Әһли Бејт -АБНА- хәбәр аҝентлијинин вердији хәбәрә әсасән: Түркијә Азәрбајҹаны Исраиллә мүнасибәтләринә јенидән бахмаға чағырыр. Бакыдакы фөвгәладә вә сәлаһијјәтли сәфир Һулусы Кылыч АНС-ә мүсаһибәсиндә дејиб ки, Азәрбајҹанын Исраиллә мүнасибәтләринә јенидән бахмасыны ҝөзләјирләр: “Түркијә илә Исраил арасындакы мүнасибәтләрин ҝәрҝинләшдији бир дөврдә бизә гардаш олан Азәрбајҹан да бу өлкә илә мүнасибәтләринә јенидән бахмалыдыр. Биз һәр заман, тарих бојунҹа Азәрбајҹанын јанында олмушуг. Азәрбајҹана ҝөрә 18 илдир сәрһәдләримиз бағлыдыр. Түркијә Азәрбајҹана ҝөрә 18 илдир сәрһәдләрини бағлајырса, гардаш бир дөвләтин проблеми дә Азәрбајҹанын проблеми олмалыдыр”.
Сәфир Ҹејһандан Исраилә нефт дашындығыны хатырладараг дејиб: “Исраил бу һагда фикриләшмәлидир. Бурада бир проблем олаҹағыны нәзәрә алмалыдыр. Азәрбајҹан һөкумәти дә нә едәҹәјини билән бир һөкумәтдир. Биз Азәрбајҹана там ҝүвәнирик”.
Сәфирин чағырышына мүнасибәт билдирән Азәрбајҹанын Хариҹи Ишләр Назирлијинин мәтбуат катиби Елман Абдуллајев “Медиа форум” сајтына дејиб ки, Азәрбајҹанла Түркијә арасында дост вә гардашлыг мүнасибәтләри вар: “Бизим әлагәләримиз даими әсаслар үзәриндә гурулуб. Биз һәмишә Түркијәјә јахын вә хош мүнасибәт нүмајиш етдирмишик. Түркијә реҝионун ән бөјүк дөвләтләриндән биридир. Ејни заманда, реҝионда ҹәрәјан едән мәсәләләрә бөјүк тәсири олан өлкәдир. Инанырыг ки, Түркијә илә Исраил арасындакы һәр һансы бир мәсәлә тезликлә өз һәлини тапаҹаг”.
Азәрбајҹанын ҝүндәлијиндә Исраиллә мүнасибәтләрә јенидән бахмаг мәсәләси дурурму? ХИН рәсмиси “Медиа форум”ун бу суалына ҹаваб вермәјиб.
Һаким Јени Азәрбајҹан Партијасы иҹра катибинин мүавини, депутат Мүбариз Гурбанлы “Медиа форум”а дејиб ки, Азәрбајҹан вә Түркијә дост, мүттәфиг, стратежи тәрәфдаш олан өлкәләрдир. Онун фикринҹә, Түркијәнин Ермәнистанла сәрһәдләри 18 илдир бағлы сахламасы, Анкаранын Ирәванла дипломатик әлагәләр гурмамасы мүсбәт һалдыр: “Амма бир мәсәләни дә јадда сахламалыјыг ки, Түркијә илә Ермәнистан арасында проблемләр Дағлыг Гарабағ мүнагишәсинин мөвҹуд олмадығы заманда да вар иди. Һәлә ССРИ дөврүндә, 1945-ҹи илдә Ермәнистан ССР Түркијәјә нота верәрәк әрази иддиалары илә чыхыш етмишди. Ермәнистан Совет Иттифагынын тәркибиндә ола-ола белә бир аддым атмышды.
Ермәнистанын индики конститусијасында ачыг формада Түркијәјә әрази иддиалары ирәли сүрән мүддәалар вар. Бу өлкә гондарма “ермәни сојгырымы”ны әлдә әсас тутараг Түркијәјә гаршы ҝениш сәпкидә, чохшахәли чиркин тәблиғат кампанијасы апарыр”.
