Әһли Бејт -АБНА- хәбәр аҝентлијинин вердији хәбәрә әсасән: Вәкилин Елчин Намазов сөзләринә ҝөрә, өлүм аҹлығына башлајан һәр ики руһани Ҝәнҹә шәһәринин Низами рајонунун мәһкәмәсиндән наразыдырлар.
Вәкил бу һагда дејиб: "Азәр Ҹәбијев барәдә мәһкәмә просесинә һаким Абдулла Исҝәндәров, Фәхри Илјасов барәдә исә һаким Ҝүндүз Шүкүров сәдрлик едиб.
Һәр ики руһани барәдә мәһкәмә ганунсузлуг шәраитиндә кечирилиб. Мәһкәмәдә зәрәрчәкмишләр истинтага вердикләри ифадәләрдән фәргли олараг данышыблар. Мәлум олур ки, онларын һеч бири зәрәрчәкмиш кими гәбул едилә билмәзләр. Белә ки, онлар өзләри етираф едирләр ки, руһаниләр онлара гаршы һеч бир ганунсуз һәрәкәт етмәјибләр. Белә ифадә вермәкләринә бахмајараг, һаким онларын зәрәрчәкмиш статусуна хитам вермир. Бундан башга тәрәфимиздән верилән һеч бир вәсатәтләр тәмин едилмир. Сындырылдығы дејилән аваданлыгларын үзәриндә руһаниләрин әл изләринин олуб-олмамасынын мүәјјән едилмәси үчүн експертизанын кечирилмәмәси, руһаниләрин Ҝүрҹүстан сәрһәдиндә һансы әсасла вә ким тәрәфиндән сахланылмасынын мүәјјән едилмәмәси, онларын март ајынын 16-дан тәҹридханада мәһкәмәнин гәрары олмадан сахланылмасы, һәбс гәти имкан тәдбиринин дәјишдирилмәси, ҝиров мүгабилиндә азадлыға бурахылмалары, мәһкәмә просесинин аудио лентә јазмаг истәјимиз вә диҝәр мәсәләләр барәдә вәсатәтләримиз тәмин олунмајыб. Һакимләрә вә мәһкәмә тәркибинә вердијимиз етиразлар әсассыз олараг рәдд едилир".
Вәкил вәсатәтләрин рәдд едилмәсини иттиһамда ҝөстәрилән ҹинајәтләрин гондарма вә полис гурмасы олмасы илә әлагәләндирәрәк бүтүн бу ганунсузлуға ҝөрә һәр ики руһанинин өлүм аҹлығына башладығыны билдириб.
Елчин Намазовун сөзләринә ҝөрә, һәр ики руһани бу гондарма иттиһамлары рәдд едәрәк бу һәбсин архасында онларын һиҹаб гадағасына етираз етдикләри олдуғуну өнә чәкибләр.
Руһаниләрдән биринин вәзијјәтинин ағырлашдығыны өнә чәкән руһаниләрин вәкили дејиб: "Бу ҝүн онларын сахландығы 2 сајли истинтаг тәҹридханасына мүраҹиәт едәҹәм. Азәр Ҹәбијевин сәһһәти кәскин писләшиб".
Елчин Намазов сонда бу әдаләтсизлијә ҝөрә, өлкә президентинә мүраҹиәт едәҹәјини дә өнә чәкәрәк дејиб: "Онларын һәбси барәдә верилмиш сифариш јумшалмаса мәһкәмәләрин әдаләтли гәрар вермәјәҹәјини билирик. Она ҝөрә дә президентә мүраҹиәт едәҹәм. Ҹәфәнҝијјат долу иттиһамла дәјәрли вәтәндашларын һәбс етдирилмәси гануна сығмадығы кими, шәрәф вә виҹдандан да узаг аддымдыр. Онлара гаршы бу әдаләтсизлијә сон гојулмалыдыр".
Гејд едәк ки, һәбсдән әввәл бу руһаниләр Полис рәисинин һәдәфиндә олуб. Һәтта Азәр Ҹәбијев өтән илин сентјабр ајында Ҝәнҹә шәһәриндән сүрҝүн едилмишди.
Диггәт: Хәбәрдән истифадә етдикдә мәнбәјә истинад лазымдыр
