Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Илһам Әлијевин бир-баша башчылығы илә 2015, 26 Ганлы Нардаран һадисәләри заманы сәбәсиз јерә һәбс олунмуш Аббас Һүсејнов ијунун 7-дә ҹәримә тәҹридханасына салыныб. Бакы режими һадисәјә сәбәб кими онун сахландығы камерада чөрәк кәсмәк үчүн нәзәрдә тутулан әтрафы итиләнмиш гашығын ашкар едилмәси олдуғуну билдириб.
Вәкил Фариз Намазлынын Мејдан ТВ-јә вердији мәлумаја ҝөрә, һәмин гашыг барәдә тәҹридхана әмәкдашларынын мәлуматы олуб: “Белә ки, һәр ҝүн камераларда сәһәр јохланышы заманы гашыг столун үстүндә олуб, нәдәнсә 7 ијунда тәҹридхана әмәкдашлары һәмин гашыға ҝөрә камерада сахланылан Аббасла бирликдә диҝәр 3 нәфәри дә ҹәримә тәҹридханасына салыблар. Аббас Һүсејнова 5 ҝүн мүддәтинә ҹәримә тәҹридханасында сахланылмасы нәзәрдә тутулса да, һәмин мүддәт һәфтә сонуна дүшдүјүндән ону базар ертәси, јәни 13 ијуна гәдәр ҹәримә тәҹридханасында сахлајыблар. Сәбәб кими рәисин базар ҝүнү тәҹридханада олмамасы илә изаһ едибләр”.
Вәкил дејир ки, ҹәримә тәҹридханасында сахланыларкән ганунвериҹилијин тәләбләри позулуб, белә ки, А.Һүсејнова ҝүн әрзиндә јалныз бир дәфә 15 дәгигә олмагла ҝәзинтијә чыхмаға иҹазә верибләр. Һәмчинин она ҝүндәлик истифадә үчүн шәхси ҝиҝијеник әшјалар вермәјибләр: “Ҹәримә тәҹридханасы сахланмаг үчүн тамамилә јарарсыз вәзијјәтдә олуб, белә ки, таракан вә диҝәр һәшәратлар ҹәримә камерасында сахланылан шәхсләрлә отағы бөлүшүбләр.
Истинтаг Тәҹридханаларынын Дахили Интизам Гајдаларына ҝөрә, ҹәримә тәҹридханасында јерләшдирилән һәбс едилмиш шәхсләр һәр ҝүн ән азы 1 саат ҝәзинти һүгугуна маликдирләр .
Гајданын 34.2-ҹи маддәсинә ҝөрә, ҹәримә тәҹридханасына јерләшдирилмиш һәбс едилмиш шәхсләрин сәһһәтинә тибби-санитарија мәнтәгәсинин тибб ишчиләри тәрәфиндән ҝүндәлик нәзарәт едилир. Бу барәдә һәбс едилмиш шәхсин тибб китабчасында вә тәҹридхана журналларында мүвафиг гејдләр апарылмалыдыр.
34.4-ҹү маддәјә ҝөрә, ҹәримә тәҹридханасына јерләшдирилмиш һәбс едилмиш шәхсләр фәрди чарпајы вә јатаг ләвазиматы илә тәмин едилмәлидир. Онлара өзләри илә әл-үз дәсмалы, сабун, диш мәҹуну, диш фырчасы, түтүн мәмулатлары, кибрит вә мүәјјән олунмуш сајда китаб (журнал) вә әдәбијјат истисна олмагла, әрзаг мәһсуллары вә диҝәр шәхси әшјалары ҝөтүрмәк гадағандыр. Ҹәримә тәҹридханасына јерләшдирилмиш һәбс едилмиш шәхсләрә исти үст палтары јалныз онлар ҝәзинтијә чыхарыларкән верилмәлидир.
Бу нормалар тәҹридхана әмәкдашлары тәрәфиндән позулуб. Тәбии ки, Пенитенсиар Хидмәтин вә ја Бакы Истинтаг Тәҹридханасынын сәлаһијјәтли нүмајәндәси бу хәбәри тәкзиб едәҹәк, ҹәримә тәҹридханасынын мүасир стандартлара ујғун ҝәлдијини вә орада Аббас Һүсејновун һәр һансы һүгугунун позулмадығыны билдирәҹәк. Мәсләһәт ҝөрәрдим ки, белә ачыглама вермәздән әввәл һәмин шәхсләр ән азындан Аббас Һүсејновла сөһбәт етсинләр”.
Пенитенсиар Хидмәтдән Мејдан ТВ-нин бунунла бағлы суалыны ҹавабландырмаг истәмәјибләр.
Диггәт: Хәбәрдән истифадә етдикдә мәнбәјә истинад лазымдыр
