Ермәнистана силаһ тәдарүкү давам едәҹәк-ТӘҺЛИЛ

АБНА24 Хәбәр Верир, Азәрбајҹан Республикасынын президенти Илһам Әлијевин “ҸНН Түрк” ТВ-јә мүсаһибәдә Русијаја Ермәнистаны силаһландырмасына ҝөрә шикајәтләнмәси вә ону үстүөртүлү шәкилдә әбәс јерә Ҹәнуби Гафгазда баланс јаратмаға чалышмагда иттиһам етмәси Кремлин сајмазјана ҹавабы илә үзләшиб.

Русија Хариҹи Ишләр Назирлијинин сөзчүсү Марија Захарова президентин һәр ики бәјанаты илә бағлы журналистләрин суалларыны ҹавабландыраркән дејиб: "Силаһ ихраҹы Русијанын суверен һүгугудур. Јәни Русија рәсмиси дипломатик дилдә Ермәнистана силаһ верилмәсинин давам етдириләҹәјини бәјан етмиш олуб. О, һәмчинин билдириб: “Азәрбајҹан вә Ермәнистанла мүвафиг әмәкдашлыг ичиндәјик. Ики өлкә арасында балансын горунмасына хүсуси диггәт едирик". Бу исә Азәрбајҹан дөвләт башчысынын икинҹи бәјанатына ачыг ҹавабдыр. О демәкдир ки, Азәрбајҹанла Ермәнистанын арасында балансын позулмасына имкан вермәрик.

Хатырладаг ки, августун орталарында Русијанын мүдафиә назири Серҝеј Шојгу ермәни һәмкары илә ҝөрүшдә Ермәнистаны Русијанын Ҹәнуби Гафгаздакы ән өнәмли стратежи мүттәфиги адландырыб вә ермәни һәмкарына символик характер дашыјан гылынҹ һәдијјә едиб. О, ермәни ҝенерала гылынҹ һәдијјә едәркән, "Ермәнистана Русијадан силаһ тәдарүкү артыг башланды" демәклә, әслиндә, Азәрбајҹанын нараһатлығына мәһәл гојмадан Кремлин өз мүттәфигинә һәрби техника ҝөндәрәҹәјинә ејһам вурмуш олду.

Бу биринҹи дәфә дејил ки, Азәрбајҹан президенти Ермәнистанын силаһландырылмасына ҝөрә Русијаја етираз едир вә она гоншу өлкәдән гәнаәтбәхш ҹаваб верилмир. Президент Илһам Әлијев апрелин 13-дә АДА Университетиндә кечирилән “Ҹәнуби Гафгаза јени бахыш: мүнагишәдән сонра инкишаф вә әмәкдашлыг” конфрансында Азәрбајҹанын Шушаја атылан “Искәндәр-М” ракетләри илә бағлы Русијадан ҹаваб ала билмәдијини сөјләмишди.

“Ермәнистанын Баш назири Пашинјан “Искәндәр”дән истифадә етдикләрини дејир, Русија Мүдафиә Назирлијинин рәсми тәмсилчиси исә дејир ки, атылмајыб. Бу, нә мәнаја ҝәлир? Биз билирик бу ракетләр нә вахт вә нә үчүн атылыб. Анҹаг бизә рәсми ҹаваб верилмәлидир, бу ракетләри бизә атан Ермәнистандан вә Русијадан. Бу ракет системләри ја Ермәнистана верилиб, јахуд да ки, ганунсуз јолларла Русијадан оғурланараг чыхарылыб. Бу суаллара ҹаваб јохдур”- дејә өлкә башчысы бәјан етмишди.

Һазырда Русијанын Азәрбајҹана беләҹә јухарыдан ашағы мүнасибәт нүмајиш етдирмәси өлкәнин сијаси даирәләриндә ән чох мүбаһисә доғуран мәсәләјә чеврилиб. Хүсусилә дә һөкумәтин оппонентләри Русијанын етинасызлығыны рәсми Бакынын јүрүтдүјү сијасәтин тәбии нәтиҹәси кими характеризә едирләр. Бунунла әлагәдар АХҸП сәдри өз фејсбук һесабында јазыр ки, Ермәнистана силаһ ҝөндәрмәсинә ҝөрә Илһам Әлијевин Русијаны јүнҝүлҹә тәнгид етмәсинә Русија рәсмиси тәгрибән "әҹәб едирик" типли ҹаваб вериб.

Әли Кәримлинин фикринҹә, реҝионда ҝүҹ балансыны горумаг зәрурәти исә бирбаша тәһдиддир. Азәрбајҹанла Ермәнистан арасында ҝүҹ балансы неҹә горуна биләр? Русија неҹә бу 2 өлкәнин ҝүҹүнү баланслашдыраҹаг? Партија сәдри гејд едиб ки, Русијанын баланс јаратма сијасәти бәллидир: Ермәнистаны өз һесабларына силаһландырмаг, о ҹүмләдән, ән мүасир силаһларла. Зәрурәт јарандыгда исә Ермәнистан вә Гарабағдакы Русија силаһлы гүввәләри васитәсилә Ермәнистана гејри-рәсми һәрби јардым етмәк.

Јери ҝәлмишкән Ермәнистан Тәһлүкәсизлик Шурасынын катиби Армен Григорјан республиканын ән гыса мүддәтдә ордуну модернләшдирәҹәји барәдә мәлумат вериб. Григорјан Иҹтимаи телевизијаја мүсаһибәсиндә дејиб: “Кечән илин нојабрындан етибарән биз Русијадан өз арсеналымызы јениләмәк вә мүасирләшдирмәк үчүн хејли силаһ алмышыг. Бу просес фасиләсиз олуб”.

Ҝөрүндүјү кими Русија давамлы олараг Ермәнистан ордусуну мүасир силаһларла тәмин етмәклә мәшғулдур. Бу ишдә мәгсәд бир тәрәфдән Ермәнистаны өз орбитиндә сахламаг вә онун Гәрбин һәрби тәсисатларына интеграсијасына мане олмаг, башга тәрәфдән исә Азәрбајҹаны өзүнә мүти етмәкдән өтрү она гаршы психоложи мүһарибәни давам етдирмәк вә Ҹәнуби Гафгазда јеҝанә сөз саһибинин мәһз Русија олдуғуну Бакынын диггәтинә чатдырмагдыр.

342/