Мөһсүн Пакајин Хәбәр-Онлајн порталындакы микроблогунда јазыб: “Азәрбајҹан вә Ермәнистанын јүксәк вәзифәли шәхсләри Ҹәнуби Гафгазда сүлһүн бәргәрар олмасыны мүмкүн едән һәрәкәтләри илә гаршы тәрәфин әрази бүтөвлүјүнү гаршылыглы шәкилдә таныдыгларыны бәјан едирләр”.
Онун фикринҹә, Икинҹи Гарабағ мүһарибәси нәтиҹәсиндә Азәрбајҹанын Ермәнистан тәрәфиндән ишғал олунмуш 7 рајону азад едилсә дә, Гарабағын статус мәсәләси мүәјјән едилмәди. Бу сәбәдән һазырда һәр ики өлкәнин гаршы тәрәфин әрази бүтөвлүјүнү таныдығыны ҝөстәрән ҹидди бәјанатлары сүлһүн реаллашмасынын гаршысында дуран әсас манеәни арадан галдырыр.
Мөһсүн Пакајин сонра јазыр: “10 нојабр бәјанатындакы диҝәр гејри-мүәјјәнлик Сүник кечидиндән неҹә истифадә едилмәси илә бағлы иди. Бу кечид Ермәнистанын әрази бүтөвлүјүндәдир вә Азәрбајҹанын мәркәзи һиссәсини Нахчыванла бирләшдирир. Ермәнистанын баш назири дејир ки, онун өлкәси вә Азәрбајҹан Республикасы бир-биринин әрази бүтөвлүјүнә һөрмәтлә јанашыр вә ихтилафларын һәлли үчүн аддым атыблар. Беләликә дә Ермәнистанын Азәрбајҹан Республикасынын Нахчывана чыхышы үчүн Сүник вилајәтиндән кечиди ачмаға һазыр олдуғуну билдирмәси илә Гафгазда сүлһүн бәргәрар олмасы јолунда нөвбәти манеә дә өз һәллини тапмаға доғру ҝедир”.
Кечмиш сәфир өз мәгаләсинин сонунда јазыр: “Иран Ислам Республикасы һәмишә һесаб едиб ки, истәнилән сүлһ мүгавиләсинин давамлылығы үчүн тәрәфләр мүбаһисәләри бејнәлхалг нормалара һөрмәт едәрәк, бир-биринин әрази бүтөвлүјүнү танымагла вә бејнәлхалг сәвијјәдә танынмыш сәрһәдләри горумагла һәлл етмәлидир.
Тарихи гејдләрә вә бејнәлхалг нормалара ҝөрә, ермәниләрин мәскунлашдығы Гарабағ бөлҝәси Азәрбајҹан Республикасынын вә Сүник вилајәти Ермәнистанын әрази бүтөвлүјүнүнә дахилдир. Она ҝөрә дә ҹоғрафи сәрһәдләрин дәјишдирилмәси бу өлкәләрин әрази бүтөвлүјүнүн дәјишдирилмәси анламына ҝәлир. Буну нәзәрә алараг, тәрәфләр бејнәлхалг сәрһәдләри позмамаг вә Дағлыг Гарабағдакы ермәни азлығынын тәһлүкәсизлијини тәмин етмәк гәрарына ҝәлибләрсә, мүнагишә битмиш һесаб олунур вә Ислам Иран Республикасы бу инкишафы мүсбәт гаршылајаҹагдыр.
Бакы вә Ирәван билмәлидир ки, Гарабағ мүнагишәсинин сона чатмасы вә сүлһүн бәргәрар олмасы тәрәфләрин мәнафејини тәмин едәҹәк вә ики өлкә халгыны гане едәҹәк. Бу инкишафла реҝион өлкәләри арасында 3+3 форматында әмәкдашлыға имкан јаранаҹаг вә лазымсыз мүнагишәләрә сон гојулаҹаг. Реҝионда сүлһ сазишиндән зәрәр ҝөрәҹәк јеҝанә үнсүр сионист режимдир ки, Гафгаз өлкәләринә силаһ сатмаг вә кәшфијјат имканларыны итирәҹәк. Бу сәбәбдән реҝион өлкәләринин Исраилин тәхрибатчы һәрәкәтләри гаршысында диггәтли олмалары лазымдыр”, - дејә Мөһсүн Пакајин өз мәгаләсини јекунлашдырыб.
342/
