Русијанын 18 500-ә јахын һәрбчиси зәрәрсизләшдирилиб

АБНА24 Хәбәр Верир , Украјна Силаһлы Гүввәләринин Баш Гәрарҝаһындан билдирилиб ки, Русијанын 18 500-ә јахын һәрбчиси зәрәрсизләшдирилиб.

Бундан башга, һүҹум едән тәрәфин 676 әдәд танкы, 1 858 әдәд зиреһли дөјүш машыны, 332 әдәд артиллерија системи, 107 әдәд реактив јајлым атәш системи, 55 һава һүҹумундан мүдафиә системи, 150 әдәд һәрби тәјјарәси, 134 әдәд һеликоптери, 1 322 әдәд нәглијјат васитәси, 7 әдәд ҝәми вә катери, 76 әдәд јанаҹаг чәни, 94 әдәд дрону, 25 әдәд хүсуси техникасы вә 4 оператив-тактики ракет комплекси мәһв едилиб.
Бундан әлавә гејд олунур ки, Украјнада әсир ҝөтүрүлән Русија әсҝәрләринин сајы 600 нәфәрә јахындыр.

Бу барәдә Украјна баш назиринин мүавини Ирина Верешук дејиб: "Биз үмуми рәгәмләрдән данышырыгса, һазырда онларын сајы 600-ә јахындыр. Билирсиниз, биз бејнәлхалг һүгуг нормаларына ујғун олараг онлар үчүн хүсуси дүшәрҝә тикмәлијик".

О, һәмчинин гејд едиб ки, бу ҝүн рәсми шәхсләрин иштиракы илә кечирилән ҝөрүшдә чохсајлы мәһбусларын мәсәләси мүзакирә олунуб.

Бу арада Украјна Президенти Владимир Зеленски Буча илә јанашы Бородјанка вә диҝәр шәһәрләрдә гурбанларын сајынын даһа чох ола биләҹәјини вурғулајыб.

О дејиб: "Өлдүрүлән украјналыларын мејитләрини бир чох күчәләрдән ҝөтүрүбләр. Лакин һәјәтләрдә, күчәләрдә ҹәсәдләр галмагдадыр. Хүсусән “ушаг” јазылмыш автомобилләрдә ҝүллә изләри ҝөрмәк даһа ағырдыр. Ишғалчыларын етдикләри илә бағлы јениҹә арашдырмалара башламышыг”, - дејә Зеленски Буча сәфәри заманы дејиб.

Диҝәр тәрәфдән Украјнада мүрәккәб вәзијјәтин јаранмасында бөјүк пајы олан Америка Украјнадакы мүнагишәнин ајлар вә ја даһа чох давам едә биләҹәји барәдә хәбәрдарлыг едиб.

АБШ Президентинин милли тәһлүкәсизлик үзрә көмәкчиси Ҹејк Салливан гејд едиб ки, Русијанын Украјнадакы әмәлијјатынын нөвбәти мәрһәләси узана биләр.

Хатырладаг ки, Русија Кијев вә Чернигов вилајәтләриндән чәкиләрәк, Донбас вә ҹәнуб истигамәтиндә гүввәләрини ҹәмләјир.

342/