Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Инзибати Хәталар Мәҹәлләсинә дәјишиклик едилиб. Мәлуматына ҝөрә, парламентин бу ҝүн кечирилән иҹласында дәјишиклик лајиһәси барәдә Һүгуг сијасәти вә дөвләт гуруҹулуғу Комитәсинин сәдри Әли Һүсејнли мәлумат вериб. Лајиһәјә әсасән, әҹнәбиләр вә вәтәндашлығы олмајан шәхсләрин Азәрбајҹан әразисиндә олма, јашама вә ја транзит кечмә гајдаларыны позмасы, буна һүгуг верән сәнәдләр олмадан, һабелә гејдијјатсыз, етибарсыз сәнәдләрлә јашамасы, ҝәлишинин бәјан едилмиш мәгсәдинә ујғун олмајан фәалијјәтлә мәшғул олмасы, ишә дүзәләркән ганунвериҹиликдә мүәјјән олунмуш гајдаларыны позмасы, бир јердән башга јерә ҝетмә вә јашајыш јери сечмә үчүн ганунвериҹиликдә мүәјјән олунмуш гајдаја әмәл етмәмәси, галма мүддәти гуртардыгдан сонра ҝетмәкдән бојун гачырмасы ганунвериҹилијин позулмасы һесаб олунаҹаг. Өлкә әразисиндән транзитлә кечмә гајдаларына әмәл етмәмәсинә ҝөрә, әҹнәбиләр вә вәтәндашлығы олмајан шәхсләр Азәрбајҹан һүдудларындан кәнара инзибати гајдада чыхарылмагла вә ја чыхарылмамагла 300 манатдан 400 манатадәк ҹәримә едиләҹәкләр.
Әҹнәбиләри Азәрбајҹана дәвәт етмиш вә онлара јашајыш саһәси вермиш Азәрбајҹан вәтәндашлары вә ја өлкәдә даими јашајан әҹнәбиләр һәмин шәхсләрин мүвәггәти олма мүддәти битдикдән сонра мүәјјән олунмуш гајдада вахтында өлкә әразисиндән чыхмасынын тәмин едилмәси үчүн тәдбир ҝөрүлмәмәсинә ҝөрә 300 манатдан 400 манатадәк ҹәримә олунаҹаг.
Азәрбајҹанда әҹнәбиләри вә ја вәтәндашлығы олмајан шәхсләри гәбул едән, онлара хидмәт ҝөстәрилмәсини вә ја онларын ишә гәбул олунмасыны тәмин едән, онларын өлкә әразисиндә олмасы, јашамасы вә ја Азәрбајҹан әразисиндән транзитлә кечмәси шәртләринә әмәл едилмәси илә әлагәдар вәзифәләри јеринә јетирән мүәссисә, идарә вә ја тәшкилатларын вәзифәли шәхсләри тәрәфиндән әҹнәбиләрин вә ја вәтәндашлығы олмајан шәхсләрин гејдијјата алынмасынын вә гејдијјатдан чыхарылмасынын, онлара Азәрбајҹанда олма вә ја јашама һүгугу верән сәнәдләрин рәсмиләшдирилмәсинин мүәјјән едилмиш гајдада позулмасына ҝөрә, вәзифәли шәхсләр 300 манатдан 500 манатадәк ҹәримә едиләҹәк.
Әли Һүсејнли һәмчинин билдириб ки, Мәҹәлләјә едилмиш әлавәјә әсасән ишәҝөтүрән тәрәфиндән ганунвериҹилијин тәләбләри позулмагла фәрди иҹазә алынмадан әҹнәбинин вә ја вәтәндашлығы олмајан шәхсин ишә ҹәлб едилмәсинә ҝөрә вәзифәли шәхсләр 3 мин манатдан 5 мин манатадәк мигдарда, һүгуги шәхсләр исә 30 мин манатдан 35 мин манатадәк ҹәримә олунаҹаглар. Дәјишикликләр мүзакирәләрдән сонра тәсдигләниб.
Диггәт: Хәбәрдән истифадә етдикдә мәнбәјә истинад лазымдыр
