Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, јүксәк Сечки Гуруму Истанбулун рајонлары үзрә сәс сајыларыны һесабладыгдан вә јекун нәтиҹәләр мәлум олдугдан сонра АКП-нин мүраҹиәтини дәјәрләндирәҹәк
Түркијәнин һаким Әдаләт вә Инкишаф Партијасы (АКП) Истанбулда бәләдијјә сечкиләринин нәтиҹәләринин ләғв олунмасы вә јенидән кечирилмәси илә бағлы фөвгәладә етираз һаггындан истифадә едиб.
Јүксәк Сечки Гуруму (ЈСК) Истанбулун рајонлары үзрә сәс сајыларыны һесабладыгдан вә јекун нәтиҹәләр мәлум олдугдан сонра АКП-нин мүраҹиәтини дәјәрләндирәҹәк.
Түркијә Президенти Рәҹәб Тајјиб Әрдоған апрелин 9-да Русијадан гајыдаркән тәјјарәдә журналистләрә вердији ачыгламада гејд едиб ки, Истанбулда бәләдијјә сечкиләриндә сәсвермә заманы сахтакарлыглара јол верилиб: "Шүбһәли мәгамлар сахтакарлыг олдуғуну ҝөстәрир. Әслиндә, сәмими давраныш олса, бу, сечкинин ләғвинә апарар".
Гејд едәк ки, апрелин 9-да АКП-нин сәдр мүавини Али Иһсан Јавуз 31 март сечкиләринин нәтиҹәләри вә етираз әризәләри илә бағлы ачыгламалар верәркән, "Истанбулда бәләдијјә сечкиләринин јенидән кечирилмәсини истәјирик" дејиб.
Һәр бир сијаси партијанын фөвгәладә етираз һаггынын олдуғуну вурғулајан Јавуз гејд едиб: "Фөвгәладә етираз һаггымыздан истифадә едәҹәјик. Сечкиләрин нәтиҹәләринә чох тәсир едә биләҹәк һаллар вар вә Истанбулда јенидән сечкиләрин кечирилмәсини истәјирик".
Јавуз бир журналистин "Јүксәк Сечки Гурулуму сечкинин тәкрар кечирилмәси тәләбәни рәдд едәрсә, нә едәҹәксиниз" суалына ҹаваб олараг гурумун гәрарына һөрмәтлә јанашаҹагларыны билдириб: "Амма шүбһә ортадан галхаҹаг".
Түркијәнин Миллијјәтчи Һәрәкат Партијасы (МҺП) да АКП-нин Истанбулда тәкрар сечки кечирилмәси тәләбини дәстәкләјиб. "Сечкиләрин тәкрар кечирилмәси демократијанын тәләбләриндән биридир. Иҹтимаи гарышыглыг әвәзинә, сечки гутуларына јенидән ҝедиб, Түркијәнин сабитлијини тәмин етмәк даһа мәнтиглидир. Виҹданы сакит гоја биләҹәк јени бир сечки дүшүнүлә биләр" – Бахчалы бәјан едиб.
Истанбулда сечкиләрин нәтиҹәләринин ләғв олунаҹағы тәгдирдә, ЈСК јенидән сечкиләрин һансы тарихдә кечириләҹәјини дә ачыглајыб. Белә ки, гурумун 29 март "Ресми Ҝазете"дә јајымланан гәрарында тәкрар сечкиләрин 2 ијун тарихиндә кечириләҹәји гејд олунуб.
Хатырладаг ки, мартын 31-дә Түркијәдә бәләдијјә сечкиләри кечирилиб. Игтидардакы АКП-нин дә дахил олдуғу Ҹүмһур Иттифагы Истанбулда сечкини удузмуш кими ҝөрүнүр.
Түркијә президенти вә Әдаләт вә Инкишаф Партијасынын сәдри Рәҹәб Тајјиб Әрдоған өлкәдә кечирилән бәләдијјә сечкиләринин нәтиҹәләрини шәрһ едиб: "Түркијә халгы артыг 15-ҹи дәфәдир бизи биринҹи едир. АКП вә Ҹүмһур Иттифагы илә бирликдә сечкиләрә гатылдығымыз јерләрдә индијә гәдәр 16 бөјүк шәһәрдә, 24 вилајәт, 538 рајон, 200 гәсәбәдә топлам олараг 778 бәләдијјә сәдрлијини газандыг. Бу исә өлкәмиздә олан бәләдијјәләрин 56%-нин АКП тәрәфиндән идарә олунаҹағы анламына ҝәлир".
Диггәт: Хәбәрдән истифадә етдикдә мәнбәјә истинад лазымдыр
