Әһли Бејт -АБНА- хәбәр аҝентлијинин вердији хәбәрә әсасән: Ислам Ингилабынын Али Мәгамлы Рәһбәри Һәзрәт Ајәтуллаһ Хаменеи Ислам Ингилабы Кешикчиләри Корпусунун (Сепаһын) команданлары вә Вәли-фәгиһин Корпус үзрә Нүмајәндәлијинин рәсмиләри илә буҝүнкү ҝөрүшүндә гејд етди ки, Ислам Ингилабынын һәгиги кешикчиси олмаг Ислам дөвләтинин мүәјјән едилмиш уҹа амаллара доғру мүтәрәгги, сүрәтли, оптимист вә ингилаби һәрәкатыны горумагдыр. Али Мәгамлы Рәһбәр вурғулады: “Ислам Ингилабынын ирәлијә доғру тәкамүл һәрәкатыны давам етдирмәк үчүн мүһүм вә зәрури олан мәгамлардан бири ҹәмијјәтә ихтилаф, сәс-күј, мүбаһисә атмосфери ашыламагдан, бу кими һаллары көрүкләмәкдән чәкинмәкдир. Бүтүн структурлар, идеоложи вә сијаси ҹәрәјанлар вәһдәтин горунмасында әмәли сурәтдә мараглы олмалыдыр”.
Шәбан ајынын 3-ү – Ислам дининин кешикчиси Һәзрәт Сејидүш-шүһәда Һүсејнин (ә) әзәмәтли доғум ҝүнү вә бу мүнасибәтлә өлкәдә гејд олунан Ингилаб кешикчиләри ҝүнү әрәфәсиндә баш тутан ҝөрүш заманы Һәзрәт Ајәтуллаһ Хаменеи иштиракчылары шәбан ҝүнләри, өзәлликлә дә 3 шәбанла әлагәдар тәбрик едәрәк гејд етди ки, Һәзрәт Имам Һүсејнин (ә) доғум ҝүнүнүн Кешикчиләр ҝүнү кими бајрам едилмәси дәрин мәна јүкү дашыјан, истигамәтләндириҹи бир тәшәббүсдүр. Али Мәгамлы Рәһбәр әлавә етди: “Исламын кешијиндә дурмағын һәгиги мәнасы – өзүнүн бүтүн аспектләри илә – Һәзрәт Әба-Әбдиллаһын (ә) 10 иллик имамәти дөврүндә ҝерчәкләшди. Буна ҝөрә дә о һәзрәтин имамәт дөврүндәки рәфтар вә давранышлары илә таныш олмағымыз Исламын кешијиндә дурмағын әсл принсип вә мејарларыны мүәјјәнләшдирмәјимизә имкан верир”.
Һәзрәт Сејидүш-шүһәданын (ә) 10 иллик имамәт дөврүнү ҝениш сурәтдә ачыглајан Али Мәгамлы Рәһбәр һәзрәтин давранышларынын ана хәттини тәшкил едән ән мүһүм мәгамлара тохунду, о ҹүмләдән имамын инсанлара зәрури хәбәрдарлыглар етмәси, тәблиғат апармасы, елитаны тәмсил едән шәхсләри мөвҹуд вәзијјәт һаггында мәлуматландырмасы, бунунла да онлары мәнәви-психоложи ҹәһәтдән һазырламасы, дөврүн сон дәрәҹә тәһлүкәли, јанлыш тенденсијасына гаршы һәјаты баһасына мүбаризә апарыб мүҹаһидә нүмајиш етдирмәси, даим Исламын ҝөстәришләринә ујғун давранмасы һагда данышды. О деди: “Имам Һүсејнин (ә) чохаспектли һәрәкаты вә фәдакарлығы, хүсусилә дә һәзрәтин аиләсинин үзләшдији фаҹиә бу һәрәкатын тарихдә галмасына, Исламы вә дәјәрләри горујуб сахламасына сәбәб олуб”.
Диггәт: Хәбәрдән истифадә етдикдә мәнбәјә истинад лазымдыр
