Әһли Бејт -АБНА- хәбәр аҝентлијинин вердији хәбәрә әсасән: Бу илин әввәлиндән өлкәдә чохлу сајда диндар һәбсә атылыб. Онларын бир гисми һиҹаб гадағасына етираз олараг кечирилән аксијаларда, галанлары исә мүхтәлиф вахтларда фәргли шәраитләрдә сахланылыблар.
О ҹүмләдән мајын 6-да Бакыда, Тәһсил Назирлијинин бинасы гаршысында кечирилән “һиҹаб аксијасы”нда араларында руһаниләрин дә олдуғу чохлу сајда диндар сахланылыб. Онлардан бир чохуна ҝүнлүк һәбс верилиб, бир һиссәсинә исә ҹинајәт иши ачылыб.
Гејри-рәсми мәлумата ҝөрә, индијәдәк 15 нәфәрдән чох шәхсә ҹинајәт иши галдырылыб. Бундан башга даһа әввәл Ҝәнҹәдә ики руһани һәбс олунуб, онлара хулиганлыг иттиһамы илә һәбс ҹәзасы верилиб. Ејни заманда Азәрбајҹан Ислам партијасынын бир груп үзвү һәбс олунуб, һансылар ки, бир чоху руһани олуб.
Анҹаг нәдәнсә Азәрбајҹанын рәсми (артыг белә ҝөрүнүр) дини гуруму олан Гафгаз Мүсәлманлары Идарәси (ГМИ) һәбс олунан диндарларын иши илә марагланмыр, онларын азадлыға бурахылмасы илә бағлы мүраҹиәт етмир. Һәр һалда мәтбуата бу барәдә мәлумат верилмир. Доғрудур, илин әввәлиндә Ислам Партијасынын сәдри вә үзвләри сахланыланда ГМИ бу барәдә ачыглама илә чыхыш едәрәк АИП рәһбәрлијини дөвләт әлејһинә чыхыш еләмәкдә гынамышды. Анҹаг АИП үзвләриндән фәргли олараг диҝәр сахланыланлар һеч бир сијаси фәалијјәтлә мәшғул олмајыблар. Бу инсанларын јеҝанә “ҝүнаһы” өлкәдә шаҝирдләрин мәктәбә һиҹабла ҝетмәсинә гојулан гадағаја етираз етмәк олуб. Бу исә сырф инсан һаглары вә дин азадлығы мәсәләсидир. Јәни бу инсанларын өлкәнин руһани рәһбәрлијиндән дәстәк алмаг һаглары вар.
Анҹаг ГМИ рәһбәрлији һәлә тәләсмир. Идарәнин мәтбуат катиби Рәһимә Дадашова һәбсдә оланларын диндар олдуглары үчүн дејил, ганунлары позмагда иттиһам олундугларыны деди. Бу сәбәбдән идарә сөзчүсү һәбс олунан диндарларын мүдафиәси илә бағлы һәр һансы мүраҹиәтин олмадығыны билдирди: “О инсанлар диндар олдуглары үчүн сахланылмајыблар. Ҝөрүнүр, һансыса ҹинајәт әмәлиндә иттиһам олунурлар. Онларла бағлы һәр һансы мүраҹиәтин олуб-олмадығыны дејә билмәрәм”.
Диггәт: Хәбәрдән истифадә етдикдә мәнбәјә истинад лазымдыр
