк? Гуран сатышы, јахуд чапына ҝөрә дә 5-7 мин манат ҹәримә олар? Әлбәттә, ганунвериҹилик бу мәсәләләри тәнзим етмәлидир, амма бу инсанларын дини һагларынын белә сәрт шәкилдә мәһдудлашдырылмасы һесабына олмамалыдыр. Ганун там мәнасы илә вәтәндашларымызын дини етигад азадлығыны тәмин етмәлидир”.
Илаһијјатчы-алимин фикринҹә, конститусијамыз дини етигад азадлығыны таныјыр вә бүтүн ганунлар, онлара едилән дүзәлишләр онун тәләбләринә ҹаваб вермәлидир: “Конститусијамыз дини јајмаг һүгугуну таныдығы вә дәстәкләдији һалда башга бир ганунун буна ҝөрә 5 иләдәк һәбс, јахуд 5-9 мин манат ҹәримә тәтбиг етмәси нә дәрәҹәдә дүзҝүндүр? Конститусијада гејд едилдији кими, өлкәдә һәр кәс өз дини инанҹыны ифадә етмәкдә вә јајмагда сәрбәст олмалыдыр”.
Кәнан
Диггәт: Хәбәрдән истифадә етдикдә мәнбәјә истинад лазымдыр
