Тале Бағырзадәјә ишҝәнҹә верилә биләҹәји истисна дејир- Јалчын Иманов

Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Вәкил Јалчын Иманова Тале Бағырзадә вә Фуад Гәһрәманлы илә ҝөрүш иҹазәси верилмир.

Онун сөзләринә ҝөрә, өтән ҝүн (24 ијул) Күрдәханыдакы 1 Сајлы Истинтаг Тәҹридханасында адлары чәкилән шәхсләрлә ҝөрүш үчүн она иҹазә верилмәјиб. Истинтаг тәҹридханасынын рәиси билдириб ки, ҝөрүш үчүн јени ордер лазымдыр. Јалчын Иманов исә мүвәкилләри јени һәбсханаја көчүрүләнәдәк һазыркы мүгавиләнин гүввәдә олдуғуну дејир:

"Бу ҝүн ҝөрүш үчүн Күрдәханы тәҹридханасына ҝетмишдим. Тәҹридхананын рәиси Рәшид Сәфәров мәнә билдирди ки, ҝөрүш үчүн јени ордер лазымдыр. Она дедим ки, мүвәккилләрим һәлә дә Күрдәханы тәҹридханасында олдуғу үчүн јени ордер лазым дејил, бу тәләб ганунсуздур. Онлар диҝәр ҹәзачәкмә мүәссисәләринә вә ја Гобустан һәбсханасына көчүрүләндән сонра јени мүгавиләјәә еһтијаҹ вар"

Вәкил тәҹридхана рәисинә Бакы Апеллјасија Мәһкәмәсинин гәрарынын вәкилләрә верилмәдијини, бу сәбәбдән гәрарда нә јазылдығындан хәбәрсиз олдугларыны билдириб:

"Биз мәһкәмәнин гәрарындан мәлуматсыз олдуғумуз һалда, јени мүгавилә бағланмасы тәләби абсурддур. Биз гәрарла таныш олмалыјыг ки, она ујғун олараг, мүгавилә бағлајаг вә ја бағламајаг"

Вәкил билдириб ки, баш верәнләрлә бағлы Пенитенсиар Хидмәтә мүраҹиәт едәҹәк, амма ону нараһат едән башга бир еһтималдыр. О, 20 ијулда Бакы Апеллјасија Мәһкәмәсиндә баш верән инсидентдән сонра Тале Бағырзадә, Фуад Гәһрәманлы вә диҝәрләринин ишҝәнҹәјә мәруз гала биләҹәјини дејир:

"Мәни нараһат едән әсас мәсәлә Тале Бағырзадә, Фуад Гәһрәманлы вә диҝәрләринин ишҝәнҹәјә мәруз галмасы еһтималыдыр. Онлара гаршы физики тәзјигләрлә әлагәдар ҝизләдилдикләринә ҝөрә ҝөрүшә иҹазә верилмәдији истисна олунмур".

Ј. Иманова мәлумат верилиб ки, Аппелјасија Мәһкәмәсиндә баш верән инсидентдән сонра Тале Бағырзадә, Фуад Гәһрәманлы, Аббас Һүсејн вә Әли Нурәлијев 5 ҝүнлүк "карс"а салыныб.

Белә ки, һәмин просесдә һакимин тәгсирләндириләнләрә әлавәләр етмәк үчүн иҹазә вермәмәси наразылыгла гаршыланмышды. Бундан сонра тәгсирләндириләнләр һакимә су бутулкасы вә ајаггабы атмышдылар. Мәһкәмә салонуну тәрк едән һакимләр тәхминән 2 саатлыг фасиләдән сонра вәкилләрин иштиракы олмадан гәрары елан етмишдиләр. Гәрара ҝөрә, "Нардаран иши" үзрә Бакы Ағыр Ҹинајәтләр Мәһкәмәсинин һөкмү гүввәдә сахланылыб.

Бакы Ағыр Ҹинајәтләр Мәһкәмәсинин һөкмү илә Тале Бағырзадә 20, Аббас Һүсејнов 20, Фуад Гәһрәманлы 10, Ҹаббар Ҹаббаров 19, Расим Ҹәбрајылов 17, Шамил Абдуләлијев, Закир Мустафајев, Ҹаһад Бабакишизадә, Аббас Гулијев, Ибраһим Худавердијев, Етибар Исмајылов, Бәһруз Гулијев, Әли Нуријев, Әлибала Вәлијев, Фәрһад Балајев вә Аббас Тағыјевин һәр бири 14 ил 6 ај, Рамин Јарыјев вә Агил Гулијев исә 10 мүддәтинә азадлыгдан мәһрум едилибләр. Талеһ Бағырзадә вә Аббас Һүсејнов ҹәзаларынын 7 илини гапалы режимдә чәкәҹәкләр. Һәмин шәхсләрин барәләриндә олан һөкмдән верилән апелјасија шикајәтләриндә онларын барәләриндә бәраәт һөкмүнүн чыхарылмасы истәнилиб.

2015-ҹи ил нојабрын 26-да Нардаран гәсәбәсиндә кечирилән әмәлијјат заманы адлары гејд едилән шәхсләр һәбс едилиб. Онлар Ҹинајәт Мәҹәлләсинин бир сыра маддәләри илә иттиһам олунурлар. Әмәлијјат заманы 2 полис, 4 кәнд сакини һәлак олуб.

Т. Бағырзадә вә диҝәрләри иттиһамы гәбул етмирләр. Онлар ишҝәнҹәјә мәруз галдыгларыны, иттиһам сахта олдуғуну билдирирләр. Т. Бағырзадә бундан әввәл бир нечә дәфә һәбс едилиб. О, һакимијјәти сәрт тәнгид етмәси илә таныныб.



Диггәт: Хәбәрдән истифадә етдикдә мәнбәјә истинад лазымдыр