АБНА24 Хәбәр Верир, Азәрбајҹан Республикасы Мүдафиә Назирлијиндән медиаја верилән мәлумата ҝөрә, гонаглары саламлајан Азәрбајҹанын Мүдафиә назири вурғулајыб ки, ики дөвләтин башчыларынын достлуг мүнасибәтләри өлкәләрин арасында бүтүн саһәләрдә әлагәләрин динамик инкишафыны мүәјјәнләшдирир. Бөлҝәдәки һәрби-сијаси вәзијјәтә тохунан З.Һәсәнов билдириб ки, Ермәнистанын ишғалчылыг сијасәти тәкҹә Азәрбајҹан Республикасында дејил бүтүн реҝионда сүлһә, сабитлијә, тәһлүкәсизлијә әсас тәһдиддир. Ермәнистан тәрәфинин Товуз рајону истигамәтиндә төрәтдији сон тәхрибатлара да тохунан З.Һәсәнов гејд едиб ки, бу, Азәрбајҹан илә МДБ өлкәләри арасында әлагәләрин сарсыдылмасына јөнәлдилмишдир. Ермәнистан-Азәрбајҹан Дағлыг Гарабағ мүнагишәсинин һәллиндә Русија Федерасијасынын ролуну гејд едән Азәрбајҹанын мүдафиә назири вурғулајыб ки, бүтүн бејнәлхалг тәшкилатлар кими Русија да Азәрбајҹан Республикасынын әрази бүтөвлүјүнү таныјыр, онун мүстәгиллијинә вә суверенлијинә һөрмәтлә јанашыр. Сәмими гәбула ҝөрә Азәрбајҹан тәрәфинә тәшәккүрүнү билдирән Русијанын мүдафиә назири Ермәнистанла сәрһәддә баш вермиш сон дөјүш тоггушмалары заманы шәһид олмуш Азәрбајҹан һәрби гуллугчуларынын аилә үзвләринә дәрин һүзнлә башсағлығы вериб. Орду ҝенералы С.Шојгу Русијадан Ермәнистана тәјјарәләр васитәсилә силаһларын дашынмасы барәдә сон заманлар мәтбуатда јајылан мәлуматлара мүнасибәт билдирәрәк гејд едиб ки, бу һәрби дашынмалар Ермәнистана силаһ вә һәрби техниканын, һәмчинин диҝәр һәрби әмлакын тәдарүкү үчүн дејил, Русијанын бу өлкәдәки 102-ҹи һәрби базасына ҝенишмигјаслы тикинти ишләринин апарылмасы үчүн нәзәрдә тутулан тикинти материалларынын чатдырылмасы вә һәмин базада хидмәт едән чағырышчыларын ротасијасы мәгсәдилә һәјата кечирилиб. О, хүсусилә гејд едиб ки, Русија бу ҝүнәдәк Азәрбајҹана гаршы јөнәлән һеч бир аддым атмајыб вә бундан сонра да атмајаҹаг. Тәрәфләр һәмчинин бејнәлхалг вә реҝионал тәһлүкәсизлик мәсәләләри, һәрби саһәдә әмәкдашлығын мөвҹуд вәзијјәти вә әлагәләрин инкишаф перспективләрини мүзакирә едиб, һәрби-техники әмәкдашлыг саһәсиндә гаршылыглы мараг доғуран диҝәр мәсәләләр әтрафында фикир мүбадиләси апарыблар.
342/
