Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Иран Ислам Республикасынын мүгәддәс Гум шәһәриндә дүнјанын 136 өлкәсиндән олан әҹнәби тәләбәләр илә бирҝә тәһсил алан азәрбајҹанлы тәләбәләр Азәрбајҹан халгынын мүгавимәт символу олан "Ганлы 20 Јанвар" хатирәсинин 29-ҹу илдөнүмү мүнасибәтилә тәдбир кечирибләр.
Имам Хомејни (рәһмәтуллаһи әлејһ) адына мәдрәсәдә тәшкил олунан тәдбирдә "Ганлы 20 Јанвар” хатирәсини ҹанландыран фотосәрҝи, үзәриндә Фарс вә инҝилис дилләриндә јазылан јазылар нүмајиш етдирилиб...
Сонда Азәрбајҹан тәләбәләринин һазырладығы бәјанат охунараг мәҹлисә хитам верилиб.
Бәјанатын там мәтнин сајтымызын һөрмәтли зијарәтчиләринә тәгдим едирик:
Бисми Рәббиш-Шүһәда
Гафгазын Шиә бөлҝәси олан Азәрбајҹана гаршы 70 ил давам едән Совет тәҹавүзү 1990-ҹы илин 20 јанвар тарихиндә дәһшәтли фаҹиә илә нәтиҹәләнди. 29 ил өнҹә төрәдилән гәтлиам тарихимизин хронолоҝијасына ән ағыр ҹинајәтләрдән бири кими һәкк олунду.
1990-ҹы ил јанварын 19-дан 20-ә кечән ҝеҹә ССРИ Мүдафиә Назирлијинин, Дахили Ишләр Назирлијинин вә Дөвләт Тәһлүкәсизлик Комитәсинин бирҝә һәјата кечирдији әмәлијјат нәтиҹәсиндә бир нечә истигамәтдә Бакыја дахил олан силаһлы гошунлар 170-ә јахын мүлки шәхси өлдүрмүш, 600- дән чох адам јараланмыш, өлчүјәҝәлмәз дағынтылар төрәдилмишдир.
Азәрбајҹан Шиәсинин азадлығы вә әрази бүтөвлүјү уғрунда мүбаризә тарихинә гәһрәманлыг сәһифәси кими дахил олмуш 1990-ҹы илин 20 Јанварында өлкәмизә гаршы әрази иддиалары ирәли сүрән Ермәнистанын тәҹавүзкар һәрәкәтләриндән вә кечмиш ССРИ рәһбәрлијинин онлара һавадарлығындан һиддәтләнән, Бакынын күчәләринә вә мејданларына чыхараг буна өз гәти етиразыны билдирән ҝениш халг күтләләринә гаршы совет ордусунун дөјүш һиссәләринин јеридилмәси Азәрбајҹанда мисли ҝөрүнмәмиш Мүгавимәтә ҝәтириб чыхарды.
Јаддашлара Гара Јанвар ҝеҹәси кими һәкк олунмуш һәмин ганлы тарих һәм шәһидләримизин аным ҝүнү, һәм дә Азәрбајҹанын әрази бүтөвлүјү уғрунда мүбаризә апаран халгымызын бирлији, һәмрәјлији, фәхр вә шәрәф ҝүнүдүр. Бу һадисәләр бир даһа нүмајиш етдирди ки, халгымыз мүстәгиллијинин, позулмуш һүгугларынын бәрпа олунмасы наминә савашмаг әзминдәдир.
Белә ки, 1988-ҹи илдән башлајараг Азәрбајҹанын ајрылмаз тәркиб һиссәси олан Дағлыг Гарабағ Мухтар Вилајәтиндә баш галдыран ермәни сепаратизминә кечмиш ССРИ рәһбәрлији тәрәфиндән дәстәк верилмәси вә өлкәмизә гаршы гәрәзли мөвге нәтиҹәсиндә ады чәкилән вилајәтин идарә вә тәшкилатларынын тәдриҹән республикамызын табелијиндән чыхарылмасы, азәрбајҹанлы Шиәләрин Ермәнистандакы тарихи-етник торпагларындан депортасија едилмәси, ағыр ишҝәнҹәләрә, зоракылыглара мәруз галмасы халгымызын сәбрини түкәндирмишди. Һәмин дөврдәки Совет һөкумәтинин ҝөстәриши илә халгымызын һаглы етиразыны боғмаг, Азәрбајҹанда ҝенишләнән милли-азадлыг һәрәкатынын гаршысыны алмаг үчүн 20 Јанвар гырғыны төрәдилди.
