Әһли Бејт -АБНА- хәбәр аҝентлијинин вердији хәбәрә әсасән: Исламчыларын мәһкәмәсиндә тәгсирләндирилән шәхсләрин чыхышлары фасиләјәдәк давам едиб. Азәрбајҹан Ислам Партијасынын сәдри Мөвсүм Сәмәдовдан сонра партија сәдринин биринҹи мүавини Вагиф Абдуллајев, даһа сонра исә Масаллыдан олан руһани Фәрамиз Аббасов чыхыш едиб.
Ф.Аббасов сон чыхышында она гаршы елан олунмуш иттиһамы хүлја адландырыб: “Дөвләтин мәнә гаршы дүзүб-гошдуғу иттиһам ҝүлүнҹдүр. Шаһидләр өјрәдилмиш адамлардыр вә онлар хүлја данышыблар. Хүлја данышмаг исә дүшүнҹәсиз адамларын ишидир”.
Ф.Аббасов конститусија һүгугларынын, онлара гаршы тәгсирсизлик презумпсијасынын позулдуғуну вурғулајыб: “Мәнә дејирләр ки, өлкәјә террор ҝәтирмисән. Баша дүшә билмирәм ки, сөһбәт һансы террордан ҝедир. Мән ҝуја һансыса сијаси ҹәрәјанларла бирләшиб дөвләтин һансыса органыны девирмәлијмишәм. Бу нә демәкдир? Нә гәдәр ҝүлмәли олмалысан ки, бир адамла бағлы бу гәдәр ҝүлмәли иддиа галдырасан? Азәрбајҹан елә бир өлкәдир ки, бу ситуасијаја һәр кәс дүшә биләр. Бәс мән киминлә ишләмишәм, һаны о тәрәфин адамлары?
Һеч бир ибтидаи дини савады олмајан иттиһам тәрәфи өзләриндән “Гуран”дан нүмунәләр ҝәтирирләр. Иттиһам ирәли сүрмүсүнүз, зәһмәт чәкиб һүгуги фактларла данышын, иттиһамынызы әсасландырын. Әҝәр бурада дини мәһкәмә гурмусунузса, һеч олмаса мәним иттиһамымы “Гуран”ла дүзҝүн әсасландырын. Мән “Гуран”да өзүмә гаршы һеч бир факт ҝөрмүрәм. Исламы бурда јанлыш тәблиғ едирләр”.
Чыхышында Мәһәммәд пејғәмбәрдән мисал ҝәтирән Ф.Аббасов дејиб: “Мәһәммәд пејғәмбәр өз үммәтини балалары билиб вә инсанлары бир-бириндән муғајат олмаға чағырыб. Мәни гаты исламчы, диндар адландырырсыныз. Бәс онда нијә мәни наркоманларла, ичкили адамларла, оғурлуг едәнләрлә бир јердә сахлајыр, онларла бәрабәр апарыб-ҝәтирирсиниз? Инсанлыг бу гәдәр гијмәтдән дүшүб?”
Мәһкәмә фасилә елан едиб. Фасиләдән сонра Руфулла Ахундзадәнин, Зүлфүгар Микајылзадәнин, Дәјанәт Сәмәдовун вә Фирдовси Мәммәдрзајевин чыхышлары олаҹаг.
Диггәт: Хәбәрдән истифадә етдикдә мәнбәјә истинад лазымдыр
