Газах президенти өлкәдә сакитлијин јарандығыны иддиа едиб-ЈЕНИЛӘНИР

АБНА24 Хәбәр Верир, Газахыстан президенти Касым-Жомарт Токајев дејиб ки, һазырда вәзијјәтә јерли һакимијјәт органлары нәзарәт едир.

Токајев ҹүмә ҝүнү сәһәр президент администрасијасы рәһбәрлији, тәһлүкәсизлик шурасы вә тәһлүкәсизлик гүввәләринин иштиракы илә террорла мүбаризә гәрарҝаһынын иҹласыны кечириб.

Президентин мәтбуат хидмәтинин мәлуматына ҝөрә, иҹласда өлкәдәки әмәлијјат, антитеррор әмәлијјатынын ҝедиши, реҝионлардакы вәзијјәт мүзакирә едилиб.

Бунунла белә Газахыстанын Алматы шәһәриндән һәјаҹанлы хәбәрләр дахил олмагда давам едир. Сон мәлуматлара ҝөрә өлкә үзрә интернет јенидән кәсилиб, шәһәр күчәләриндә интенсив атәш сәсләри вә партлајышлар ешидилир. Газахыстан һакимијјәти баш верәнләри “террорчу елементләрә гаршы хүсуси әмәлијјат” кими тәгдим едир, лакин динҹ нүмајишчиләрә гаршы атәш ачылмасыны әкс етдирән ҝөрүнтүләр дә вар.

Газахыстандан дахил олан башга мәлуматда дејилир ки, Алматы шәһәриндә ҝеҹә әмәлијјаты заманы инсанлар зиреһли техникалардан атәшә тутулуб.

Һадисә шаһидләри дејибләр ки, силаһлы дәстәләри мәһв етмәк үчүн ҝеҹә саатларында шәһәрдә хүсуси әмәлијјат кечирилиб. Республиканын Дахили Ишләр Назирлији 26 јараглынын мәһв едилдијини, даһа 18 нәфәрин јараландығыны билдириб".

"ТАСС" исә хәбәр верир ки, 3 минә јахын шүбһәли сахланылыб.

Гејд едәк ки, Газахыстан президентинин мүраҹиәти әсасында Коллектив Тәһлүкәсизлик Мүгавиләси Тәшкилаты КТМТ өлкәләриндән 3 минә јахын хүсуси тәјинатлы гүввә артыг Газахыстандадыр вә гијамчылара гаршы әмәлијјатларда иштирак едирләр.

Тәшкилатын баш катиби Станислав Зас бәјан едиб ки, КТМТ-нин Газахыстандакы коллектив сүлһмәрамлы гүввәләри силаһлы дәстәләрин һүҹуму заманы силаһдан истифадә етмәк һүгугуна маликдир. "Бәли, бу һалда силаһдан истифадә олунаҹаг. Коллектив сүлһмәрамлы гүввәләрин һәрби гуллугчуларынын белә һүгуглары вар”, - дејә о, силаһлы дәстәләр сүлһмәрамлы гүввәләрин горудуғу објектә һүҹум едәрсә, нә баш верәҹәји илә бағлы суалы ҹавабландырыб.

342/