Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, Русија Президенти Владимир Путин беларуслу һәмкары Александр Лукашенко илә ҝөрүшдән сонра брифингдә сөјләјиб: “Украјнада баш верәнләр фаҹиәдир, лакин Русијаја башга ҹүр һәрәкәт етмәк сечимини гојмадылар”.
НАТО ишғалчы гүввәләринин Русија сәрһәдләринә јахынлашмамасындан өтрү Украјнада дөјүшән русијалы һәрбчиләрә миннәтдарлығыны билдирән дөвләт башчысы онларын Русијаны мүдафиә етдијини вурғулајыб.
Хатырладаг ки, 2014-ҹү илин февралында Украјнанын Крым Мухтар Республикасы референдом кечирәрәк Русија Федерал Республикасынын тәркибинә илһаг олуб. Бундан сонра Украјнанын Донбас бөлҝәсиндә һәрби әмәлијјатлара башлајыб. Нәтиҹәдә Донетск вә Луганск вилајәтләринин бөјүк һиссәси сепаратчыларын нәзарәтинә кечиб. Дөјүшләр Украјнанын Силаһлы Гүввәләри вә Русијанын дәстәкләдији гондарма Донетск вә Луганск республикаларынын силаһлылары арасында ҝедиб. Рәсми Москва дөјүшләрдә иштиракынын олмасы иттиһамыны рәдд едиб.
Даһа сонра 2020-ҹи илин сонундан башлајараг Украјна вә Русија арасында мүнасибәтләр даһа да ҝәрҝинләшмәјә башлајыб, Донбасда тәмас хәттиндә атәшкәсин позулмасы мүтәмади характер алыб. АБШ башда олмагла Украјнанын мүттәфигләри һәрби вә малијјә ҹәһәтдән рәсми Кијевә јардым етсә дә, мүнагишәјә бирбаша мүдахилә етмәјәҹәкләрини вурғулајыблар.
2022-ҹи илин февралын 21-дә Русија Президенти Владимир Путин халга мүраҹиәтиндә Украјнанын Донбас әразисиндә јарадылан ики гондарма республиканы таныдығыны билдириб. О, бунунла бағлы фәрман имзалајыб.
2022-ҹи илин февралын 24-дә Русија Силаһлы Гүввәләри Украјнанын “денасификасија вә демилитаризасијасы” (насизм үнсүрләриндән тәмизләнмә вә силаһсызлашдырылма), һабелә Донетск вә Луганск “республикаларынын әрази бүтөвлүјүнүн” тәмин олунмасы мәгсәдилә өлкәјә шәрг, ҹәнуб (Крым) вә шимал (Беларус) истигамәтләрдән һүҹума башлајыб. Русијада “хүсуси һәрби әмәлијјат” адланан бу мүһарибәдә индијәдәк Украјнанын бир сыра шәһәрләри, о ҹүмләдән Херсон, Мелитопол шәһәрләри ишғал едилиб. Минләрлә динҹ сакин һәлак олуб, милјонларла инсан јурдларындан дидәрҝин салыныб. Мүһарибәнин илк ҝүнләриндән Гәрб Русијаја гаршы ән сәрт игтисади санксијалары ишә салыб. Нәтиҹәдә өлкәнин милли валјутасы рубл чөкүш јашајыр. Бу санксијалар илк дәфә олараг һуманитар саһәләрә дә тохунуб.
Бундан башга, Бејнәлхалг Ҹинајәт Мәһкәмәсиндә (Һаага) Русијанын Украјнаја гаршы тәҹавүзү илә әлагәдар инсанлыға гаршы ҹинајәтләрин арашдырылмасына башлајыб.
Гејд едәк ки, Азәрбајҹан дахил олмагла, БМТ үзвләринин мүтләг әксәријјәти Крым јарымадасы вә Донбасы Украјнанын әразиси олараг таныјыр.
Диггәт: Хәбәрдән Истифадә Етдикдә Мәнбәјә Истинад Лазымдыр!
