Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, "Гәмәри Бәни-Һашим" - Һашим Нәслинин Ајы ләгәби илә танынмыш һәзрәт Әлинин (әлејһи сәлам) иҝид оғлу Әбүлфәзлил Аббас (әлејһи сәлам) һиҹрәтин 26-ҹы или, шәбан ајынын 4-дә дүнјаја ҝәлмишдир. Анасы өз шүҹаәтләри илә ад газанмыш "Килаб" гәбиләсиндән олан Уммүл Бәниндир...
Һәзрәти Әлинин (әлејһи сәлам) илк һәјат јолдашы, Ислам Пејғәмбәринин дүррданә гызы һәзрәти Ханым Фатимәи Зәһра (сәламуллаһи әлејһа) икинҹи хәлифә тәрәфиндән Шәһид едилдикдән сонар Имам Әли (әлејһи сәлам) Ханым Фатимәи Зәһранын (сәламуллаһи әлејһа) вәсијјәтинә ујғун олараг икинҹи аилә һәјатыны гурур. Бунун үчүн О, һәзрәт (әлејһи сәлам) гардашы Әгилә әмр едир ки, онун үчүн елә бир тајфадан һәјат јолдашы сечсин ки, онун үчүн гејрәтли вә шүҹаәтли бир оғлан дүнјаја ҝәтирсин. Әгил бүтүн тајфаларын әсл-нәҹабәтини јахшы билдији үчүн мәһз Уммүлбәнини һәзрәт Әлијә (әлејһи сәлам) төвсијә елјир.
Бу бәрәкәтли издиваҹдан дөрд оғлан өвлады дүнјаја ҝәлир. Онлардан бөјүјүнүн ады исә Аббас, күнјәси исә Әбүлфәзл олур.
Һәзрәт Әлидән (әлејһи сәлам) тәрбијә алан Һәзрәт Әбүлфәзл бүтүн инсани дәјәрләри вә хүсусијјәтләри өзүндә тәҹәссүм етдирән бир шәхс олмушдур. Өз шүҹаәти, гәһрәманлығы илә тарихә силинмәз вә әвәз олунмаз изләр салмышдыр. Мәһз буна ҝөрә дә, О һәзрәтин күнјәси Әбүлфәздир јәни фәзиләтләрин Атасы.
Мәсум Имамларын һәзрәт Әбүлфәзлил Аббас һагда бујурдуглары кәламлар:
Имам Сәҹҹад (әлејһи сәлам) о һәзрәтин (әлејһи сәлам) барәсиндә белә бујурур: "Һәзрәт Аббас (әлејһи сәлам) тәлим ҝөрмәмиш алимдир, чүнки о, илаһи елмин мәнбәји, Һәзрәт Пејғәмбәрин вариси вә вәлиси Һәзрәт Әлинин (әлејһи сәлам), һәмчинин беһишт ҹаванларынын ағалары олан Һәсән (әлејһи сәлам) вә Һүсејнин (әлејһи сәлам) елминдән фајдаланмышдыр."
Имам Сәҹҹад (әлејһи сәлам) Һәзрәт Әбүлфәзлин мәгамынын шәһид мәгамындан үстүн олдуғу барәдә белә бујурур: "Аллаһ Тәала әмим Аббаса (әлејһи сәлам) рәһмәт еләсин. О, һәгигәтән ҹанындан кечиб өзүнү гардашына фәда еләди, Аллаһ-Тәала онун кәсилмиш голларынын әвәзинә әмиси Ҹәфәр Тәјјар кими ики ганад вермишдир ки, мәләкләр кими учараг ҹәннәтә дахил олсун. Онун Аллаһ Тәала јанында елә бир мәгамы вар ки, Гијамәт ҝүнү бүтүн шәһидләр она гибтә едәр вә онун мәгамыны тәмәнна едәрләр."
Имам Ҹәфәр Садиг (әлејһи сәлам) белә бујурур: "Бизим әмимиз Һәзрәт Әбүлфәзлин (әлејһи сәлам) долғун тәфәккүрү, ҝениш бахышы вә ҝүҹлү иманы вар иди. О (әлејһи сәлам), Имам Һүсејнлә (әлејһи сәлам) бирҝә залым Језидә гаршы сонадәк мүбаризә апарды. О Һәзрәтин (әлејһи сәлам) јолунда ҹаныны фәда едиб шәһид олду."
Имам Садиг (әлејһи сәлам) онун зијарәтнамәсиндә белә бујуруб: “Шәһадәт верирәм ки, сән, бир ан да олса, сүстлүк ҝөстәрмәјиб, гајытмамысан. Сәнин аддымларын динин иман вә бәсирәтиндә из гојуб.”
Башга бир јердә Имам Садиг (әлејһи сәлам) бујуруб: “ Бизим әмимиз Әббас (әлејһи сәлам), ити (ачыг) ҝөзлү (бәсирәтли) вә мөһкәм иманы вар иди. Гардашы илә бирҝә ҹиһад едиб, Аллаһын имтаһанындан галиб чыхыб вә шәһадәтлә һәјат көчүнү јығды.”
Тарихчиләр јазыр:
О һәзрәтин (әлејһи сәлам) шүҹаәти вә гәһрәманлығы барәсиндә тарихчи Харәзми белә нәгл едир: "Сиффејн мүһарибәсиндә мисилсиз шүҹаәти, јүксәк гылынҹ ојнатмаг габилијјәти һамыны валеһ етмишди. Мүавијә сују Һәзрәт Әлинин (әлејһи сәлам) ордусунун үзүнә бағладыгдан сонра һәзрәт Әбүлфәзл (әлејһи сәлам) мејдана чыхараг гаршы тәрәфдән дөјүшчү истәди. Бу заман Мүавијә Әбу Шәсаны чағырыб деди ки, сән Шамын ән ҹәнҝавәрисән, буну өлдүр ки, башгаларына ибрәт олсун. Лакин о, өзү ҝетмәјиб оғлуну ҝөндәрди. Һәзрәт Әбүлфәзл (әлејһи сәлам) ардыҹыл олараг онун једди оғлуну өлдүрдү. Буну ҝөрән әбу Шәса гәзәбли шәкилдә мејдана дахил олду. Һәзрәт Әбүлфәзл (әлејһи сәлам) ону да мәғлуб етди." Харәзминин нәгл етдијинә әсасән бундан сонра Мүавијәнин гошунундан һеч ким онунла дөјүшә ҹәсарәт етмәди.
Диггәт: Хәбәрдән истифадә етдикдә мәнбәјә истинад лазымдыр
