Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Мүсәлман Бирлији Һәрәкатынын сәдр мүавини, Нардаран һадисәләриндән сонра һәбс едилмиш даһа 11 нәфәрлә бирликдә һазырда мүһакимәси давам едән Шиә руһаниси Елчин Гасымовла онларын ишинә бахан әдаләтсиз һаким арасында өтән мәһкәмәдә кәскин мүбаһисә олмушду. Онларын мајын 5-дә кечирилән мәһкәмәси дә галмагалсыз өтүшмәјиб.
“Нардаран-2” групунун тәркибиндә мүһакимә олунан бу 12 нәфәрин ишинә Бакы Ағыр Ҹинајәтләр Мәһкәмәсиндә Мајыл Бајрамовун сәдрлик етдији әдаләтсиз һакимләр коллеҝијасы бахыр. Бу мәһкәмә просесиндә “шаһидләрин” диндирилмәси мәрһәләсидир. “Шаһидләр” исә полисләрдир.
Мајын 5-дә кечирилән мәһкәмәдә дөрд нәфәр полис әмәкдашы диндирилиб. Онларын һамысы Сабунчу Рајон Полис Идарәсинин ишчиләри олуб.
“Үзүнү ҝөрмәмишик, амма даш атанлар олуб”
Ишверән полисләрдән үчү - Нәсиб Әсәдуллајев, Надир Вәлијев вә Фирәддин Исмајылов 2015-ҹи ил нојабрын 5-дә Сабунчу Рајон Полис Идарәсинин гаршысында баш верәнләр һагда ифадә верибләр. Һәмин ҝүн Шиә руһаниси Елчин Гасымову һәбс едиб, идарәјә ҝәтирәндән сонра бир груп адам идарәнин гаршысына топлашараг онун азадлыға бурахылмасыны тәләб едиб.
Һәр үч полис әмәкдашынын ифадәси демәк олар ки, ејни олуб. Онлар тәгсирләндирилән шәхсләрдән һеч кими танымајыблар. Өзләри аксија иштиракчыларындан һеч кими сахламадыгларыны десәләр дә, идарәнин гаршысына топлашанларын полисләрә даш атдыгларыны иддиа едибләр. Конкрет кимин атдығыны исә ҝөрмәдикләрини дејирләр.
“Јердә дашлар вар иди. Һава гаранлыг олдуғундан адамларын үзүнү ҝөрә билмирдик, лакин даш атанлар вар олуб”, - ишверән полис Фирәддин Исмајыловун сөзләридир.
ШӘРЛӘНӘН шәхсләр исә дејир ки, орада адамлар динҹ шәкилдә топлашмышдылар, онлар кимсәјә даш атмајыблар.
“Полисләр әшјаларымы гајтармајыб”
ШӘРЛӘНДИРИЛӘН шәхсләрдән Шиә активисти Ағаәли Јәһјајев идарәнин гаршысында сахланыларкән ондан ҝөтүрүлән әшјаларын бу ҝүнә гәдәр гајтарылмадығыны, һәтта телефонундан инди дә намәлум шәхсләрин истифадә етдикләрини сөјләјиб: “Һазырда кимсә телефонда олан нөмрәнин “WһатсАпп”ыны ишләдир. Телефону гајтармырлар, һеч олмаса нөмрәни гајтарсынлар. Хаһиш едирәм, бу мәсәлә арашдырылсын”.
Әдаләтсиз һаким билдириб ки, јазылы әризә илә мәһкәмәјә мүраҹиәт етсә, бу мәсәлә арашдырыла биләр.
Сабунчу рајону, 14-ҹү полис бөлмәсинин әмәкдашы Емин Бабајев исә руһани Елчин Гасымовун неҹә сахланмасы һагда ифадә вериб. Иддиа едиб ки, руһани Елчин Гасымов күчәдә сөјүш сөјдүјүнә ҝөрә она јахынлашыб, бөлмәјә дәвәт едибләр. Амма о, ҝетмәкдән имтина едиб, полисләрә мүгавимәт ҝөстәриб.
Вәкил Фариз Намазлы Емин Бабајевдән сорушуб ки, бәс нијә илаһијјатчыны һәмин вахт бөлмәјә јох, идарәјә апарыблар. Полис ҹаваб вериб ки, онлара белә ҝөстәриш ҝәлмишди.
“Јохлајын, бәлкә дәлиди...”
Полис әмәкдашынын она верилән суалларын бир чохуна “хатырламырам”, “јадымда дејил” ҹавабларыны вермәси руһани Елчин Гасымову әсәбләшдириб. Бабајевин јалан данышдығыны дејән илаһијјатчы ејни заманда, онун тибби експертизадан кечирилмәсини истәјиб: “Јохлајын, мүәјјәнләшдирин, бәлкә бу адам елә дәлидир. Һеч нә јадында дејил...”
Елчин Гасымовун шаһид полисә “Киши ол...” демәсинә һаким етираз едиб. Илаһијјатчы да өз нөвбәсиндә һакимә мүраҹиәт едәрәк, белә бир мүгајисә апарыб: “Дүзүнү дејин, ишләдијиниз илләр әрзиндә нечә дәфә рүшвәт алмысыныз? Мән дејирәм ки, сиз һәр ҝүн рүшвәт алырсыныз. Пул алыб, ҹинајәткары бурахырсыныз. Бу, шәр-бөһтанды, јохса јох? Ҝөрүрсүнүз, бу адам да ҝәлиб мәнә беләҹә бөһтан атыр, шәр данышыр”.
Шиә руһаниси Елчин Гасымовун мүгајисәси һакими һиддәтләндириб. Әввәлҹә “шаһид” полис залдан чыхарылыб, ардындан һакимләр өзләри дә мәһкәмә залыны тәрк едибләр.
Мәһкәмәнин мајын 12-дә давам едәҹәји елан олунуб.
Диггәт: Хәбәрдән истифадә етдикдә мәнбәјә истинад лазымдыр
