Әһли Бејт -АБНА- хәбәр аҝентлијинин вердији хәбәрә әсасән: Дүз бир ил бундан өнҹә феврал ајынын 13-ү динҹ инанҹлы инсанлар бөјүк Ислам пејғәмбәри Һәзрәти Мәһәммәд (с) вә Имам Һәсән (ә)-ын шәһадәт ҝүнү, шәһидләр хијабанында ујумуш шәһидләримизи зијарәт етмәк мәгсәдилә әлләриндә ҝүл чәләнҝи илә зијарәтә ҝедирдиләр. Онларын мәгсәди јалныз зијарәт иди. Анҹаг буна ҝөрә онлары һансы ҹәза ҝөзләјәҹәкләриндән јәгин ки, хәбәрсиз идиләр. Чүнки бу инсанлар һамысы касыб балалары иди вә бәлкә дә чөрәк пулуна ҝөрә чох заман һеч телевизора да бахмаға вахт тапа билмирдиләр. Бу сәбәбдән адлары Елмар, Елчин, Сејнур, Ағаәли вә Билал олан бу шәхсләрин чоху Азәрбајҹанын јазылмајан ганунларындан хәбәрсиз иди. Онларын һеч ағылларына да ҝәлмәзди ки, вәтән уғрунда өлмәз шәһидләримизи зијарәт етмәк үчүн зопа илә әзишдирилиб, сонра да һәбсә атылаҹаглар. Һадисәләрин сонлуғу бу олду, 5 нәфәр һәбсә дүшдү.
Бу һадисәләрдә азәрбајҹанлылара баша салынды ки, өлкәмизин јазылмајан ганунлары, јазылы ганунларындан даһа чох вә даһа дәгиг ишләјир. Бәлкә дә өз шәһидләринә һөрмәт едән һәр һансы бир өлкә дә белә шејә раст ҝәлмәк олмазды, амма мүсәлман өлкәси олан Азәрбајҹанда бу баш вериб. Сон заманлар халг арасында белә сөз ҝәзир ки: Бура Азәрбајҹандыр!. Бу сөз нә гәдәр сәһв вә тәһгиредиҹи олса да, һәгигәтдә индики дурумда Азәрбајҹанын инсан һаглары саһәсиндә дүнја реаллығындан нә дәрәҹәдә узаг олмасы һеч кәсә гаранлыг дејил. Мәсәләјә бир аз диггәт јетирдикдә ҝөрүрүк ки, белә бир һадисә тәкҹә инанҹлы инсанлара гаршы һәјата кечирилиб. Башгаларына гаршы исә нисбәтән өтәри зоракылыгла өтүшүбләр. Бу да ону демәјә әсас верир ки, һакимијјәт Ислама вә исламчылара гаршы әмәлли башлы ҝизли мүһарибә елан едиб. Белә бир мүһарибәнин исә хариҹи гүввәләрин сифариши вә јахуд һакимијјәтин коммунист-атеист тәфәккүрлү үнсүрләри тәрәфиндән һәјата кечмәси еһтимал олунур.
Һәр-һалда Азәрбајҹан реаллығында вәтәндашлара гаршы белә амансыз давранышлар ҝүнү-ҝүндән өлкәнин гаранлыг мүһитини бир азда писләшдирир. Белә бир һәдисә раст ҝәлмишдим; О һәдисдә дејилирки: Күфрлә һакимијјәт етмәк олар, амма зүлмлә јох. Имам Әли (ә)-дан башга бир һәдисдә белә бујурулур ки: Нә чох ибрәтләр вар, анҹаг ибрәт аланлар аздыр. Дүнја тарихинә баханда даима һакимијјәтләрин өз күрсү уғрунда неҹә амансыз мүҹадилә апардығынын шаһиди олуруг. Мән онларын һеч адыны чәкмәји белә истәмәздим. Чүнки онлар инсанлара јалныз гаранлыг вә зүлмәт ҝәтириб. Анҹаг уҹа јараданын онларын неҹә сәсләрини кәсиб, арзуларыны пуча чыхарыб, силкәләдикләри бармаглары торпаглар алтына салмасынын да шаһиди олмушуг.
Гејд едәк ки, 2010-ҹу ил февралын 13-дә Мәһәммәд Пејғәмбәрин (с) вәфаты илә әлагәдар “Һаҹы Султанәли” мәсҹидиндә әзадарлыг кечирәндән сонра Хоҹалы фәҹиәсинин илдөнүмү әрәфәсиндә Шәһидләр Хијабаныны зијарәт етмәк истәркән полис зоракылығы илә үзләшән 5 нәфәр диндар - Елмар Сәмәдов, Елчин Аббасов, Сејнур Һүсејнов, Ағаәли Јәһјајев вә Билал Әһмәдов, сонрадан Јасамал Рајон Мәһкәмәсинин гәрарыилә үмумиликдә 21 ил јарым мүддәтинә азадлыгдан мәһруб едилибләр. Дәгиг десәк, кечән ил август ајынын 3-дә Јасамал Рајон Мәһкәмәсиндә Һаким Елчин Гурбановун сәдрлији илә кечирилән просесдә, Елчин Аббасов вә Сејнур Һүсејнова 4 ил, Елмар Сәмәдов, Ағәли Јәһјајев вә Билал Әһмәдова исә 4 ил 6 ај һәбс ҹәзасы верилиб.
Диггәт: Хәбәрдән истифадә етдикдә мәбәјә истинад лазымдыр
