Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Мартын 27-дә пајтахтын Сәбаил Рајон Мәһкәмәсиндә ШӘРЛӘНӘРӘК һәбсдә олан блоггер Меһман Һүсејновун ишҝәнҹәјә мәруз галмасына даир шикајәтинә бахылыб.
Бакы Шәһәр Прокурорлуғу Меһман Һүсејновун јанварын 9-да инзибати гајдада сахланыларкән, Нәсими Рајон Полис Идарәсиндә ишҝәнҹәјә мәруз галмасы барәдә сөјләдикләрини әсассыз сајыб вә ҹинајәт иши башланмасы үчүн онун мүраҹиәтилә бағлы рәдд гәрары чыхарыб. Меһман Һүсејновун вәкилләри прокурорлуғун бу гәрарындан мәһкәмәјә шикајәт едибләр.
Гапалы кечирилән мәһкәмә һагда мәлумат верән вәкил Елчин Садыгов билдириб ки, прокурорлуғун ҹинајәт ишинин башланмасындан имтина гәрары илә бағлы материаллар нә Меһман Һүсејновла мүдафиәчиләринә, нә дә мәһкәмәјә тәгдим олунуб. Вәкилләр бу сәбәбдән һәмин материалларын прокурорлугдан алынмасы һагда вәсатәт галдырыблар. Вәсатәт тәмин олунуб. Һаким Ајтән Әлијева прокурорлуғун рәдд материалларыны мәһкәмәјә тәгдим етмәсиндән өтрү мартын 28-дәк вахт вериб.
Меһман Һүсејновун өзүнүн дә гатылдығы мәһкәмәдә онун вәкилләри бир нечә башга вәсатәт дә галдырыблар. Мүдафиәчиләр әлавә шаһидләрин диндирилмәсини, Нәсими Рајон Полис Идарәсиндә олан видеокамераларын јаддашындакы ҝөрүнтүләрә бахыш тәшкил едилмәсини вә Меһман Һүсејновун тибби комиссијадан кечирилмәсини истәјибләр. Һаким бу вәсатәтләрә мүнасибәт билдирмәјиб. Мәһкәмә мартын 28-дә давам едәҹәк.
Гејд едәк ки, ҹари илин Јанварын 9-да ахшам блоггер Меһман Һүсејновун јоха чыхмасыјла бағлы сосиал медиада мәлумат јајылмыш вә бир ҝүн сонра - Нәсими Рајон Мәһкәмәсиндә һаким өнүнә чыхарыларкән, онун 22 сајлы полис бөлмәсиндә сахландығы мәлум олмушду.
Нәсими Рајон Мәһкәмәси блоггери полисин гануни әмринә табе олмамагда тәгсирли биләрәк, ону 200 манат ҹәримәләмишди. Меһман Һүсејнов мәһкәмәдән сонра она полисдә ишҝәнҹә верилдијини иддиа етмишди.
Бу ачыгламаны полисә бөһтан сајан Нәсими Рајон Полис Идарәсинин рәиси Муса Мусајев хүсуси иттиһам гајдасында мәһкәмәјә үз тутмушду.
Һәмин шикајәт әсасында Сураханы Рајон Мәһкәмәси мартын 3-дә блоггерә 2 ил һәбс ҹәзасы кәсмишди.
Диггәт: Хәбәрдән истифадә етдикдә мәнбәјә истинад лазымдыр
