Әһли Бејт -АБНА- хәбәр аҝентлијинин вердији хәбәрә әсасән: Түркијә КИВ-нин јајымладығы мәлумата ҝөрә, Түркијә президенти Абдулла Ҝүл Оксфорд Университети Ислам Арашдырмалары Мәркәзиндә чыхышында дејиб: “Бөлҝәдә донмуш проблемләри о шәкилдә сахламаг олмаз. Хроники донмуш проблемләр бир анда партлаја биләр”.
О бунун бариз нүмунәси олараг Ҝүрҹүстан һадисәләрини ҝөстәриб: “Бир нечә ил әввәл Гафгаз бирдән-бирә алова бүрүндү. Гафгаздакы бүтүн проблемләрин һәлли һәр кәсин хејринәдир. Һазыркы “де-факро” вәзијјәт исә һеч кәс үчүн гәбул олунан дејил. Бөлҝәдә Азәрбајҹан-Ермәнистан, Түркијә-Ермәнистан вә Ҝүрҹүстан мәсәләсиндә јенә дә мүхтәлиф проблемләр вар, бунларын һәлли үчүн диалога еһтијаҹ дујулур. Бунунла бағлы ҹәһдләр вар, сон 1-2 илдә бу ҹәһдләр даһа да интенсивләшиб”.
А. Ҝүл бәјан едиб ки, илк олараг әлбәттә, Азәрбајҹанын Гарабағ әразисинин ишғалыны олмамыш кими ҝөрмәк мүмкүн дејил: “Дағлыг Гарабағла бағлы мүбаһисәләр олса да, Азәрбајҹанын әтраф 7 рајонунун ишғал алтында олдуғу һәр кәсә мәлумдур, БМТ дә бунун ишғал олдуғуну бәјан едир. Һәтта Ермәнистан да Дағлыг Гарабағ әтрафындакы рајонларын она аид торпаглар олмадығыны билир вә буну ифадә едир”.
О, диҝәр тәрәфдән, Түркијә илә Ермәнистан арасында да проблемләрин олдуғуну билдириб: “Түркијә Ермәнистанын мүстәгиллијини илк таныјан өлкәләрдән олса да, проблемләр галыр. Бу проблемләрин һәлли үчүн 1-2 илдир, ҹидди ҹәһдләр ҝөстәририк вә бу ҹәһдләри давам етдирәҹәјик. Бүтүн бу проблемләрин һәлли илә бағлы Русија, Азәрбајҹан, Ермәнистан, вә Түркијәнин ҹидди фәалијјәти вар. Заман-заман үмидләр даһа да артыр, бәлкә заман-заман бир аз сәссиз чалышмаг лазым ҝәлир, амма Гафгазда сүлһ вә сабитлијин бәрпа олунмасы үчүн исрарлы шәкилдә фәалијјәт ҝөстәрмәк лазымдыр вә биз буну едирик”.
Диггәт: Хәбәрдән истифадә етдикдә мәнбәјә истинад лазымдыр