М.Гурбанлы билдириб ки, Түркијә вә Азәрбајҹанын бејнәлхалг мигјасда ортаг мараглары вар вә буну һеч кәс инкар етмир. Депутат хатырладыб ки, Түркијә Дағлыг Гарабағ проблеминин һәллиндә һәмишә Азәрбајҹана дәстәк вериб: “Биз дә Түркијәјә мүхтәлиф саһәләрдә һәмишә дәстәк вермишик. Улу өндәримиз Һејдәр Әлијев Түркијә илә мүнасибәтләри “Бир милләт - ики дөвләт” принсипи илә ифадә едиб. Президент Илһам Әлијев дә Түркијә илә мүнасибәтләрә чох бөјүк дәјәр верир, бу истигамәтдә әлагәләр давам едир”.
ЈАП иҹра катибинин мүавини билдириб ки, бу ҝүн Јахын Шәргдә мәсәләләринә ҝөрә Түркијә илә Исраил арасында ҹидди гаршыдурма јараныб вә һазырда бу гаршыдурманын һәлли јоллары ахтарылыр: “Түркијә дә, Исраил дә гаршыдурманын һәлли јолларыны арашдырыр. Һесаб едирәм ки, Түркијәнин бејнәлхалг мигјасда өз һаглы мөвгејини мүдафиә етмәк үчүн апардығы сијасәт мүәјјән нәтиҹәләр верәҹәк. Азәрбајҹанын Исраиллә мүнасибәтләри һеч дә Түркијә-Исраил әлагәләри сәвијјәсиндә олмајыб. Азәрбајҹанын Исраилдә һеч сәфирлији дә јохдур. Бизим мүнасибәтләримизлә Түркијә-Исраил әлагәләрини мүгајисә етсәк ҝөрәрик ки, Анкара-Тел-Әвив мүнасибәтләри бизимкиндән даһа дәриндир, јүксәкдә дајаныр. Амма инди ики өлкә арасында проблемләр јараныб. Ола биләр ки, проблем гыса заманда чөзүлсүн.
Азәрбајҹан Түркијә илә һәмрәјлик нүмајиш етдириб Исраиллә әлагәләринә јенидән бахараг һансыса аддымлар атса, Түркијә-Исраил мүнасибәтләри дүзәлдикдән сонра рәсми Бакы нә етмәлидир? Бу бизим хариҹи сијасәтимиздә проблемләр јарада биләр. Биз ҝәрәк буну ҝөз өнүнә алаг. Биз Түркијә илә дост өлкәјик, һәмрәјлик нүмајиш етдиририк. Амма бу мәсәләләрлә бағлы сәфир Һулуси Кылычын сөјләдији фикирләр бүтөвлүкдә үмуми марагларымызла узлаша билмәз. Һесаб едирәм ки, бу ҹүр јанашма, мәсләһәт вермә сәпкисиндә чыхыш етмәк Түркијә илә Азәрбајҹан арасында мүнасибәтләр фонунда о гәдәр дә мәгбул дејил. Азәрбајҹан Түркијә илә достлуғуна сәдагәтини һәмишә ҝөстәриб вә бундан сонра да белә олаҹаг”.
М.Гурбанлы билдириб ки, Түркијә бөлҝәдә ҝүҹлү дөвләтдир вә Исраиллә проблемләри һәлл етмәк игтидарындадыр: “Түркијәни һансыса хариҹи тәһлүкә тәһдид етмир, сијаси, игтисади мараглары тәһлүкә алтында дејил. Ејни заманда, Түркијәнин Исраиллә гаршыдурмасы бизим әмәкдашлыг разылашмаларымыз фонунда јаранмајыб”.
Диггәт: Хәбәрдән истифадә етдикдә мәнбәјә истинад лазымдыр
