Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Астара рајону, Әрчиван гәсәбә сакини, 1-ҹи груп һәрби әлил атасы вә әмәк ветераны Мәһәррәмәли Мәммәдов дөвләт структурларына үнванладығы мүраҹиәтин сурәтини “Азадлыг”а да ҝөндәриб. О, мәктубунда јазыр:
“Мән 80 јашлы мүәллим кими, өлкәнин бүтүн намуслу адамларына мүраҹиәт едирәм. Мүраҹиәтим Милли Елмләр Академијасынын шөбә мүдири, роман вә ҝерман дилләринин апарыҹы мүтәхәссиси, 40 илдән артыг Елмләр Академијасында ишләмиш Новрузәли Мәммәдов һаггындадыр. Новрузәли Мәммәдов вә онун ики субај оғлунун фаҹиәли шәкилдә өлдүрүлмәси кечмиш МТН рәһбәри Елдар Маһмудовун мәкрли сијасәти нәтиҹәсиндә олуб. Новрузәли Мәммәдовун евиндә көһнә машын, 6 әдәд стул вә бир газ собасы олуб. Ону 2007-ҹи ил февралын 7-дә ишдән сонра ики намәлум шәхс МТН-нин бинасына апарыб. Гәти шәкилдә тапшырылыб ки, бу барәдә һараса шикајәт етсә, ону пис вәзијјәтә гојаҹаглар. Нәһајәт, февралын 17-дә мәлум олду ки, Новрузәли Мәммәдов Човдаровун һәбсханасындадыр вә она ишҝәнҹәләр верилир. Кичик оғлу Емил Мәммәдов атасынын һарајына чыхыр вә МТН ишчиләри ону мөһкәм дөјәрәк машынын јүк јеринә гојуб, намәлум истигамәтә апарырлар. Мәлум олур ки, һәмин әрази ”Волчиварот”, јәни “Гурд гапысы” дејилән әрази имиш. Емил өзүнә ҝәләрәк евә гајыдыр вә баш верәнләри анасына данышыр. Анасы мүәјјән гурумлара зәнҝ едир, журналистләр Емилин шәклини чәксәләр дә, һеч бир нәтиҹә олмур. Бир нечә ҝүн сонра бөјүк оғлу Камран Мәммәдов атасынын јанына ҝедәндә ону орада мөһкәм дөјәрәк евә ҝөндәрирләр. Камран анасына шикајәт едир ки, ону МТН ишчиләри дөјүб. Ики-үч саат сонра Камран дүнјасыны дәјишир. Новрузәлинин евиндә, иш отағында ахтарышлар апарылыр. Иш отағында кассанын ичиндә 10.000 маната гәдәр пул тапырлар. Һәмин пулу Новрузәли Мәммәдов орада сахлајырды ки, 7 дилдә – талыш, Азәрбајҹан, рус, фарс, латын, алман, түрк дилиндә јени лүғәт нәшр етдирсин.
Вердијим шикајәтләрә әсасән, мәни МТН-нин мүстәнтиги Новруз Кәримов диндирди вә Новрузәли Мәммәдову бурахаҹагларыны деди. О, хүсуси өјрәдилмиш һәмкәндлим Елман Гулијеви чағырыб, 5 саат әрзиндә мәнимлә сорғу-суал апарды. Һәмин сорғу-суалларын јалан вә ујдурма олдуғуну сүбут етдим.
Гардашыма физики ҹәзалар верилирди, сағ әлинин ики бармағыны гапы арасына гојуб сындырмышдылар. Ејнәјини дә парчалајыб ону “карс”а салмышдылар. Орада олдуғу мүддәтдә Новрузәли Мәммәдов 5 дәфә “карс”а салынды, дөјүлдү, ишҝәнҹәјә мәруз галды. Гардашымдан күлли мигдарда рүшвәт тәләб едән мүстәнтиг аз сонра мөтәбәр бир вәзифәјә ҝетди – һаким олду. Ҝөрүнүр, бу вәзифә һәм дә Новрузәлијә верилән ишҝәнҹәләрин “мүкафаты” иди.
Елдар Маһмудов гардашымын аиләсини, онун һәјат јолдашы Мәрјәм ханымы хариҹи өлкәләрдә сығынаҹаг алмаға мәҹбур етди. Новрузәли Мәммәдовун һеч бир банкда, дөвләтдә мал-мүлкү јох иди.
Мән гардашыма ҸМ-нин 274-ҹү (дөвләтә хәјанәт) маддәсилә верилән иттиһама хитам верилмәсини тәләб едирәм. Бүтүн тајфамызын адындан өлкәнин танынмыш алимләриндән Новрузәли Мәммәдовун өлүмүндән сонра бәраәт газанмасы үчүн сәсимизә сәс вермәләрини хаһиш едирәм. Новрузәли мүәллими севән јахынлары, өвладлары бу ҝүнү сәбирсизликлә ҝөзләјирләр”.
Диггәт: Хәбәрдән истифадә етдикдә мәнбәјә истинад лазымдыр
