Әһли Бејт -АБНА- хәбәр аҝентлијинин вердији хәбәрә әсасән: Ајәтуллаһ Сејид Әли Хаменеи Ливија вә Бәһрејндә баш верән һадисәләрә дә тохунуб. Ҹәнаб Хаменеи дејиб:
"Биз Ливија һакимијјәтинин тутдуғу јолу, јәни ҝүнаһсыз инсанларын гәтлә јетирилмәсини, мүлки вәтәндашларын јерләшдији шәһәрләрин бомбаланмасыны гәтијјәтлә писләјирик. Халгла бу сајаг рәфтар һеч вәҹһлә гәбул едиләси дејил. Амма ејни заманда Гәрб вә Американын да Ливијаја дахил олмасыны јанлыш аддым һесаб едирик.
Америка вә Гәрб Ливија халгыны мүдафиә етмәк нијјәтиндә дејил. Онлар јалныз Ливијанын нефти барәдә дүшүнүрләр. Онлар иддиа едирләр ки, Ливија халгыны мүдафиә етмәк үчүн Ливијаја дахил олмаг истәјирләр. Амма онларын бу иддиасы һеч дә гәбул едиләси дејил. АБШ вә Гәрб әҝәр һәгигәтән дә Ливија халгыны мүдафиә етмәк нијјәтиндә олсајды, архада гојдуғумуз бир ајда Ливија халгына көмәк едәрдиләр. Онлар ән азы едә биләрдиләр ки, бомбаларла һәдәфә алынан Ливија халгына силаһ ҝөндәрсинләр. Амма бүтүн дүнја шаһид олду ки, АБШ вә Гәрб бир ај Ливија халгынын гәтлиамына кәнардан тамаша етди. Беләликлә мәлум олур ки, онлар Ливија халгыны мүдафиә етмәк ардынҹа дејилләр."
Ингилаб рәһбәри һәмчинин Бәһрејндә баш верәнләрә ишарә илә дејиб:
"Бу ҝүн Бәһрејндә баш верән һадисәләри Гәрб, хүсуси илә Америка сүнни вә шиәләр арасында баш верән бир гаршыдурма кими дәјәрләндирир. Мән бу мәсәлә илә бағлы хош нијјәтли инсанлара демәк истәјирәм ки, Бәһрејндә баш верән һадисәләри сүнни-шиә проблеми кими дәјәрләндирмәјин. Чүнки бу Америкаја хидмәт етмәкдир."
Диггәт: Хәбәрдән истифадә етдикдә мәнбәјә истинад лазымдыр
