Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Гарабағ Азадлыг Тәшкилаты Азәрбајҹан вә Ермәнистан президентләринин Вјана ҝөрүшүнүн нәтиҹәләри илә бағлы сәрт бәјанат вериб.
Бәјанатда дејилир:
"Гарабағ Азадлыг Тәшкилаты АТӘТ Минск групуна һәмсәдрлик едән өлкәләрин –АБШ, Русија вә Франсанын хариҹи ишләр идарәләри рәһбәрләринин иштиракы илә Азәрбајҹан вә Ермәнистан президентләринин 2016-ҹы ил мајын 16- да Вјанада кечирилән ҝөрүшү заманы әлдә олунан разылашманы гәтијјәтлә рәдд етдијини билдирир. Верилән мәлумата ҝөрә, тәрәфләр атәшкәс режимини бәрпа етмәк, тәмас хәттиндә баш вермиш һадисәләри арашдырмаг, гаршылыглы етимады мөһкәмләндирмәк вә саир бу кими реаллығы әкс етдирмәјән мәсәләләрә даир разылыҝа ҝәлибләр.
Бу гәрарлар мүнагишәнин әдаләтли һәллинә дејил, статус-квонун сахланылмасына, торпагларымызын Ермәнистанын ишғалы алтында галмасына вә бирмәналы шәкилдә ишғачы Ермәнистанын марагларына хидмәт едир. Вјана ҝөрүшүндә һәмсәдрләрин әдаләтли мөвге тутаҹағына, ишғалчы Ермәнистаны сүлһә мәҹбур едәҹәкләринә,Ермәнистанын ишғалчы гүввәләринин Азәрбајҹан әразисиндән чыхарылмасы үчүн тәшәббүс едәҹәкләринә үмид едирик. Бу, бизим сонунҹу үмидимиз иди, сонунҹу үмид дә өзүнү доғрултмады.
Артыг Минск групу һәмсәдрләринә, диҝәр васитәчиләрә үмид етмәјин мәнасы јохдур. Биз Азәрбајҹан һакимијјәтинин Вјана ҝөрүшүнә ҝетмәсини вә ондан сонра данышыгларын давам етдирилмәсинә разылыг вермәсини јанлыш аддым һесаб едирик. Гарабағы данышыглар јолу илә азад етмәк мүмкүн дејил, бу јолла Гарабағы дүшмәнә тәһвил вермәк олар. Данышыглар јолу хәјанәт јолудур. Һакимијјәт данышыглар јолуну тутурса, демәли, хәјанәт јолу илә ҝедир."
Тәшкилат бәјантында һакимијјәти хәјанәт вә горхаглыгда иттиһам едиб.
"Биз Азәрбајҹан һакимијјәтини горхаглыгда вә гәтијјәтсизликдә иттиһам едирик. Һакимијјәт ја горхаглығыны, гәтијјәтсизлијини етираф едиб кәнара чәкилмәли, ја да Апрел дөјүшләрини давам етдирмәли, торпагларымызын һәрби јолла ишғалдан азад едилмәсинә наил олмалыдыр. Апрел дөјүшләри заманы Азәрбајҹан халгы јүз минләрлә шәһид вермәјә һазыр олдуғуну, милли ирадәсини нүмајиш етдирди. Азәрбајҹан һакимијјәти мәһз халгын бу ирадәсинә сөјкәнәрәк бүтүн васитәчиләрин рәдд олуб ҝетмәләрини тәләб етмәли, онлары говмалы вә һәрби әмәлијјатлара башламалыдыр. Башга јолумуз јохдјр! Ја Гарабағ, ја Өлүм!", - дејә ГАТ-ын бәјанатында билдирилир.
Диггәт: Хәбәрдән истифадә етдикдә мәнбәјә истинад лазымдыр
