Әһли Бејт -АБНА- хәбәр аҝентлијинин вердији хәбәрә әсасән:
Чохлары иддиа едирди ки, Азәрбајҹан һөкумәтинин Иран вә Түркијә илә сојуг мүнасибәти бу ики гардаш өлкәнин Ермәнистанла әлагәләринә ҝөрәдир. Чохлары сүбут етмәјә чалышырды ки, Әлијевин Исламла проблеми јохдур, ону нараһат едән гоншу өлкәләрдән өтүрүлән фундаментализмдир. Чохлары јахасыны ҹырырды ки, үмумијјәтлә Илһам Әлијевин өлкәдә диндарларын башына ачылан ојундан, наркотика вә силаһла шәрләмәләрдән хәбәри јохдур. Амма… Амма јени сәнәд бир даһа сүбут етди ки, Түркијә вә Иранла сојуг мүнасибәтләр Әлијевин Ислама дүшмән бахышындан гајнагланыр. Сәнәдин бир һиссәсини тәгдим едирик:WикиЛеакс сајты әлә кечирдији Америка мәхфи дипломатик телеграмларыны бу дәфә ҝөрүнмәмиш һәҹмдә јајараг јенидән дүнјанын диггәтини ҹәлб едиб. Сәнәдләрдән ајдын олур ки, АБШ Радиојајымлар Шурасы Әли Һәсәнову јанварын 23-ү-февралын 2-и арасы Вашингтона дәвәт едиб. Ә.Һәсәнов исә ҹаваб вериб ки, бу мәсәлә илә бағлы әввәлҹә Милли Телерадио Шурасынын рәһбәрлији илә данышмалыдыр. Илһам Әлијев исә дејиб ки, Һәсәновла бу данышыгларын тезликлә башланмасыны бир даһа мүзакирә едәҹәк. Әлијев сонра Брајзанын мәсәләјә јанашма методуну алгышладығыны дејиб, билдириб ки, бу јанашма Азәрбајҹана Русија вә Иранын өлкә әразисиндә јајымлар тәшкил етмәсинә гаршы чыхмаг үчүн јахшы әсас верә биләр.
Телеграмда дејилдијинә ҝөрә, президент шикајәтләниб ки, Русија вә Иран өз радиојајымлары васитәсилә Азәрбајҹанда сијаси сабитлији позмаг истәјир вә дини екстремизми јајыр… И.Әлијев Түркијәдәки АКП һөкумәтинин сијасәтиндән дә наразылыг билдириб. Дејиб ки, Түркијә һөкумәти сијаси Ислама доғру ҝедир вә дүнјәви демократијадан узагдыр. Әлијев билдириб ки, Әрдоғанын Гәзза мәсәләси илә бағлы Исраилә кәскин һүҹумларыны анлаја билмир, һансы ки, Мисир, Сәудијјә Әрәбистаны вә Иорданија сәсини чыхармыр. Әлијев гејд едиб ки, Түркијә Фәләстиндә әсасән Ирана бағлы гүввәләри мүдафиә едир, ҺӘМАС-а мејл ҝөстәрир: “Бу, Түркијәнин Исраиллә гурдуғу бүтүн мүнасибәтләри дағыдаҹаг, о ҹүмләдән игтисади, һәрби, кәшфијјат саһәсиндә мүнасибәтләри. Түркијәнин бу мөвгеји бизим онунла ваһид хариҹи сијасәт апармағымызы да чәтинләшдирир”.
Түркијә һөкумәтинин сијаси ислама јөнәлмәсиндән нараһатлыгларыны әтрафлы ифадә едән И.Әлијев М.Брајзаја дејиб ки, әслиндә Азәрбајҹан телеканалларындан түрк сериалларынын јығышдырылмасы һеч дә онларын Азәрбајҹан дилинә тәрҹүмәси илә бағлы дејилди (Милли Телерадио Шурасы сериалларын јығышдырылмасыны рәсмән бунунла изаһ едиб). И.Әлијев билдириб ки, бу сериалларын јығышдырылмасынын әсл сәбәби онларын гадынлары һиҹабда ҝөстәрмәсидир. Бу, Азәрбајҹана да тәсир едә биләр: “Биз ҝөрәндә ки, иранлылар өз гадынларыны өртүр, буна ҝүлүрүк, лакин бурада инсанлар Түркијәдә дә гадынларын өртүндүјүнү ҝөрәндә буна даһа ҹидди јанашыр”.
Телеграмда даһа сонра дејилир: “Президент ону да билдирди ки, јерли телевизија апарыҹыларына “гејри-рәсми хаһишлә” мүраҹиәт едәрәк бир даһа һиҹаблы гадынлар ҝөстәрмәмәји хаһиш едиб. О дејиб ки, бу ҹүр гадынлар һагда һеч бир мәнфи фикирдә дејил, лакин истәмир ки, беләләри телевизијада ҝөрүнсүн. (Шәрһ: сәфирлик телеканалларда бу ҹүр дәјишиклик мүшаһидә етмир). Нәһајәт, президент деди ки, онун һөкумәти Азәрбајҹан әразисиндә Түркијәдән малијјәләшән дини фундаменталист груплашма ашкар едиб. Групун ады “Икрамлар”дыр вә онлар Азәрбајҹанын һәрби вә полис академијаларына сызмаға ҹәһд едәркән һәбс олунублар. Президент деди ки, бу групун үзвләринин дини ритуалда иштирак едәркән чәкилмиш видеосуну шәхсән изләјиб: “Онлар һејвана бәнзәјирди”.
Әрдоған бу груп үзвләринин азадлыға бурахылмасыны хаһиш едәндә Әлијев өз адамларыны, чох ҝүман ки, МТН әмәкдашларыны Түркијәјә ҝөндәриб вә һәмин видеонун сурәтини Әрдоғана ҝөстәриб. “Биз Ирандан буну ҝөзләјирдик, Түркијәдән јох” - дејә Әлијев ҝилејләниб".
Диггәт: Хәбәрдән истифадә етдикдә мәнбәјә истинад лазымдыр
