Галхын, мәһкәмә ҝәлир!
Дөвләт иттиһамчысы иттиһам актыны елан едир:
“Һаҹы Ҹавад” Ҹинајәт Мәҹәлләсинин 168-1.3 (Дини тәблиғат, дини ајин вә мәрасимләрин апарылмасы тәләбләрини позма) 145.3 (Ганунсуз азадлыгдан мәһруметмә еһтијатсызлыгдан зәрәрчәкмиш шәхсин өлүмүнә вә ја диҝәр ағыр нәтиҹәләрә сәбәб олдугда), 181.3.1, 181.3.2 (Гулдурлуг мүтәшәккил дәстә тәрәфиндән күлли мигдарда әмлак әлдә етмәк мәгсәдилә төрәдилдикдә), 311.3.1, 311.3.2, 311.3.3, 311.3.4 (Рүшвәт алма габагҹадан әлбир олан бир груп шәхс вә ја мүтәшәккил дәстә тәрәфиндән һәдә-горху тәтбиг олунмагла күлли мигдарда вә тәкрар төрәдилдикдә), 313 (Вәзифә сахтакарлығы), 341.2.1, 341.2.2 вә 341.2.3-ҹү (Бир груп шәхс тәрәфиндән силаһ тәтбиг олунмагла һакимијјәтдән суи-истифадә етмә, һакимијјәт һәддини ашма вә ја һакимијјәтдән истифадә етмәмә ағыр нәтиҹәләрә сәбәб олдугда), 28, 214.2.3-ҹү (одлу силаһдан вә силаһ гисминдә истифадә олунан предметләрдән истифадә етмәклә террора һазырлыг), 278-ҹи (һакимијјәти зорла әлә кечирмә вә ја ону зорла сахлама), 274-ҹү (дөвләтә хәјанәт) маддәләри үзрә иттиһам олунур.
Мәһкәмә мүттәһим “Һаҹы Ҹавад” һаггында әлдә етдији рәсми мәлуматлары тәгдим едир:
Ады вә сојады: “Һаҹы Ҹавад”
Доғум тарихи: 1912
Үнваны: Бакы шәһәри, Јасамал рајону, Абдулла Шаиг күчәси 79
Шәхсијјәтини тәсдиг едән сәнәдин серија вә нөмрәси: ИНВ № 3511
Сәнәди верән орган: Азәрбајҹан Республикасы Мәдәнијјәт вә Туризм Назирлији
Гејдијјатда олдуғу гурум: Дини Гурумларла Иш үзрә Дөвләт Комитәси
Аид олдуғу гурум: Гафгаз Мүсәлманлары Идарәси
“Һаҹы Ҹавад” барәдә гыса мәлумат: Бу мәсҹид дүзбуҹаглы формаја маликдир. Мәсҹидин минарәси, минбәри јохдур. Меһрабы тағвари формада олуб, садәдир. Ич саһәси 12х18 метр, јердән тавана гәдәр һүндүрлүјү 6 метр, јердән ҝүнбәзәдәк исә 9 метрдир. Ҝүнбәзиндә 2 ҝөзлүк гојулуб.
Јерли ҹамаатын билдирдијинә ҝөрә, бу мәсҹиди тикдирән Һаҹы Ҹавад таҹир олуб. Мәсҹидин әввәлки ҝириш гапысынын үстүндә исә 3 даш китабә һәкк олунуб. Һәмин китабәләрдән биринә әсасән мәсҹидин инша тарихи һиҹри-гәмәри тәгвими илә 1305-ҹи илә аиддир (ХЫХ әср). Диварларынын галынлығы 1 метр олан бу мәсҹид јонулмуш сал дашларла тикилиб. Фасад диварлар суванмајыб, ич диварлар исә суванараг ағардылыб.
Мәсҹиддә Әзизов Канан Сәрван оғлунун сәдрлик етдији "Һаҹы Ҹавад" мәсҹиди дини иҹмасы фәалијјәт ҝөстәрир. Мәсҹидин ахунду Һаҹы Әһлиман Рүстәмовдур.
2017-ҹи илин апрел ајында Һаҹы Ҹавад јухарыдакы маддәләрлә иттиһам олунмуш вә ҝүнаһы сүбута јетириләрсә, халг гаршысында едам едиләҹәк.
Шаһидләр диндирилсин:
Дини Гурумларла Иш үзрә Дөвләт Комитәсинин сәдри Мүбариз Гурбанлы шаһид гисминдә ифадә вермәк үчүн мәһкәмә залына ҝәлсин.
Мүбариз Гурбанлы, сиз јалан ифадә вердијиниз үчүн Азәрбајҹан Республикасы Ҹинајәт Мәҹәлләсинин 297.1 вә 297.2-ҹи маддәләринә әсасән мәсулијјәтә ҹәлб олуна биләрсиниз. Јахынлашын, имзалајын.
