Әһли Бејт -АБНА- хәбәр аҝентлијинин вердији хәбәрә әсасән: Гафгаз Мүсәлманлары Идарәсинин сәдри шејхүлислам Аллаһшүкүр Пашазадә сон вахтлар бәзи мәктәбләрдә јар алан һиҹаб мәсәләсилә бағлы мөвгејини билдириб: “Һиҹаб мәсәләси мүзакирә објекти дејил, бу, Аллаһын әмридир вә она әмәл олунмалыдыр”.
Шејхүлислам А.Пашазадә һиҹабын динин атрибутларындан бири олдуғуна диггәт чәкәрәк, буна әмәл олунмасынын ваҹиблијини сөјләјиб. Онун ҝејилмәсинә ҝәлдикдә, Шејхүлислам һиҹабын мәктәб формасы илә узлашмасына диггәт чәкмишдир: “Һиҹабын олуб-олмамасы јох, онун һансы шәкилдә олмасы мүзакирә едилә биләр”, - дејә ГМИ сәдри билдириб. А.Пашазадә ана вә нәнәләрин баш өртүсүндә олмасы әнәнәсини хатырладараг, баш өртүсүнүн һәм дә милли бир әнәнә олдуғуну өнә чәкиб.
Һазырда бу проблемин бүтүн тәһсил системиндә јох, бәзи орта мәктәбләрдә јашанмасына тохунан шејхүлислам бу мәсәләнин бу мәктәбләрдә дә мүсбәт һәллини тапаҹағына үмидвар олдуғуну ифадә едиб.
Шејхүлисламын фикринҹә, һиҹаб киминсә инанҹлы, киминсә инанҹыз олмасынын ҝөстәриҹиси дејил, садәҹә олараг фәрд олараг инсанын белә ҝөрүнмәк истәмәсинин тәзаһүрүдүр. Шејх, һиҹабын дөвләт ганунлары илә дәстәкләндијинә дә вурғу едәрәк, ганунларымызын буну тәмин етмәсинә диггәт чәкди: “Бу, бир инсан һаггыдыр вә белә ҝөрүнмәклә өзүнү раһат һисс едирсә, буна мане олмаг лазым дејил”, дејә А.Пашазадә гејд едиб.
Диггәт: Хәбәрдән истифадә етдикдә мәнбәјә истинад лазымдыр
