Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, Азәрбајҹан Республикасы Баш назиринин мүавини, Азәрбајҹан-ИИР Дөвләт Комиссијасынын һәмсәдри Шаһин Мустафајев февралын 12-дә Иран Ислам Республикасынын јол вә шәһәрсалма назири, Дөвләт Комиссијасынын Иран тәрәфдән һәмсәдри Рүстәм Гасими илә видеоформатда ҝөрүшүб. Ҝөрүшдә, һәмчинин һәр ики өлкәнин мүвафиг дөвләт структурларынын нүмајәндәләри иштирак едибләр.
Ҝөрүш заманы Азәрбајҹан илә Иран арасында мүхтәлиф саһәләрдә, хүсусилә игтисадијјат, тиҹарәт, нәглијјат-транзит, енерҝетика, сәнаје, кәнд тәсәррүфаты вә диҝәр истигамәтләрдә әлагәләрин инкишафындан мәмнунлуг ифадә едилиб.
Өтән илин нојабрын 28-дә Ашгабадда Игтисади Әмәкдашлыг Тәшкилатынын Зирвә топлантысы чәрчивәсиндә Азәрбајҹан Президенти Илһам Әлијев илә Иран Президенти Сејид Ибраһим Рәиси арасында кечирилмиш ҝөрүшүн тарихи әһәмијјәти вурғуланараг, дөвләт башчыларынын бу ҝөрүшү илә Азәрбајҹан-Иран мүнасибәтләринин јени мәрһәләјә гәдәм гојдуғу билдирилиб.
2022-ҹи илин Азәрбајҹанла Иран арасында дипломатик әлагәләрин гурулмасынын 30 илинин тамам олмасы илә әламәтдар олдуғу мәмнунлугла гејд едилиб.
Коронавирус пандемијасынын негатив тәсирләринә бахмајараг Азәрбајҹан-Иран тиҹарәт дөвријјәсинин 30 % артдығы вурғуланыб.
Нәглијјат-транзит саһәсиндә уғурлу әмәкдашлыг хүсуси вурғуланараг ики өлкә арасында автомобил дашымаларынын һәҹминин 2021-ҹи илдә әһәмијјәтли дәрәҹәдә - 70 % артмасы мәмнунлугла гејд олунуб.
“Шимал-Ҹәнуб” Бејнәлхалг Нәглијјат Дәһлизи ики өлкә арасында тиҹарәт вә нәглијјат-транзит саһәләриндә әлагәләрин инкишафы бахымындан приоритет олараг дәјәрләндирилиб.
Ҝөрүшдә Дөвләт Комиссијасынын нөвбәти иҹласынын кечирилмәси мәсәләси, һәмчинин Азәрбајҹанла Иран арасында гаршылыглы фајдалы әмәкдашлығын мүхтәлиф саһәләрдә даһа да ҝенишләндирилмәси јоллары мүзакирә едилиб.
Диггәт: Хәбәрдән Истифадә Етдикдә Мәнбәјә Истинад Лазымдыр!