“Һәмин мәсҹидләр һеч бир гејдијјатда дејил, көһнә олдуғу үчүн јарарсыз һала дүшүб. Әразидә бүтүн көһнә тикилиләр сөкүлүр, о ҹүмләдән дә орада иш апарылыр. Мәсәлә әтрафында дин ады алтында сүни ажиотаж јаратмаг истәјәнләр вар. О мәсҹидләрә ән чох һалда ҹүмә вә бајрам намазына 80-100 нәфәр анҹаг јығыларды. Вахт намазларында исә 15-20 нәфәр ҝәләр вә ја ҝәлмәзди. Ора нә тикили, нә дә мәсҹид кими гејдијјатдадыр. Өтән әсрин әввәлләриндә тикилмиш, тамамилә јарарсыз һала дүшмүш мәһәллә мәсҹиди дејилән бир јер иди. Әразинин әтрафында 4 бөјүк мәсҹид вар вә неҹә лазымдырса фәалијјәт ҝөстәрир, инсанлар ибадәтләрини едирләр. Бу сәбәбдән орадакы сакинләрин һеч бир наразылығы јохдур, әксинә мәгбул сајырлар. Бу мәсәлә әтрафында сүни ажиотаж јараданлар, һај-күј саланлар диндән кәнар, дин адындан истифадә едән гүввәләрдир. Бакыда 134 мәсҹид вар, Азәрбајҹан президенти Илһам Әлијевин динә вердији ән бөјүк дәјәр нәтиҹәсиндә бүтүн өлкә үзрә мәсҹидләрин тикинтиси, бәрпасы һәјата кечирилир. Биздә Һејдәр мәсҹиди вә диҝәр бу кими мөтәбәр мәсҹидләр фәалијјәт ҝөстәрир. Сују буландырмаг, үмуми ишә зијан вурмаг истәјәнләр һај-күј салырлар. Бу адамларын мөмин инсанларла һеч бир әлагәси јохдур”.
Гафгаз Мүсәлманлары Идарәсинин сәдри Һаҹы Аллаһшүкүр Пашазадә шаһид гисминдә ифадә вермәк үчүн мәһкәмә залына ҝәлсин.
Аллаһшүкүр Пашазадә, сиз јалан ифадә вердијиниз үчүн Азәрбајҹан Республикасы Ҹинајәт Мәҹәлләсинин 297.1 вә 297.2-ҹи маддәләринә әсасән мәсулијјәтә ҹәлб олуна биләрсиниз. Јахынлашын, имзалајын.
“Бу мәсҹид ГМИ-дә гејдијјатдан кечмәјиб. Мән һеч о мәсҹидләрин јерини белә танымырам. Әҝәр сөһбәт үмумијјәтлә мәсҹидләрин сөкүлмәсиндән ҝедирсә, әлбәттә мән бунун тәрәфдары дејиләм. Лакин бүтүн дүнјада да гәбул олунуб ки, халг үчүн әһәмијјәтли ишләр ҝөрүләркән, мәсәлән, јол чәкиләркән вә диҝәр ишләр һәјата кечириләркән мәгсәдли шәкилдә, данышыглар јолу илә бу ишләр һәјата кечирилир. Мән бу һагда фикрими аидијјәти гурумлара да чатдырмышам. Ҝәрҝинлик јаратмаг истәјәнләрин һәмин мәсҹид вә мәһәллә илә һеч бир әлагәси олмајыб. Бәзи шәхсләр динин адындан истифадә едәрәк "Һаҹы Ҹавад" мәсҹиди әтрафында ҝәрҝинлик јаратмаг истәјирдиләр. Президент мәсәлә илә бағлы конкрет мөвгејини билдирди, диндарларымыз да дөвләт башчысынын бу аддымыны дәстәкләјир. Һејдәр Әлијевин, Зәрифә ханымын аиләсиндә бөјүјән Илһам Әлијев һәзрәтләри дини абидәләримизин, милли-мәнәви дәјәрләримизин горунмасы үчүн чох мүһүм ишләр ҝөрүр вә иншаллаһ һәлә чох ишләр дә ҝөрәҹәк. Президент биз диндарлара вердији сөзә һәмишә әмәл едиб".
Милли Мәҹлисин Иҹтима бирликләр вә дини гурумларла иш комитәсинин сәдри, Јени Азәрбајҹан Партијасы иҹра катибинин мүавини, депутат Сијавуш Новрузов шаһид гисминдә ифадә вермәк үчүн мәһкәмә залына ҝәлсин.
Сијавуш Новрузов, сиз јалан ифадә вердијиниз үчүн Азәрбајҹан Республикасы Ҹинајәт Мәҹәлләсинин 297.1 вә 297.2-ҹи маддәләринә әсасән мәсулијјәтә ҹәлб олуна биләрсиниз. Јахынлашын, имзалајын.
