Әһли Бејт -АБНА- хәбәр аҝентлијинин вердији хәбәрә әсасән: Бу ҝүн Азәрбајҹан республикасында әлијевләр режиминин тарихинде ән рүсвајчы аддымы ирәли атылараг өлкәнин намуслу вә пак инсанларына гаршы залымлыг едиләрәк мөвҹуд режимин газиләри тәрәфиндән исламчылар һәбсә мәруз галмышлар.
Бу әдаләтсизликлә разылашмајан бүтүн виҹданлы инсанлар вә гурумлар өз етиразларыны етмәкдә давамлыдырлар. Белә ки, Азәрбајҹан Бирлик Тәшкилатынын сәдри Вүсал Һәтәмов тәшкилатын сон һәбсләрлә бағлы нараһатчылығыны Бирлик.аз сајтына бөлүшүб.
Бәјанатын мәтнин сајтымызын зијарәтчиләринә тәгдим едирик:
“Баш верән сијаси һәбсләр - истәр мүхалифәт дүшәрҝәсиндән олсун, истәрсә дә руһани тәбәгәдән - сијаси сифаришдән башга бир шеј дејил. Үмумијјәтлә, баш верән сијаси һәбсләр Азәрбајҹан дөвләти үчүн тарихи ләкәдир. Бу сәбәбдән дә биз бу һәбсләри писләјир, һәмчинин вурғулајырыг ки, бу ҹүр аддымлар өлкәмизә бејнәлхаг аләмдә утанҹ ҝәтирир. Дүнјанын демократикләшмә үчүн истәнилән хошмәрамлы аддымлара әл атдығы бир дөврдә Азәрбајҹан һакимијјәти ән кичик тәнгидләрә, етиразлара белә дөзүм ҝөстәрә билмир. Бу исә ондан хәбәр верир ки, артыг ЈАП һакимијјәти өз сијаси механизминин ифласа уғрадығыны тәзаһүр етдирир. Тәһсил Назирлијиндә ишдән чыхарылмыш ЈАП-ын сијаси шурасынын үзвләри бир даһа буна бариз мисалдыр. Јахшы, диндарлар писдир, мүхалифәт партијалары гараҝуруһчудур, бәс сон вахтлар рүшвәт, коррупсија үстүндә тутуланлар, ишдән азад олунанлар кимдир? Онлар да диндардыр вә ја мүхалифәтчиләрдирми? Коррупсија әлејһинә мүбаризә һәрәкаты һакимијјәтин тәјин етдији мәмурлара гаршы дејилми? Бәли, бу һәбсләр ондан хәбәр верир ки, бәзи коррупсија далғалары ичәрисиндә боғулан назирликләр, о ҹүмләдән Тәһсил Назирлији сүни проблемләр јаратмагла халгы гыҹыгландырмаг вә бунунла да онларын мүмкүн динҹ етиразы заманы һәмин шәхсләрин һәбсини тәшкил етмәклә јүксәк һаким даирәләрин фикирләрини јајындырмаг, һәмчинин коррупсија әлејһинә мүбаризә апармагда исрарлы олан гурумлары чашдырмаг истәјир.”
Диггәт: Хәбәрдән истифадә етдикдә мәнбәјә истинад лазымдыр
