Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Абшеронда баш вермиш силсилә оғурлуглар барәдә полисә мәлумат дахил олдугдан сонра әмәлијјат-ахтарыш тәдбирләри һәјата кечирилиб. Тәхминән 3 ҝүн әввәл исә оғурлуглары төрәдән дәстә нөвбәти еви гарәт етмәјә ҝедәркән “иш башында” јахаланыб. Мәлум олуб ки, дәстә үзвләри арасында полис әмәкдашы Сәрхан Манафов да вар.
С.Манафов Дахили Ишләр Назирлијинин Баш Мүһафизә Идарәсинин Дипломатик Корпусларын Мүһафизә Таборунун 2-ҹи бөлүјүнүн әмәкдашыдыр. Тәхминән 10 илә јахындыр полис системиндә ишләјән Сәрхан Манафов өз танышларындан ибарәт 3 нәфәрлик дәстә јарадыб вә өзү дә дәстәјә башчылыг едиб. О, гарәт едиләҹәк евләри өзү мүәјјән едиб дәстә үзвләринә истигамәт верәндән сонра оғурлуг планы һәјата кечирилирмиш. Бу дәстә артыг 5 оғурлуг һадисәси төрәдиб.
Сонунҹу оғурлуг һадисәси дә јанварын 18-дә Абшерон рајонунда Сәрхан Манафовун мүәјјән етдији евдән едилиб. Лакин бу дәфә полис әмәкдашы һәмин евдә тәһлүкәсизлик камерасы олдуғуну билмәјиб вә оғру дәстәси камераја дүшүб.
Абшерон рајон Полис Идарәсинин һәјата кечирдији әмәлијјат тәдбирләри нәтиҹәсиндә камера ҝөрүнтүләринә дә бахыш кечирилиб вә дәстә үзвләри јахаланыб. Мәлум олуб ки, онлардан бири полис әмәкдашыдыр. Артыг Сәрхан Манафовун һәбс олунараг Күрдәханы гәсәбәсиндәки истинтаг тәҹридханасына ҝөндәрилдији билдирилир.
Дахили Ишләр Назирлијинин мәтбуат хидмәтинин әмәкдашы Еһсан Заһидов билдириб ки, јанварын 18-дә Бакы шәһәр сакинләри Сәрхан Манафов вә Кәрим Сүлејманов Абшерон рајону, Хырдалан шәһәр сакини Ҹабир Нәбијевин евинә дахил олараг ев саһиби вә онун оғлуну дөјәрәк евдән 650 манат пул вә 17 мин манат дәјәриндә гызыл-зинәт әшјалары апардыгларына ҝөрә тутулублар.
Диггәт: Хәбәрдән истифадә етдикдә мәнбәјә истинад лазымдыр