“Мәсҹид јығышыб гәрарлар гәбул етмәк үчүн јер дејил. Өзүмүз дә бу мәсәләләрә ајыг-сајыг јанашмалыјыг. Журналистләр дә бу мәсәләдә диггәтли олмалыдыр. Бу барәдә ҹәмијјәтә дүзҝүн мәлумат верилмәлидир. Һаҹы Ҹавад мәсҹидиндән бир гәдәр ашағыда Тәзә Пир мәсҹиди вар. Ибадәт етмәк истәјирсәнсә, ораја ҝедә биләрсән. Мәсҹидин функсијасы ондан ибарәт дејил ки, кимсә орада јығышыб һансыса гәрарлар гәбул етсин. Азәрбајҹанда исламын ән ҝөзәл модели тәтбиг олунур. 2500-дән артыг мәсҹид фәалијјәт ҝөстәрир вә бүтүн бунлары ҝөрмәк лазымдыр”.
Азәрбајҹан Республикасынын милләтләрарасы, мултикултурализм вә дини мәсәләләр үзрә Дөвләт мүшавири академик Камал Абдуллајев шаһид гисминдә ифадә вермәк үчүн мәһкәмә залына ҝәлсин.
Камал Абдуллајев, сиз јалан ифадә вердијиниз үчүн Азәрбајҹан Республикасы Ҹинајәт Мәҹәлләсинин 297.1 вә 297.2-ҹи маддәләринә әсасән мәсулијјәтә ҹәлб олуна биләрсиниз. Јахынлашын, имзалајын.
“Мәсҹидин сөкүлмәсини әлиндә бајраг едәнләр, әслиндә, мәсҹид давасы, дин давасы етмирләр. Онлар, өз мәнафеләринин, өз амбисијаларынын, иддиаларынын давасыны апарырлар вә бүтүн бу заһирән мәсҹидлә бағлы сөјләнән о иддиаларын архасында сон дәрәҹә бәсит, сон дәрәҹә ҝәрәксиз, мәнәвијјатдан узаг иддиалар дурур. Әслиндә дөвләтин динә олан мүнасибәти өзүнү онда ҝөстәрир ки, Азәрбајҹанда мүстәгиллик дөврүндән сонра 2 миндән чох мәсҹиддә мүсәлманлар намаз гылыр, мәнәви еһтијаҹларыны һәјата кечирирләр. Совет дөврүндә бу, белә дејилди, о заман әлбәттә ки, бу ҹүр “тәәссүбкешләр” ортаја чыхмырды. Чүнки совет режиминин ағыр, кәсән бир голу варды. Бу ҝүн исә мүстәгил Азәрбајҹан дөвләтинин һәддән артыг мүлајим сијасәти вә һәддиндән артыг өз вәтәндашына гајғыкешлијинин нәтиҹәсиндә бәзән ҝөрүрсән ки, дин пәрдәси алтында мүәјјән гүввәләр өз һәгиги сималарыны ҝөстәрмәјә чалышырлар вә дөвләтлә мөмин бәндә арасында мүнасибәтин ҝәрҝинләшмәсинә сәбәб олурлар. Амма Азәрбајҹан диндары мөмин бәндәдир, һаггын вә наһаггын јерини јахшы билир. Бакы ҝенишләнир, бөјүјүр, ҝөзәлләшир. Бу ҝүн ҝөзәлләшән тәкҹә Бакынын евләри, күчәләри, мејданлары дејил. Бу ҝүн Азәрбајҹан инсаны, о ҹүмләдән Азәрбајҹанын мөмин инсаны дахилән дәјишир вә бу дәјишилмәнин ән ҝөзәл нүмунәси бу инсанларын дөвләтә, халга, милләтә мүнасибәтиндә өзүнү ҝөстәрир. Онлар бу ҝүн иҹтимаи мәнафени өз шәхси мәнафеләриндән үстүн ҝөрүрләр, бајрағы, Президенти, өлкәси, торпағы үчүн ҹанларыны белә әсирҝәмирләр. Сөзүҝедән мәсҹид әтрафында јарадылан бу ҝәрҝинлијин сүни олдуғуну әсл диндарлар чох јахшы баша дүшүрләр. Һәмин әразидә бир чох ибадәт евләри, о ҹүмләдән Тәзәпир, Имам Һүсејн, Гасым бәј, Һаҹы Султанәли вә Ханым Зәһра мәсҹидләри дә фәалијјәт ҝөстәрир. Һәмин мәсҹидләр дини ајин вә мәрасимләрин иҹрасы үчүн јетәрлидир. Һәтта һәмин мәсҹидләрин бир гисминдә намаз вахты чох аз инсан олур. Нә үчүн һәмин инсанлар әтрафдакы мәсҹидләрдә јох, мәһз һәмин мәсҹидә намаз гылмагда һәвәсли вә мараглыдырлар? Бу исрар өзү мүәјјән суаллар јарадыр. Демәк, бурада әсас мәгсәд дини дурумун сабитлијини позмаг, сүни ҝәрҝинлик јаратмагдыр. Демәли, сөһбәт шәхси мәнафедән, бир адамын әлиндән дини трибунанын алынмасындан ҝедир”.
