Әһли Бејт -АБНА- хәбәр аҝентлијинин вердији хәбәрә әсасән: АТВ телеканалында јајымланан “Таныдым сәни” лајиһәсинин Масаллы рајонунда баш тутан чәкилишләри заманы програмын апарыҹысы Заур Бахшәлијев вә мүнсифләр һејәтиндә тәмсил олунан естрада улдузу Фаиг Ағајевин дөјүлмәси барәдә јени мәлуматлар алмышыг.
Мәлуматларда дејилир ки, инсидент һәмин ҝүн Ағдамын ишғалы ҝүнү олмасы үзүндән баш вериб. Масаллы сакинләри белә бир ҝүндә рајонда шоу тәшкил едилмәсини наразылыгла гаршылајыб. Фаиг Ағајевин мүһафизәчисинин өвладыны јарышмаја ҝәтирән сакинләрдән биринә кобудлуг етмәси исә наразылары даһа да һиддәтләндириб. Беләликлә дә, гаршыдурма јараныб. Хатырладаг ки, бу инсидент нәтиҹәсиндә Заур Бахшәлијевлә Фаиг Ағајевин дөјүлдүјү, икинҹинин мүһафизәчисинин бычагландығы билдирилирди. Лакин “Азадлыг”а дахил олан хәбәрләрдә бычаглама факты тәсдигини тапмајыб.
Мәлуматда, һәмчинин билдирилир ки, инсидентә ҝөрә 30 нәфәр полис тәрәфиндән сахланылыб. Онлардан 26 нәфәри “хәбәрдарлыг” едилмәклә сәрбәст бурахылыб. 4 нәфәрә ҝәлинҹә, гәзетимиз чапа ҝедән ана гәдәр онлар полис шөбәсиндә сахланылыб. Дүнән ҝүн әрзиндә Масаллы полиси илә әлагә сахлајараг сахланылан шәхсләрлә бағлы мәлумат алмаг истәсәк дә, сәјләримиз нәтиҹә вермәди.
Фаиг Ағајев исә “Тренд”ә ачыгламасында јајылан хәбәрләрин јалан олдуғуну иддиа едиб: “Јајылан бу хәбәр бүтүнлүклә јалан вә ҹәфәнҝијатдыр. Һәгигәтә һеч бир јахынлығы јохдур. Верилиш јахын ҝүнләрдә ефирдә дә нүмајиш олунаҹаг. Вә бу ағ јаланы јајан инсанларын лап ағыны чыхардыгларынын шаһиди олаҹагсыныз”.
Диггәт: Хәбәрдән истифадә етдикдә мәнбәјә истинад лазымдыр
