Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, Азәрбајҹан Республикасынын Президенти Илһам Әлијев мартын 30-да Инҝилтәрәнин Силаһлы Гүввәләр назири, Инҝилтәрә парламентинин үзвү Ҹејмс Һиппини гәбул едиб.
Президент.аз сајтынын мәлуматына ҝөрә, ҝөрүшдә бу ил Азәрбајҹанла Инҝилтәрә арасында дипломатик мүнасибәтләрин гурулмасынын 30 иллијинин гејд олундуғу мәмнунлугла вурғуланды вә бу дөвр әрзиндә өлкәләримиз арасында мүхтәлиф саһәләрдә сәмәрәли әмәкдашлығын һәјата кечирилдији билдирилди. Бу мүнасибәтлә Бөјүк Британија вә Шимали Ирландија Бирләшмиш Краллығынын Баш назири Борис Ҹонсонун Президент Илһам Әлијевә вә Илһам Әлијевин Борис Ҹонсона үнванланмыш тәбрик мәктубларынын әһәмијјәти гејд едилди.
Билдирилди ки, 30 иллик дөврдә уғурлу әмәкдашлығын һәјата кечирилмәси әлагәләрин бундан сонра да ҝенишләнмәси үчүн јахшы зәмин јарадыр.
Ҝөрүшдә нефт, газ, Азәрбајҹан игтисадијјатына Инҝилтәрә тәрәфиндән сәрмајә гојулушу, тиҹарәт, нәглијјат, мүдафиә саһәләриндә әмәкдашлығын перспективләри әтрафында фикир мүбадиләси апарылды.
Сөһбәт заманы ишғалчы НАТО Алјансынын Әфганыстанда һәјата кечирдији “Гәтијјәтли дәстәк” миссијасында Азәрбајҹанын иштиракы гејд едилди.
Илһам Әлијев Ермәнистан-Азәрбајҹан Дағлыг Гарабағ мүнагишәсинин һәллиндән сонра бөлҝәдә пост-мүнагишә дөврүндә ҝедән просесләр барәдә данышды.
Диггәт: Хәбәрдән Истифадә Етдикдә Мәнбәјә Истинад Лазымдыр!