Бүтөв Азәрбајҹан Халг Ҹәбһәси Партијасынын сәдри, депутат Гүдрәт Һәсәнгулијев шаһид гисминдә ифадә вермәк үчүн мәһкәмә залына ҝәлсин.
Гүдрәт Һәсәнгулијев, сиз јалан ифадә вердијиниз үчүн Азәрбајҹан Республикасы Ҹинајәт Мәҹәлләсинин 297.1 вә 297.2-ҹи маддәләринә әсасән мәсулијјәтә ҹәлб олуна биләрсиниз. Јахынлашын, имзалајын.
“Биз имкан вермәмәлијик ки, бизим мәсҹидләри ҹасус јувасына чевирсинләр. Бүтүн Азәрбајҹан халгынын ән чох алгышладығы бу һөкумәтин гәрарларындан бири дә “Советски”нин јенидән гурулмасыдыр. Биз билирдик ки, орада вәзијјәт нә јердәдир. Үфунәт, антисанитарија, бирмәртәбәли биналар... Вахтилә Нардаранда да мүәјјән адамлар һөкумәти шантаж етмәјә чалышырды. Орада Азәрбајҹана мүттәфиг олан дөвләтләрин бајрагларыны јандырырдылар, һәр ҹүр аддым атырдылар. Дөвләт һәр дәфә бир аддым атмаг истәјәндә дејирдиләр ки, бу диндарлара гаршыдыр. Һөкумәт дә бу сәбәбдән ҝери аддым атырды. Сонда да бу, тәәссүф ганлы һадисләрә ҝәтириб чыхарды. Она ҝөрә дә дөвләт индики һалда хариҹи хүсуси хидмәт органларына ишләјән 5-6 нәфәр адамын гаршысындан гачмамалыдыр. Ҹәнуби Гафгазда ән бөјүк мәсҹид – Һејдәр Мәсҹиди Бакыда тикилиб. Кифајәт гәдәр ҝениш јери вар. Тәзә Пир мәсҹиди Дини Гурумларла Иш үзрә Дөвләт Комитәсинин дедији кими гејдијјатда олмајан мәсҹиддән 100 метр аралыдадыр. Намаз гылмаг үчүн дә кифајәт гәдәр јер вар”.
Бөјүк Гурулуш Партијасынын башганы, депутат Фазил Мустафа шаһид гисминдә ифадә вермәк үчүн мәһкәмә залына ҝәлсин.
Фазил Мустафа, сиз јалан ифадә вердијиниз үчүн Азәрбајҹан Республикасы Ҹинајәт Мәҹәлләсинин 297.1 вә 297.2-ҹи маддәләринә әсасән мәсулијјәтә ҹәлб олуна биләрсиниз. Јахынлашын, имзалајын.
“Азәрбајҹанда чохлу сајда, садәҹә, 1-2 нәфәрә хидмәт едән мәсҹидләр вар. Арашдыранда бәзиләринин ичиндә һеч намаз да гылынмыр. Бунлар, садәҹә, ҝөрүнтү олараг 1-2 нәфәрин сығынаҹаг јери кими нәзәрдә тутулур вә орада өз фәалијјәтләрини һәјата кечирирләр. Бу да чох вахт мәсҹид анлајышынын өзүнә һөрмәтсизлик ҝәтирир. Һаҹы Ҹавад мәсҹиди илә бағлы ажиотаж јаратмаға еһтијаҹ јохдур. Инди "Советски" дејилән әразидә дә тикинти вә абадлыг ишләри ҝедир. Рајонун иҹра башчысы да бунунла бағлы кифајәт гәдәр ајдын ачыглама верди. Она, әсасән, јени бир јер мүәјјән олунаҹаг. Һәмин иҹманын үзвләри үчүн һардаса јени мәсҹид тикилмәси мәсәләси һәлл олунандан сонра сөзүҝедән мәсҹид сөкүләҹәк. Чүнки бу бөјүк бир комплекс вә ја тарихи әһәмәтијјәтә малик олан абидә дејил. Бу мәсҹид ганунсуз тикилидир, тарихи абидә дејил, бура турист дә ҹәлб етмәк мүмкүн дејил. Гафгаз Мүсәлманлар Идарәсинин рәһбәри бураны танымадығыны деди. Аллаһын еви олмур. Сәнин ибадәт етмәк истәјин варса беш аддым кәнарда мәсҹид вар. Проблем садәҹә ҝүҹ ҝөстәрмәкдир".