Бакыја дахил олан силаһлы гошунлар миллијјәтиндән, јашындан вә ҹинсиндән асылы олмајараг, 168 нәфәр силаһсыз мүлки шәхси, о ҹүмләдән ушаглары, гадынлары вә јашлылары амансызҹасына өлдүрмүш, пајтахтда вә башга әразиләрдә 744 динҹ, ҝүнаһсыз инсан јараланмыш, јүзләрлә адам иткин дүшмүш, 841 нәфәр ганунсуз олараг һәбс едилмишдир. Һәмин һадисәләр заманы һәтта јаралылары чыхаран тәҹили тибби јардым машынларына вә һәкимләрә дә атәш ачылмыш, нәтиҹәдә тибб ишчиләри шәһид олмуш, јараланмышлар. Гадаған едилмиш силаһ вә сурсатдан истифадә етмәклә өлчүјәҝәлмәз дағынтылар төрәдилмишдир. Һадисә илә бағлы мәлуматын әһалидән ҝизләдилмәси мәгсәдилә ССРИ Дөвләт Тәһлүкәсизлик Комитәсинин тәшкил етдији тәхрибат нәтиҹәсиндә Республика телевизијасынын енержи блоку партладылмышдыр.
О дөврдә Совет дөвләтинин рәһбәрлији бејнәлхалг һүгуг нормаларыны кобудҹасына позараг, һәмин ҹинајәтлә Ермәнистана дәстәк вермиш, нәтиҹәдә Азәрбајҹана гаршы узунмүддәтли ермәни тәҹавүзү, етник тәмизләмә, сојгырымы баш вермиш, республикамызын торпагларынын 20 фаизи зәбт едилмиш, Ермәнистан әразисиндән, өлкәмизин ајрылмаз тәркиб һиссәси олан Дағлыг Гарабағ вә әтраф једди рајондан јерли азәрбајҹанлы әһали зорла говулмушдур. Бу һадисәләр күтләви шәкилдә динҹ әһалинин фундаментал һүгугларынын позулмасы илә нәтиҹәләнмиш вә индијәдәк бир милјондан чох сојдашымыз гачгын вә мәҹбури көчкүн һәјаты јашајыр.
Азәрбајҹан тәләбәләри тәрәфиндән верилән Бәјанат Азәрбајҹан Республикасынын президентинә, Азәрбајҹан Республикасынын Хариҹи Ишләр Назирлијинә, БМТ-нин Баш Катибинә, БМТ-нин Тәһлүкәсизлик Шурасына, БМТ-нин Инсан Һүгуглары үзрә Али Комиссарына, БМТ-нин Гачгынлар үзрә Али Комиссарына, БМТ-нин Инсан Һүгуглары Шурасына, ЈУНИСЕФ-ә, ЈУНЕСКО-ја, Авропа Иттифагына, Авропа Шурасына, АТӘТ-ә, Бејнәлхалг вә Авропа Омбудсманлар Институтларына, Асија Омбудсманлар Ассосиасијасына, Ислам Әмәкдашлыг Тәшкилатына вә бу гурума үзв дөвләтләрин Омбудсманлар Ассосиасијасына, Авропа Ушаг Һүгуглары Омбудсманлары Шәбәкәсинә, Бејнәлхалг Сүлһ Бүросуна, мүхтәлиф өлкәләрин омбудсманларына, Азәрбајҹан Республикасынын хариҹи өлкәләрдәки вә хариҹи өлкәләрин Азәрбајҹандакы сәфирликләринә, Азәрбајҹанын диаспор тәшкилатларына үнванланыб.
"Руһдан дүшмәјин вә гәмҝин олмајын. Һалбуки, әҝәр мөмин олсаныз, сиз (Аллаһ јанында кафирләрдән) чох јүксәкдә дурурсунуз!"
(Гурани Кәрим, сүрә Али Имран, ајә 139.)
Диггәт: Хәбәрдән истифадә етдикдә мәнбәјә истинад лазымдыр
