ӘһлиБејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Азәрбајҹан Республикасынын Президенти Илһам Әлијев февралын 12-дә РЕАЛ телевизијасына мүсаһибәсиндә илк олараг билдириб ки, өлкәси хариҹи сијасәтдә баланс ардынҹа дејил, милли марагларыны горујур.
Азәрбајҹан Республикасынын Президенти дејиб: “Бәзи хариҹи мәтбу органларда, експерт ҹәмијјәтләриндә белә бир фикир сөјләнилир ки, Азәрбајҹан баланслашдырылмыш, таразлашдырылмыш сијасәт апарыр вә елә бил ки, бу реҝионда баланс ахтарыр. Бу, белә дејил. Биз баланс ахтармырыг. Биз, садәҹә олараг, хариҹи сијасәтимизлә өз милли марагларымызы горујуруг вә мүмкүн олан рискләри азалдырыг. Бизим хариҹи сијасәтимиз мәһз милли мараглар үзәриндә гурулуб. Милли мараглар нәји диктә едирсә, биз хариҹи сијасәтдә ону да етмәлијик вә едирик. Дејә биләрәм ки, буна мүвәффәг олмушуг.”
Илһам Әлијев мүсаһибәсиндә мүхтәлиф форматларда гоншу өлкәләрә дә хүсуси өнәм вердијини билдириб: “Биз бу ҹоғрафијада, бу реҝионда јашајырыг. Әлбәттә ки, гоншуларла әлагәләримиз хүсуси әһәмијјәт дашыјыр, һәр бир өлкә үчүн. Мән һесаб едирәм ки, һәр бир өлкә истәјәр ки, онун гоншулуғунда дост бир өлкә олсун. Биз сон илләр әрзиндә бүтүн гоншуларла, - тәбии ки, Ермәнистан истисна олмагла, - достлуг мүнасибәтләримизи даһа да ҝүҹләндирмишик, јени сәвијјәјә галдырмышыг. Гоншуларла јахшы мүнасибәтләр олмадан биз енержи, нәглијјат лајиһәләримизи иҹра едә биләрдикми? Әлбәттә ки, јох. Мән гејд етдим ки, бу ҝүн Азәрбајҹан Аврасијанын нәглијјат мәркәзинә чеврилиб. Биз гоншуларсыз буна наил ола биләрдикми? Әлбәттә ки, јох. Нәинки јахын гоншуларымызла, биз даһа бөјүк ҹоғрафијаны әһатә едән әмәкдашлыг форматы јарадырыг. Мәһз бу әмәкдашлыг форматы имкан верир ки, биз өз нәһәнҝ, трансмилли лајиһәләримизи уғурла вә вахтында иҹра едәк. Она ҝөрә бу, бизим үчүн стратежи әһәмијјәт дашыјан бир јанашмадыр. Мән шадам ки, бу ҝүн гоншуларымызла бизим әлагәләримиз достлуг, меһрибан гоншулуг, әмәкдашлыг үзәриндә гурулуб вә бу әмәкдашлығын чох бөјүк ҝәләҹәји вар. ”
Азәрбајҹан Республикасынын Президенти азәрбајҹана ән чох дәстәји елә мүсәлман өлкәләрдән алдығыны дејир: “Ејни заманда, Азәрбајҹан мүсәлман аләминин бир парчасыдыр. Мүсәлман өлкәләри илә әлагәләр бизим үчүн хүсуси әһәмијјәт дашыјыр. Ону да билдирмәлијәм ки, бејнәлхалг тәшкилатларда бизи ән чох дәстәкләјән мүсәлман өлкәләридир. Азәрбајҹан Ислам Әмәкдашлыг Тәшкилаты чәрчивәсиндә чох мүсбәт рол ојнајыр вә бу рол јүксәк гијмәтләндирилир. Билирсиниз, мүсәлман аләминдә бәзи өлкәләр бир-бири илә һәлә ки, лазыми сәвијјәдә, јумшаг десәк, әлагәләр гура билмәмишләр. Анҹаг Азәрбајҹан бу зиддијјәтләрин азалдылмасында өз ролуну ојнајыр вә бу рол јүксәк гијмәтләндирилир. Тәсадүфи дејил ки, Ислам Әмәкдашлыг Тәшкилатынын рәһбәрләри Азәрбајҹанын ролуну чох јүксәк гијмәтләндирирләр. Биз Ислам һәмрәјлијинин ҝүҹләнмәсинә бөјүк төһфә веририк. Бакыда Ислам Һәмрәјлији Ојунларынын кечирилмәси, садәҹә, бир идман јарышы дејилди. Бу, бүтүн мүсәлман өлкәләринин ҝәнҹләрини, идманчыларыны бир араја ҝәтирән достлуг, һәмрәјлик бајрамы иди. Бу Ојунларын јүксәк сәвијјәдә кечирилмәси әлбәттә ки, мүсәлман аләминдә бизим ролумузу даһа да ҝүҹләндирди. Она ҝөрә хариҹи сијасәтимизин өнәмли истигамәти мүсәлман өлкәләри илә әмәкдашлыгла бағлыдыр. Биз Гошулмама Һәрәкатынын үзвүјүк. Бир нечә ил бундан әввәл үзв олмушуг. Амма дәрһал Гошулмама Һәрәкаты, - БМТ-дән сонра икинҹи бөјүк тәшкилатдыр, - мүнагишә илә бағлы чох әдаләтли гәтнамә гәбул етмишдир. Биз Гошулмама Һәрәкатына сәдрлик едәҹәјик. Јәни, бизим бејнәлхалг нүфузумуз артыр. Биз 155 өлкәнин дәстәји илә БМТ Тәһлүкәсизлик Шурасына үзв сечилмишик. Өзү дә чох чәтин бир мүбаризәдә. Он алты турдан сонра биз буна наил ола билмишик. Јәни, бу, нәји ҝөстәрир? Ону ҝөстәрир ки, бизә инам, рәғбәт вар, бизим мүстәгил сијасәтимизә дәстәк вар. Бу ҝүн Азәрбајҹан дүнјада чох етибарлы тәрәфдаш кими таныныр. Тәрәфдашлар билирләр ки, бизим сөзүмүзүн имзамыз гәдәр гүввәси, дәјәри вар. Она ҝөрә һесаб едирәм ки, хариҹи сијасәтлә бағлы апарылан ишләр тәгдирәлајигдир. Хариҹи сијасәт дахили сијасәтин мәнтиги давамыдыр. Үмид едирәм ки, бундан сонра да биз бу истигамәтдә уғурлар јолу илә ҝедәҹәјик.”
Диггәт: Хәбәрдән истифадә етдикдә мәнбәјә истинад лазымдыр