Мәһкәмә фасилә елан едир...
Азәрбајҹан Республикасы Ҹинајәт Мәҹәлләсинин 168-1.3, 145.3, 181.3.1, 181.3.2, 311.3.1, 311.3.2, 311.3.3, 311.3.4, 313, 341.2.1, 341.2.2, 341.2.3, 28, 214.2.3, 278 вә 274-ҹү маддәләри илә иттиһам олунан “Һаҹы Ҹавад” сон сөз дејир:
Бағышлајан, рәһимли, мәрһәмәтли, меһрибан Аллаһын ады илә башлајырам.
Илаһи, мән “јалныз сағлам гәлблә Аллаһын һүзуруна ҝәлән кимсәдән башга, мал-дөвләт вә өвладын һеч кимә фајда вермәдији ҝүн” – Сәндән аман диләјирәм!
Илаһи, мән “залымларын әлләрини чејнәјәрәк «Каш ки, Пејғәмбәрә гошулуб доғру јол тутардым!” дејән ҝүн» – Сәндән аман диләјирәм!
Илаһи, мән “ҝүнаһкарларын сималарындан танынаҹағы, алынлары вә ајагларындан тутулуб јахаланаҹағы ҝүн” – Сәндән аман диләјирәм!
Илаһи, мән “атанын оғлуна, оғулун да атаја һеч бир шејлә кара ҝәлә билмәјәҹәји вә Аллаһын вәдинин (гијамәтин) һөкмән олаҹағы ҝүн” – Сәндән аман диләјирәм!
Илаһи, мән “залымлара үзрхаһлыглары һеч бир фајда вермәјәҹәји, онларын ләнәтләҹәји вә ахирәт јурдунун пис әзабына дүчар олаҹағы ҝүн” – Сәндән аман диләјирәм!
Илаһи, мән “һеч кәс башгасынын карына ҝәлә билмәјәҹәји вә һөкмүн анҹаг Аллаһа мәхсус олаҹағы ҝүн” – Сәндән аман диләјирәм!
Илаһи, мән “һәр кәсин өз гардашындан, анасындан, атасындан, зөвҹәсиндән вә оғулларындан гачаҹағы вә һәрәнин өз һајында олаҹағы ҝүн” – Сәндән аман диләјирәм!
Еј бәхшиш, еһсан, немәт вә бәрәкәт саһиби, Сәни өз рәһмәтинә анд верирәм, еј рәһмлиләрин ән рәһмлиси!
Бу ҝүн сөзүн гылынҹы кәсдијинә шаһид олдуғумуз ҝүндүр.
Бу ҝүн һәгигәтин көзүнү елә һәгигәт күлү илә басдырмаг истәјәнләрин тарих гаршысында ифша олундуғу ҝүндүр.
Бу ҝүн јүзләрлә Һаҹы Ҹавадын едам ағаҹындан асылдығы ҝүндүр.
Бу ҝүн Аллаһ евинин јохлуғуну исбатламаг үчүн габаға кечмәкдә ҹанфәшанлыг едәнләрин рүсвај олаҹағы ҝүндүр.
Бу ҝүн бизә - Аллаһ евинә гаршы ән ағыр иттиһамлар сәсләндији ҝүндүр!
Елә зәнн едирсиниз ки, јери-ҝөјү бизә даралтмагла, бизи әсирләр кими бу јердән сөкүб, башга јердә тикмәклә рүсвај едиб өзүнүзү һөрмәтләндирирсиниз? Билмирсиниз ки, сизә верилән бу фүрсәт ондан өтәридир ки, әсл һәгигәтинизи, ич үзүнүзү ҹамаата ачыб ҝөстәрирсиниз? Мәҝәр Аллаһын “Күфр едәнләр онлара вердијимиз мөһләти һеч дә өзләри үчүн хејирли санмасынлар! Бизим онлара вердијимиз мөһләт ҝүнаһларыны даһа да артырмалары үчүндүр. Онлар зәлиледиҹи бир әзаб ҝөрәҹәкләр”, - дејә бујурдуғуну унутмусунуз?”
Мәни јер үзүндән силмәк үчүн барәмдә даһа ағыр иттиһамлар сәсләндирмәкдә бир-бирини габаға кечмәјә чалышанлар, сизә Һәзрәт Зејнәбин куфәлиләрә етдији нәсиһәтдән бир парчасыны дејәҹәм.
