АБНА24 хәбәр верир, Мәһәммәд Ҹавад Зәриф бу ҝүн ахшам видеоконфранс форматда кечирилән "Аралыг Дәнизи Диалоглары" (МЕД 2020) иҹласында Теһран үчүн АБШ-ын нөвбәти сечкиләриндә кимин галиб ҝәләҹәjинин әһәмиjjәти олмадығыны вурғулаjыб вә хатырладыб ки, Вашингтонун Ирана мүнасибәти ислаһ олунмалыдыр вә АБШ-ын ҝәләҹәк һөкумәти бу өлк тәрәфиндән Иран халгына вурулан зиjанлара ҹавабдеһ олмалыдыр. Дипломатиjанын бүтүн дүнjа проблемләринин һәллиндә ән тәсирли васитә олдуғуну деjән Зәриф геjд едиб ки, Әһатәли Мүштәрәк Тәшәббүс Програмынын (ӘМТП) имзаланмасындан 5 илин өтмәсинә бахмаjараг, гаршы тәрәфләрин бәзисинин саботажлары вә авропалыларын сәдагәтсизлиjи сәбәбиндән Иран һәлә дә бу анлашманын игтисади мәзиjjәтләриндән фаjдалана билмәjиб АБШ-ын Ирана гаршы силаһ ембаргосунун мүддәтини узалтмаг ҹәһдләринә ҝәлинҹә исә Иранын хариҹи ишләр назири деjиб: "Бу мәсәлә нүвә анлашмасында разылашдырылыб вә һеч ким ону дәjишдирә билмәз". Зәриф АБШ-ын мүхтәлиф өлкәләрә ҝениш мигjасда силаһ вә һәрби техника сатмасыны бүтүн дүнjада хаос вә де-стабиллик амилләридән бири кими гиjмәтләндириб вә вурғулаjыб ки, АБШ-ын һәр ил тәкҹә Әрәбистана сатдығы силаһларын мадди дәjәри Иранын үмуми мүдафиә вә һәрби бүдҹәсиндән үч дәфә чохдур. Иран ХИН башчысы бу онлаjн иҹласын давамында бүтүн өлкәләрин Суриjадакы вәзиjjәтин jахшылашдырылмасына jардым етмәли олдугларыны вурғулаjараг, деjиб: "Бүтүн хариҹи оjунчулар өз истәкләрини Суриjа халгына диктә етмәк деjил, тәкҹә вәзиjjәтин jахшылашдырылмасыны асанлашдырмалыдырлар". Зәриф, һәмчинин Иjордан чаjынын гәрб саһилинин ишғал олунмуш әразиләрә илһаг едилмәси мәсәләсинә дә тохунуб вә хатырладыб ки, рәсми Теһранын бу проблем үчүн һәлл jолу демократиjа вә референдумун кечирилмәсидир ки, фәләстинлиләр өз әразиләри илә бағлы гәрар верә билсинләр. Бу иҹлас, Иранын Хариҹи Ишләр Назирлиjинин Беjнәлхалг вә Сиjаси Арашдырмалар Бүросу вә Италиjанын Хариҹи Сиjасәт Тәдгигатлары Институтунун сәjләри илә Аралыг Дәнизи Диалогу чәрчивәсиндә кечирилиб.
342/
