Әһли Бејт -АБНА- хәбәр аҝентлијинин вердији хәбәрә әсасән: Октјабрын 25-дән нојабрын 1-дәк Теһранда ХVII Бејнәлхалг Мәтбуат вә Информасија Аҝентликләри Сәрҝи-Фестивалы кечирилиб. Сәрҝинин ачылыш мәрасиминдән аз сонра тәдбирдә иштирак едән Азәрбајҹан вә Ермәнистан нүмајәндә һејәтләри арасында галмагал баш вериб. Буна сәбәб Ермәнистана аид стенддә танытым нишаны олараг “Артсах”ын символу кими тәгдим олунан Дағлыг Гарабағдакы тарихи абидәнин, “Дағлыг Гарабағ Республикасы”нын бајрағынын шәкилләринин вә хәритәсинин вурулмасы олуб.
Азәрбајҹан нүмајәндә һејәти бу барәдә сәрҝинин тәшкилатчыларына мәлумат вериб. Бу заман ермәни журналистләр һәјасызҹасына билдирибләр ки, “Артсах”ын символу кими тәгдим олунан Дағлыг Гарабағдакы тарихи абидәнин шәклини стендә тәдбирин тәшкилатчылары вуруб: “Она ҝөрә биз дә дүшүндүк ки, бурада Дағлыг Гарабағын хәритәсинин вә бајрағынын шәклини нүмајиш етдирә биләрик”. Буна ҹаваб олараг тәшкилатчылар сөзүҝедән шәклин онлара тәдбирә һазырлыг просеси чәрчивәсиндә Ермәнистан тәрәфиндән тәгдим олундуғуну бәјан едибләр вә дәрһал галмагала сәбәб олан шәкилләрин јығышдырылмасына ҝөстәриш верибләр.
“Дағлыг Гарабағын хәритәси” вә сепаратчы бөлҝәнин символу кими тәгдим олунан шәкилЕрмәнистанын стендиндән ендирилиб. Түркијә журналистләри Азәрбајҹан журналистләри илә һәмрәјлик нүмајиш етдирәрәк, Ермәнистанын өзбашыналығына сон гојулмајаҹағы тәгдирдә азәрбајҹанлы һәмкарлары илә бирликдә сәрҝидә иштирак етмәкдән имтина едәҹәкләрини билдирибләр.
Гејд едәк ки, Ирәванда мәтбуат конфрансы кечирән ермәни журналистләр билдирибләр ки, онлар “Дағлыг Гарабағын хәритәси”ни вә сепаратчы бөлҝәнин символу кими тәгдим олунан шәклин стендән ендирилмәсинә вә Иран тәрәфинин бир даһа белә тәхрибатчы һаллара јол верилмәмәси илә бағлы Ермәнистан нүмајәндә һејәтинә хәбәрдарлыг етмәсинә етираз олараг октјабрын 28-дә сәрҝини тәрк едибләр.
Диггәт: Хәбәрдән истифадә етдикдә мәнбәјә истинад лазымдыр