“Еј Куфә ҹамааты! Еј һијләҝәр вә намәрд инсанлар! Сизи ҝөрүм һеч вахт ҝөзүнүздән јаш әскик олмасын! Сиз бир гадына бәнзәјирсиниз ки, әлиндә олан бүтүн саплары тохујур, сонра да бүтүн тохудугларыны сөкәрәк, корлајыр. Сизин нә әһдинизин, нә дә андынызын һеч бир дәјәри вә етибары јохдур! Сизин ловғаланмаг, кәниз тәк јалтаглыг етмәк вә бошбоғазлыг етмәкдән башга нәјиниз вар? Сиз пејинликдә битән нәбатата вә гәбир үзәриндәки бәзәк әшјаларына охшајырсыныз. Ахирәт дүнјаныз үчүн ән пис азугәни: Аллаһын гәзәбини вә (сонсуз) ҹәһәннәм ишҝәнҹәсини һазырладыныз. Ағлајырсынызмы? Еләдир, ағлајын. Анд олсун Аллаһа ки, ағламаға лајиг инсанларсыныз. Чох ағлајын, аз ҝүлүн! Белә бир намәрдлик вә дөнүклүк едиб, (ҹох ијрәнҹ) ләкә дашыдығыныз һалда нә үчүн ағламајасыныз? Хәҹаләтли үзләринизи ҝизләдин. Бундан сонра әскиклик ичиндә өмүр сүрәҹәксиниз”.
Бурда мәһкәмә гуруб мәним һәгигәт олдуғуму инкар етмәклә, һаггымда дејилән ҝүн кими ајдын мәлуматлары јаланламагла һәјатынызын ән пис ишини ҝөрдүнүз. Дилинизи чөлә чыхартсаныз уҹундан сүзүлән ган дамҹыларыны ҝөрәрсиниз. Лакин о ган дамҹлары ичинизә ахыр, сусмуш виҹданлары бир дәфәлик сүкута гәрг едир. О ган јалан ифадәләрлә едамына шәраит јаратдығыныз Һаҹы Ҹавадын - мәним ганымдыр. Бизи дөвләтә хәјанәтдә, хариҹи гүввәләрлә әлбир олмагда сучлајыб зинданлара салмагла, едам көтүкләринә чыхармагла нәјә наил олаҹагсыныз?! Ҝүнаһкар әлинизи чәкин боғазымыздан. Бармагларыныздан дамҹылајан ганымыза ҝөрәми севинирсиниз? Һәр шејә рәғмән сизи јенә хәбәрдар едирик: Бу јолдан чәкинмәсәниз, тезликлә Аллаһын гәзәби, чиркин әмәлләринизә ҝөрә сизә назил олаҹаг. Вај һалыныза!
Гәлбинизин мөһүрләндијини ҝүман етдијим үчүн, сизи даһа фазла нәсиһәт етмәјә лүзум ҝөрмүрәм. Инди исә мәним барәмдә ирәли сүрдүјүнүз иттиһамлара бир-бир ҹаваб верирәм.
Әввәлҹә кимлијими бәјан едим:
“Шүбһәсиз ки, мәсҹидләр Аллаһа мәхсусдур. Аллаһдан башга һеч кәсә ибадәт етмәјин!”(Ҹин-18)
Мән дә Аллаһа мәхсусам. Саһибим сизин танымаг истәмәдијиниз вә ҝөндәрдикләрини аз гала һечә сајдығыныз Аллаһдыр. Бир ҝүн мәһз Аллаһын һаким вә шаһид олдуғу мәһкәмәдә мүттәһим олаҹагсыныз. О заман дилләриниз лал, гулагларыныз кар олаҹаг. Бу ҝүн ким(ләр)әсә хош ҝәлмәк үчүн һаггымда јаландан шаһидлик едиб мәни едам ағаҹына чыхармаг истәјинизә әлләриниз вә ајагларыныз шаһидлик едәҹәк. “Бу ҝүн онларын ағызларыны мөһүрләјирик. Етдикләри әмәлләр барәсиндә онларын әлләри Бизимлә данышар, ајаглары исә шәһадәт верәр”. (Јасин-65)
Гүдрәтли Јарадан мүгәддәс Гуранда мәни доғру јол гајнағы кими тәгдим едиб: “Һәгигәтән, инсанлар үчүн илк бина олунан ев (мәбәд) Мәккәдәки евдир ки, о, шүбһәсиз, бүтүн аләмләрдән өтрү бәрәкәт вә доғру јол гајнағыдыр”. (Али-Имран - 96)
Мән Һәзрәт Ибраһимин (ә) тикдији, Һәзрәт Мәһәммәдин (с) јенидән бәрпа етдији һузур, раһатлыг, тәһлүкәсиз, бәрәкәтли вә доғру јол мәнбәји олан Кәбәнин баласыјам. Мән мөминләрин сәнҝәри вә сәҹдәҝаһыјам. Сиз мәнимлә дејил, мәним саһибимлә үз-үзә дајанмысыныз. Аллаһла үз-үзә дајананлар һәр ики дүнјада мүтләг зијана уғрајаҹаглар.
