Рәиси: Теһран вә Мәсгәт арасында сијаси етимад јени мәрһәләјә гәдәм гојур

АБНА24 Хәбәр Верир , дүнән рәсми сәфәр үчүн Омана ҝедән Иран Ислам Республикасы президенти Оманын султаны илә ҝөрүшүб.

Оманы дост вә гардаш өлкә кими сәҹијјәләндирән президент Рәиси Теһран вә Мәсгәт арасында әлагәләрин јахшылашдырылмасы үчүн мүхтәлиф имканларын мөвҹудлуғундан данышыб вә дејиб: “Ики өлкә рәсмиләринин әлагәләри артырмаг ирадәси чох мүһүмдүр вә һесаб едирик ки, бу ирадәнин реаллашмасы үчүн әһатәли план тәшкил едиләрәк, ҝәләҹәк перспектив һазырланмалыдыр".

Бәзи мәсәләләрин гыса мүддәтдә һәлл олуна биләҹәјинә ишарә едән Рәиси, әлавә едиб: "Оманы дүрүст вә етибарлы бир дост олараг ҝөрүрүк вә бу ҝүн сијаси етимад јени мәрһәләјә гәдәм гојуб" .

Оман Султаны да өз нөвбәсиндә билдириб ки, өлкәси гардаш вә гоншу өлкә Ирана достлуг әлини узадыр.

Иран Ислам Республикасынын Президенти Ибраһим Рәисини Мәсгәтдә гаршыламагдан мәмнунлуг ифадә едән, Һејсәм Бин Тариг Али Сәид, ики өлкәнин мүасир тарихдәки конструктив әлагәләринә диггәт чәкиб.

Тиҹарәт әлагәләринин сәвијјәсинин сијаси әлагәләрдән ҝери галдығыны дејән Оман Султаны әлавә едиб: “Тиҹарәт һәҹмимизи артырмаг үчүн јени планлар вә програмлар активләшдирилмәлидир. Бәзи мүгавиләләрин узадылмасы вә јени мүгавиләләрин имзаланмасы да ваҹибдир'' .

Гејд едәк ки, Иран президенти Рәисинин Омана бир ҝүнлүк сәфәри чәрчивәсиндә ики өлкә арасында мүхтәлиф сијаси, нәглијјат, игтисади вә туризм саһәләриндә 12 әмәкдашлыг сәнәди имзаланыб.

12 әмәкдашлыг сәнәдини Иранын сәнаје, мәдән вә тиҹарәт, хариҹи ишләр, јол вә шәһәрсалма назирләри вә Тиҹарәтин Тәшвиги Тәшкилатынын рәһбәри оманлы һәмкарлары илә имзалајыблар.

Бу разылашмалардан ән мүһүмү Иран-Оман Тәбии Газ Бору Кәмәри лајиһәсинин ҹанландырылмасы вә мүштәрәк Һенҝам енержи јатағынын ишләнилмәси илә бағлы ики өлкәнин нефт назирләри арасында әлдә едилмиш разылашмадыр.

342/