Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Ијунун 9-да Бакы Ағыр Ҹинајәтләр Мәһкәмәсиндә "Нардаран иши" үзрә тәгсирләндирилән Елчин Гасымов вә даһа 11 нәфәр - Наһид Гәһрәманов, Аға-Әли Јәһјајев, Сејфәддин Ширванов, Фәрһад Мурадов, Рамил Әлијев, Елҝүн Ахундов, Вүсал Алыш, Иса Ибраһимов, Сејмур Асланов, Әли Шаһбазов вә Әмирли Әлијевин ҹинајәт иши үзрә мәһкәмә просеси давам етдирилиб.
Һаким Мајыл Бајрамовун сәдрлик етдији просесдә Сабунчу рајон Полис Идарәси 14-ҹү Полис Бөлмәсинин әмәкдашы Гурбан Бәјләров шаһид гисминдә диндирилиб. О, Елчин Гасымовун мәнзилиндә ахтарыш апардыгларыны, гонаг отағындан дини әдәбијјат, јатаг отағындан исә тапанча вә гумбара ашкар едилдијини дејиб.
Е.Гасымов исә билдириб ки, онда силаһ олмајыб:
"Ифадәмдә демишәм, һамы да билир ки, силаһ мәним дејил. 2015-ҹи ил нојабрын 5-дә мән инзибати гајдада һәбс едилмишәм. Декабрын 3-дә исә барәмдә һәбс-гәтимкан сечилиб. Һәбсдә оланда АНС-дә ешитдим ки, евимиздә ахтарыш апарылыб вә китаблар тапылыб. Һәмин китабларла бағлы експерт рәји вар вә онлар гадаған олунмуш китаблар дејил. Ҝүја ушагларым јатан чарпајынын алтында силаһ олуб. Бу, нә дәрәҹәдә дүзҝүндүр? Елә шеј олса, ушагларын јанына нијә гојурдум? "Бандотдел"дә истинтаг групунун рәһбәри Пәрвиз Ибајев, мүстәнтиг Емзар Гоҹајев вә вәкил Елнур Нәбијев силаһла бағлы бизә чох әзијјәт етдиләр. Ишҝәнҹә вердиләр ки, дејәк силаһы бизә Талеһ Бағырзадә вериб вә биз һакимијјәт чеврилиши етмәк истәмишик. Лакин биз бундан имтина етдик. Емзар Гоҹајев мәним јанымда зәнҝ етди кимәсә, сорушду ки, силаһы һардан тапыблар. Һәмин адам да деди ки, ушагларын чарпајысынын алтындан. Емзар Гоҹајев ағлады. Деди: „Мән буну неҹә јазым“. Пәрвиз Ибајев деди ки, әҝәр бојнуна ҝөтүрмәсән, атаны тутаҹағыг. Ҝөрүрсән ки, нечә нәфәр атасы илә бирликдә һәбс едилиб. Башга ҹүр мүмкүн дејил. Емзар Гоҹајев деди: "Мәним дә аиләм, ушагларым вар. Мәни баша дүш. Әҝәр белә етмәсәк, ишдән чыхардарлар. Мән сәнә гардаш кими дејирәм". Дедиләр јаз ки, зибилликдән тапмысан вә полисә тәгдим етмәјә вахт олмајыб. Мән дә бу формада јаздым".
Бу заман Е.Гасымовун залда әјләшән атасы һакимләрә дејиб ки полисләр евдә ахтарыш апармаға ҝәләндә о евдә олуб:
"Ҝәлән кими чыхдылар икинҹи мәртәбәјә. Орада Елчин Гасымовун јатаг отағына ҝириб ҝөзүмүн габағында силаһы гојуб ҝөтүрдүләр".
Даһа сонра иҹласда Сабунчу рајон Полис Идарәсинин әмәкдашлары - Елман Абдуллајев, Илкин Ибраһимов вә диҝәрләри ифадә верибләр.
Просес ијунун 16-да давам едәҹәк.
2015-ҹи ил нојабрын 26-дә Бакынын Нардаран гәсәбәсиндә полис әмәкдашлары әмәлијјат кечирибләр. Әмәлијјат заманы "Мүсәлман Бирлији" Һәрәкатынын сәдри Талеһ Бағырзадә, Аббас Һүсејн вә диҝәрләри һәбс едилиб. Нојабрын 5-дә исә Т. Бағырзадәнин мүавини Елчин Гасымов инзибати гајдада һәбс едилиб. Декабр ајында исә она бир сыра маддәләрлә иттиһам елан едилиб вә барәсиндә һәбс гәрары чыхарылыб.
Т.Бағырзадә 20 ил мүддәтнә азадлыгдан мәһрум едилиб. О, иттиһамлары гәбул етмир. Т. Бағырзадә һакимијјәт әлејһинә чыхышлары илә таныныб вә буна ҝөрә һәбс едилдијини билдирир.
Диггәт: Хәбәрдән истифадә етдикдә мәнбәјә истинад лазымдыр
