Әһли Бејт -АБНА- хәбәр аҝентлијинин вердији хәбәрә әсасән: Азәрбајҹанда даһа бир террорист вәһһаби дәстәсинин мәһкәмә просеси давам етдирилиб. Мүттәһимләр Франса вә Австрија вәтәндашлары Рамзан Тершијев, Сухраб Мержујев, Хасан Халдыхаројев, Түркијә вәтәндашы Илһан Ташбеј вә Азәрбајҹан вәтәндашы Рамиз Мирзәјевдир.
2009-ҹу ил ијулун 16-да Азәрбајҹан Дөвләт Сәрһәд Хидмәтинин Загатала Сәрһәд Дәстәсинин хидмәти әразисиндә, Азәрбајҹанын Русија илә Ҝүрҹүстан дөвләт сәрһәди јахынлығында сәјјар сәрһәд хидмәти тәшкил етмиш сәрһәд нарјады тәрәфиндән 6-7 нәфәр намәлум шәхсдән ибарәт мүтәшәккил силаһлы дәстәнин Азәрбајҹан дөвләт сәрһәдини ганунсуз позмаг ҹәһдинин гаршысы алынаркән мүтәшәккил силаһлы дәстәнин үзвләри тәрәфиндән сәрһәд нарјадына гаршы одлу силаһ тәтбиг едилиб. Нәтиҹәдә сәрһәд нарјадынын үзвү, әсҝәр Исајев Бәһруз Әсҝәр оғлу јараланыб. Ҹаваб атәши илә дәстә үзвләриндән бири өлдүрүлүб, диҝәри исә јараланыб. Силаһлы дәстәнин үзвләри һаванын гаранлыг, әразинин дағлыг вә мешәлик олмасындан истифадә едәрәк һадисә јериндән гачыблар. Өлдүрүлән силаһлынын үзәриндән Австрија дөвләтинин вәтәндашына мәхсус шәхсијјәти тәсдиг едән сәнәд тапылыб. Һәмин сәнәддә онун ады Салман Умдајев кими гејд едилиб.
Һадисәдән бир нечә ҝүн сонра исә ганунсуз силаһлы груплашманын үзвләри һәбс едилиб. Өлдүрүлән вә тутулан силаһлылар радикал дини груплашманын үзвү олублар.
Мүтәшәккил дәстәнин мәгсәди Панкиси дәрәсинә ҝетмәк олуб.
Тәгсирләндирилән шәхсләр Азәрбајҹан Республикасы Ҹинајәт Мәҹәлләсинин 29, 120.2.1-ҹи (. бир груп шәхс, габагҹадан әлбир олан бир груп шәхс, мүтәшәккил дәстә вә ја ҹинајәткар бирлик (тәшкилат) тәрәфиндән адам өлдүрмәјә ҹәһд), 29.120.2.3-ҹү (зәрәрчәкмиш шәхсин хидмәти вәзифәсини вә ја иҹтимаи борҹуну јеринә јетирмәси илә әлагәдар онун өзүнү вә ја јахын гоһумларыны өлдүрмәјә ҹәһд), 120.2.4-ҹү (хүсуси амансызлыгла вә ја үмүми тәһлүкәли үсулла адам өлдүрмәјә ҹәһд), 228-ҹи (ганунсуз олараг одлу силаһ ҝәздирмә) вә 318-ҹи (дөвләт сәрһәдини ганунсуз кечмә) маддәләри илә иттиһам олунурлар.
Диггәт: Хәбәрдән истифадә етдикдә мәнбәјә истинад лазымдыр
