Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, Сентјабрын 28-дә Москвада "Хәзәрдә Русија, Азәрбајҹан вә Иранын әмәкдашлығы. Сәнаје әмәкдашлығы вә транзит потенсиалы" мөвзусунда бејнәлхалг дәјирми маса кечирилиб.
Мәлумата ҝөрә, тәдбир "Шимал-Ҹәнуб" политолоҝија мәркәзи тәрәфиндән "Baku Netwоrk" Бејнәлхалг сијасәт вә тәһлүкәсизлик мәркәзи илә бирҝә тәшкил едилиб.
Дәјирми масанын модераторлары "Баку Нетwорк" Бејнәлхалг сијасәт вә тәһлүкәсизлик мәркәзинин директору Ҝүлнарә Мәммәдзадә вә "Шимал-Ҹәнуб" политолоҝија мәркәзинин иҹрачы директору Анжелика Трапезникова олуб.
Тәдбирдә сәнаје паркларынын инкишафы вә лиманларда азад игтисади зоналар, дәмирјол вә автомобил маршрутлары үзрә "Шимал-Ҹәнуб" бејнәлхалг нәглијјат дәһлизи, дөвләтләр арасында јүк ахынынын артырылмасы вә бурахылыш ҝүҹүнүн ҝенишләндирилмәси имканлары, Русија, Азәрбајҹан вә Иран ҝәмичилијинин инкишафы, реҝион дөвләтләринин интеграсија динамикасында әмәкдашлыг лајиһәләринин инкишафы вә ҝәләҹәк реҝионал интеграсија тапшырыглары мүзакирә олунуб.
Дәјирми масанын хүсуси гонағы Иранын Русијадакы сәфири Казым Ҹәлали олуб. О билдириб ки, Иран "Шимал-Ҹәнуб" лајиһәсинин реаллашдырылмасына садигдир вә бунун үчүн Рәшт-Астара дәмир јолунун тикинтисинин баша чатдырылмасы тәләб олунур.
Сәфир вурғулајыб ки, Иран Азәрбајҹан вә Русија илә дәмирјол әлагәсини инкишаф етдирмәјә һазырдыр. О, һәмчинин әлавә едиб ки, Иран тезликлә Азәрбајҹан вә Русија илә автомобил әлагәсини ачаҹаг: "Бу, автомобил јүк дашымаларынын инкишафына хидмәт едәҹәк. Биз игтисади әмәкдашлыг үчүн бүтүн имканлары әлагәләндирмәлијик. Индики һалда бүтүн мәсәләләри разылашдырмалыјыг ки, сәрһәдләрдә јүк машынларынын ләнҝимәси олмасын".
Иранын Јол вә Шәһәрсалма Назирлијинин нүмајәндәси Һәми Рза Һејдәри вурғулајыб ки, Иран "Шимал-Ҹәнуб" дәһлизинин тикинтисинә наил олаҹаг вә о әлавә едиб ки, бу лајиһәнин апарыҹы гүввәләри Иран, Русија вә Азәрбајҹандыр: "Биз, һәмчинин өлкәләримиз арасында автомобил вә дәмир јолларынын салынмасы үзәриндә ишләјирик. Биз һәм дә нәглијјат лајиһәләринин рәгәмсал тәрәфләри үзәриндә дә ишләмәлијик".
Дәјирми масада, һәмчинин Иранын 2013-2016-ҹы илләрдә хариҹи ишләр назиринин мүавини, Сијаси вә Бејнәлхалг Арашдырмалар Институтунун президенти Казым Сәҹапур, "Әнзәли" азад зона тәшкилатынын сәдри Әли Осат Әкбәри Мүгәддәм, "Ҹәнуби Гафгаз" политолоҝија клубунун рәһбәри Илгар Вәлизадә вә АДА Университетинин проректору Фариз Исмајылзадә иштирак едиб.
(Тәрҹүмә: ОрханНәбијев)
Диггәт: Хәбәрдән Истифадә Етдикдә Мәнбәјә Истинад Лазымдыр!