Мәним һеч бир гурумда гејдијјатда олмадығымы гејд етдиниз. Бүтүн шаһидләр, сөкүлмәјими зәрури едән амил кими, буну әсас ҝәтирир. Амма һәлә дә үзәримдән асылмыш лөвһәләрдә һансы гурумларда гејдијјатда олдуғум ачыг јазылыб. Мәнә “көһнә тикилидир, јарарсыз һала дүшүб” дејәнләр унудурлар ки, аллаһсыз Коммунист Партијасы белә, һаггымда бу иттиһамы сәсләндирмәјә ҹүрәт етмәди. Инди исә јарарсыз вә дарысгал биналара гатыб мәни едам едирсиниз. Мәни өз адымла сөксәјдиниз, бәлкә дә бу гәдәр парчаланмаздым. Көһнә вә јарарсыз тикили адыны үстүмә гојмаг инсафсызлыг, һәм дә һијләҝәрлик дејилми? Киминсә гәрарына етираз етмәјә ҹәсарәтиниз чатмадығы һалда, мәним варлығымы инкар етмәклә ән пис әмәлә саһиб олдунуз. Һаггымда сәсләндирдијиниз јаланлар өзүнүзү рүсвајчы формада ифша едир. Мәнә лазымсыз көһнә тикли демәклә варлығымы шүбһә алтына алдығыныз заман, һәм дә етираф едирсиниз ки, “о мәсҹидә ән чох һалда ҹүмә вә бајрам намазына 80-100 нәфәр анҹаг јығыларды. Вахт намазларында исә 15-20 нәфәр ҝәләр вә ја ҝәлмәзди”. Зиддијјәтли шаһидликлә өзүнүзү рүсвај едирсиниз.
Бир-биринизин ағзындан оғурлуг едәрәк, бөјүк кәшф саһиби кими дејирсиниз ки, Һаҹы Ҹавадын јахынлығында бир нечә мәсҹид вар, намаз гылмаг истәјән ҝедиб о мәсҹидләрдә ибадәт едә биләр. Сизи инсанларын һарда ибадәт етмәләри дүшүндүрүр, јахуд сиз инсанларын ахирәт һәјатларына ҝөрә нараһатсыныз? Өзүнүзү инсанлара ҝөрә нараһат ҝөстәрә биләрсиниз, амма бу мөвзуда чох сахтакар олдуғунуз ачыг ҝөрүнүр. Чүнки бу мәмләкәтдә инсанларын ән ади һүгуглары горунмур, валидејнләр өвладларын мәсум вә чарәсиз бахышларына таб ҝәтирмәдикләри үчүн интиһар едирләр, ата өвладындан, баҹы баҹыдан, гардаш гардашдан сизин һиккәниз үзүндән имтина едир. Белә һал тарихин һеч бир сәһифәсиндә ҝөрүнмәјиб. Анҹаг вәһши Әмәви вә Аббасиләр дөврүндә Әһли-Бејтә (ә) гаршы белә һадисәләрин кичик нүмунәләринә раст ҝәлинир. Сиз тарих үчүн ән гаранлыг сәһифәләр јарадырсыныз. Инсанлара Танрынын бәхш етдији өмүр пајыны јашамаға имкан вермәдијиниз һалда, “биз онларын ахирәтини дүшүнүрүк” десәниз, шүбһәсиз дүнјанын ән јаланчы гөвмү оларсыныз.
Чох азсајда мәни мүдафиә едәнләрә һансы ҹәсарәтлә ифтира атырсыныз? “Мәсҹид бизим сәнҝәримиздир” шүары илә мүдафиәмә галханлар һаггында “диндән кәнардырлар” иттиһамы сәсләндирирсиниз. Јахуд хариҹи кәшфијјат органлары илә әлагәли олдуғуну дејирсиниз. Бу кими иттиһамлар анҹаг диндарларла бағлы сәсләнсәјди, бәлкә дә инандырыҹы оларды. Ишсизликдән, аҹлыгдан, сәфаләт ичиндә јашамагдан шикајәтләнән инсанлары сахта иттиһамларла һәбсханалара долдурдуғунуз, истедадлы ҝәнҹләри сијаси һакимијјәтин мөвгејини дәстәкләмәдикләри үчүн “наркоман” етдијиниз кими, мөминләри дә мәсҹидләрин мүдафиәсинә галхдыгларына ҝөрә аҝент кими тәгдим едирсиниз. Мүдафиәмә галхан шәхсләрин арасында кимсә дедијиниз иттиһама туш ҝәләрсә, һамыдан әввәл ону мән ләнәтләјәрәм. Горхун, ләнәтимә туш ҝәлмәкдән.
