Әһли Бејт -АБНА- хәбәр аҝентлијинин вердији хәбәрә әсасән: Бакы Ағыр Ҹинајәтләр Мәһкәмәсиндә исламчыларын нөвбәти мәһкәмә просеси кечирилиб. Ҝүнүн икинҹи јарысында Азәрбајҹан Ислам Партијасынын Астара рајон тәшкилатынын сәдри Руфулла Ахундзадәнин, илаһијјатчы Зүлфүгар Микајылзадәнин, еләҹә дә партијанын һәбсдә олан лидери Мөвсүм Сәмәдовун јахым гоһумлары Дәјанәт Сәмәдовун вә Фирдовси Мәммәдрзајевин чыхышы динләниб.
Чыхышлар битдикдән сонра һаким Елдар Исмајылов мәһкәмә һөкмүнүн октјабрын 7-дә саат 14-дә охунаҹағыны билдириб.
Ҝүнүн биринҹи јарысында М.Сәмәдов, Азәрбајҹан Ислам Партијасы сәдринин биринҹи мүавини Вагиф Абдуллајев, еләҹә дә Масаллыдан олан руһани Фәрамиз Аббасов сон сөзлә чыхыш едиб вә барәләриндә галдырылмыш иттиһамы сахта адландырыблар.
Гејд едәк ки, бу ил јанварын 7-дән Азәрбајҹан Ислам Партијасы үзвләринин вә бәзи диндарларын һәбси башлајыб. Һәмин ҝүн Доктр Мөвсүм Сәмәдов, онун сүрүҹүсү Мирһүсејн Казымов, АИП тәшкилат шөбәсинин мүдири Вагиф Абдуллајев вә партија функсионери Елчин Һәсәнов тутулублар.
Јанварын 8-дә Нәриманов Рајон Мәһкәмәси Вагиф Абдуллајевә 15, Доктр Мөвсүм Сәмәдова вә Елчин Һәсәнова 13, Мирһүсејн Казымова исә 11 сутка иш вериб. Онлар полисә табе олмамагда шәррләнәрәк тәгсирли билинибләр.
Һәмин ҝүн Дахили Ишләр Назирлијинин Баш Мүтәшәккил Ҹинајәткарлыгла Мүбаризә Идарәси Доктр Мөвсүм Сәмәдовун Губа рајонунда јашајан әмиси оғлу Дәјанәт Сәмәдовун ишләдији дүканда әмәлијјат-ахтарыш тәдбирләри кечириб. Доктр Мөвсүм Сәмәдовун атасы Мәрдан Сәмәдова мәхсус електрик маллары мағазасына бахыш заманы орадакы сејфин алтында 3 әдәд әл гумбарасы гојараг, һабелә јашадығы евдә 7 әдәд автомат патрону вә ичәрисиндә дини радиклазми тәблиғ едән мәлуматларын олдуғу електрон дашыјыҹылары атараг Дәјанәт Сәмәдову һәбс едибләр.
Јанварын 11-дә Мөвсүм Сәмәдовун гајыны Фирдовси Мәммәдрзајевин евиндә ахтарыш апарылыб. 10 әдәд “Ф-1” әл гумбарасы вә онлар үчүн алышдырыҹылар, 40 әдәд автомат патрону вә автомат силаһы үчүн 1 әдәд дарагы Ф.Мәммәдрызајевин евинә атараг ону јанварын 13-дә һәбс едибләр.
Јанварын 18-дә АИП тәшкилат шөбәсинин мүдири Вагиф Абдуллајевә, ајын 20-дә исә Доктр Мөвсүм Сәмәдова иттиһам ирәли сүрүлүб.
Һәмин ај партијанын Астара рајон тәшкилатынын сәдри Руфулла Ахундзадәјә, Масаллынын Хыл кәндинин ахунду Фәрамиз Аббасова мәхсус евләрдә әмәлијјат-ахтарыш тәдбирләри һәјата кечирилиб вә габагҹадан һәјәтләриндә силаһ-сурсат јерләшдирән әлијевләрин мәмурлары одлу силаһлары ашкар едилдикдән сонра онлары да һәбс едибләр.
Исламчылар Ҹинајәт Мәҹәлләсинин 28, 214.2.1-ҹи (габагҹадан әлбир олан бир груп шәхс, мүтәшәккил дәстә вә ја ҹинајәткар бирлик (ҹинајәткар тәшкилат) тәрәфиндән ҹинајәтә һазырлыг), 28, 214.2.3-ҹү (одлу силаһдан вә силаһ гисминдә истифадә олунан предметләрдән истифадә етмәклә ҹинајәтә һазырлыг), 228.3-ҹү (Ганунсуз олараг одлу силаһ, онун комплект һиссәләрини, дөјүш сурсаты (јивсиз одлу ов силаһы вә һәмин силаһ үчүн дөјүш сурсаты истисна олмагла), партлајыҹы маддәләр вә гурғулар әлдә етмә, башгасына вермә, сатма, сахлама, дашыма вә ја ҝәздирмә), 278-ҹи (һакимијјәти зорла әлә кечирмә вә ја ону зорла сахлама) маддәләри илә дөвләт тәрәфиндән шәррләниләрәк иттиһам олунурлар.
Јалныз Руфулла Ахундзадәјә Ҹинајәт Мәҹәлләсинин 283.1. (Милли, ирги, сосиал вә ја дини нифрәт вә дүшмәнчилијин салынмасына, милли ләјагәтин алчалдылмасына, һабелә милли, ирги вә ја дини мәнсубијјәтиндән асылы олараг вәтәндашларын һүгугларынын мәһдудлашдырылмасына вә ја үстүнлүкләринин мүәјјән едилмәсинә јөнәлән һәрәкәтләр, ашкар сурәтдә вә ја күтләви информасија васитәләриндән истифадә олунмагла төрәдилдикдә) маддәси илә шәррләнәрәк јени иттиһам ирәли сүрүлүб.
Бу һәбсләр сијаси характерлидир вә әсасән јанварын 2-дә партијанын Баш Мәҹлисиндә Мөвсүм Сәмәдовун чыхышы илә бағлыдыр.
2007-ҹи илдә партија сәдри сечилән Доктор Мөвсүм Сәмәдов јанварын 2-дә Азәрбајҹан Ислам Партијасы Баш Мәҹлисинин иҹласында чыхыш едәрәк мәктәбләрдә һиҹаба гадаға гојулмасыны кәскин писләјиб вә һакимијјәтин өлкә сәвијјәсиндә рәваҹ вердији коррупсијаја, ганун позғунлуғуна, ишғалчы сионист режимин ҝөстәришләрини әлијевләр тәрәфиндән ҹанла вә башла һәјата кечирилмәсини тәнгид едәрәк Мәһәммәд Пејғәмбәрдән (сәлләллаһу әлејһи вә алеһ) “динә тәрәф бәла ҝәлсә, ҹанынызы верин, дининизи гуртарын” дејә ситат ҝәтирән АИП лидери Азәрбајҹан халгыны “ајаға галхмаға вә залым режимә сон гојмаға” чағырыб.
Диггәт: Хәбәрдән истифадә етдикдә мәнбәјә истинад лазымдыр