“Бу мәсҹид ГМИ-дә гејдијјатдан кечмәјиб. Мән һеч о мәсҹидләрин јерини белә танымырам”- демәклә, өзүнүз дә билмәдән бөјүк бир һәгигәти етираф едирсиниз. Сиз мәни танымагдан горхурсунуз. Гијамәт ҝүнү Аллаһ гаршысында инсанларын јахшылығына шаһидлик едәнләрдән бири дә мәнәм. Ибадәт вә сәҹдәси илә мәни абад едәнләрин мөминлијинә шәһадәт верәҹәм. Кимин шаһидлији даһа тәсирли олаҹаг? Сиз, өзү дә мүтләг һаким гаршысында чарәсиз дурума дүшәҹәк инсанларын гурдуғу мәһкәмәдә шаһидсиниз, мән исә о, һакими-мүтләгин гураҹағы мәһкәмәдә шәһадәт верәҹәм. Сизин гурдуғунуз мәһкәмәдә һаким чыхараҹағы һөкм үчүн јаланчы шаһидләри диндирир, мән исә өзү һаким олан мәһкәмәнин интизарындајам.
Аллаһын јер үзүндә јаратдығы ән шәрәфли мәхлуг инсандыр. Јер үзүнүн әшрәфи олан инсан Азәрбајҹанда јенилиб, сындырылыб. Биз дә - мәсҹидләр дә сөкүләҹәк. Мәним сөкүлмәјим инсанларын сындырылмасы гәдәр фаҹиәли дејил. Мәсҹид ибадәт јеридир сөкәрләр, ҝедиб евиниздә ибадәтинизи едәрсиниз. Амма бир мәмләкәтин инсанларыны сындырсалар, о өлкәдә 2500 мәсҹид тиксән дә, һеч бир фајдасы олмаз.
Јормајын өзүнүзү! Пәрдә архасында едам һөкмүм верилиб. Бу мәрәкә һеч нәји дәјишмәјәҹәк. Садәҹә едамым бир гәдәр ҝеҹикә биләр. Нә комиссија, нә дә мөминләрин етирзы мәни едам көтүјүндән гуртармајаҹаг. Неҹә ки, Мејсәм Тәммары хурма ағаҹындан һеч нә хилас етмәди. Нә ибни Зијадын унутганлығы вә гәзәби, нә дә гәбиләсинин етиразы
Һеч Ајәтуллаһ Шејх Багир Нимри дә Сәуд режиминин едамындан хилас олмады. Мән шәһид Нимрлә ејни агибәти јашајаҹағыма шүбһә етмирәм.
Ајәтуллаһ Нимр шәһадәтиндән өнҹә анасына үнванладығы мәктубда јазырды:
“Сәбирли анама салам олсун! Һәр һалымызда Аллаһа шүкүр етмәјимиз лазымдыр. Әзиз анам, Аллаһын вердији һәр шеј үчүн шүкүр вә һәмд един! Аллаһын гисмәти бизим истәдикләримиздән чох даһа јахшыдыр. Биз нәләрисә сечирик, амма Аллаһын бизим үчүн сечдији даһа өнәмлидир. Биз Ондан нәјисә диләјәрик вә Аллаһдан бизим үчүн хејирли оланы вермәсини истәрик.
Бүтүн ишләр али вә нөгсансыз Аллаһын әлиндәдир. Бу каинатда һеч бир шеј Онун ирадәсиндән кәнарда реаллашмаз вә һеч ким ону ирадәсиндән изнсиз һеч нә едә билмәз.
Әзиз анам, һеч бир шеј Аллаһын ирадәси вә нәзарәтиндән кәнарда дејилдир. Бу да бизә јетәр! Аллаһын әманәти сәнин јанындады. Аллаһ сәни вә бүтүн Әһли-бејт (ә) давамчыларыны горусун".
Шејх Нимрин вәкили өмрүнүн сон вахтларында она дејир ки, едам һөкмүнә јенидән бахылма еһтималы вар. Шејх ҹаваб вериб: “Сән һәр бир шејлә бағлы мәним вәкилимсән, бирҹә мәним иззәтимдән башга. Мәним иззәтим һәјатымдан даһа өнәмлидир. Она јахынлашмағы сәнә гадаған едирәм”.
Мән исә бу мәмләкәти – ОДЛАР ЈУРДУНУ ана һесаб едәрәк она сәсләнирәм: Әзиз вә сәбирли анам! Едам гәрары Аллаһын мәндән разы олмасына сәбәб олаҹагса, архамҹа ҝөз јашы ахытма. Ҝөз јашларыны үзәриндә нәфәс чәкән өвладларынын интиһарына сахла!
Мәһкәмә мүшавирә отағына ҝедир…!
Ҹавид Ҹаббарлы
Диггәт: Хәбәрдән истифадә етдикдә мәнбәјә истинад лазымдыр
