Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Азәрбајҹан руһаниләри АРМ-ын үзвү, “Маиде.Аз” сајтынын баш редактору руһани Һаҹы Сәрдар Һаҹыһәсәнлинин һәбсиндән нараһатдыр
Өлкә руһаниләринин нараһатлығыны әкс етдирән бәјанаты тәгдим едирик:
Бисмиллаһир-Рәһманир-Рәһим!
Биз, ашағыда имза едәнләр, ҝөркәмли руһани, танынмыш илаһијјатчы Һаҹы Сәрдар Һаҹыһәсәнлинин һәбси илә бағлы дәрин нараһатлығымызы бәјан едирик.
Һаҹы Сәрдар Һаҹыһәсәнли (Һаҹы Сәрдар Бабајев) һөрмәтли руһани олмагла јанашы, ҝөзәл инсан вә нүмунәви вәтәндашдыр. Һаҹы Сәрдар Һаҹыһәсәнли өлкәнин ән дәјәрли, ән нүфузлу руһаниләриндәндир. Онун етигадлы, тәгвалы бир шәхсијјәт олмасы һәр кәсә бәллидир. Ејни заманда, Һаҹы Сәрдар тәмкинли, дәгиг мөвгели бир инсандыр. Белә бир инсанын ҹүмә намазы гылмасына ҝөрә һәбс етмәк – анлашылмаз вә ағласығмаз бир һалдыр.
Бөјүк тәссүф һисси илә бәјан едирик ки, Һаҹы Сәрдар Һаҹыһәсәнлинин руһанилијинә һөрмәт гојмајараг, ону истинтаг мүддәтиндә һәбс етдиләр. Һалбуки, о, һеч бир вәҹһлә истинтагдан јајынмамышдыр вә һәбс үчүн һеч бир әсас вермәмишдир.
Ганунларымыз инсанларын ҹәмлә ибадәт етмәк һүгугуну бирмәналы олараг тәсбит едир. Белә олан һалда, Һаҹы Сәрдар Һаҹыһәсәнлинин ҹамаатла намаз гылмасы кимләри нараһат едә биләрди ки? Һаҹы Сәрдар Һаҹыһәсәнли өз намазы илә һансы тәкфирчи–вәһһаби даирәләри нараһат етди ки, нәтиҹәдә белә анлашылмаз дурум јаранды?
Һаҹы Сәрдар Һаҹыһәсәнлини ҹүмә намазы гылмаға бөлҝәнин рәсми газиси дәвәт етдији һалда, Һаҹы Сәрдар һансы ганунлары позмушдур?
Өлкәмиздә “Ислам һәмрәјлији или” елан олунан бир заманда, Һаҹы Сәрдар Һаҹыһәсәнли кими бир Әһли-Бејт (ә) руһанисини һәбс етмәк, ҝөрәсән кимләрин планларына аиддир?
Бирмәналы олараг, әминик ки, Һаҹы Сәрдар Һаҹыһәсәнлинин һәбси - әсассыз вә сәһв аддымдыр. Ејни заманда, милли-мәнәви дәјәрләримизә гаршы бир һөрмәтсизликдир.
Әлагәдар органлара, Һаҹы Сәрдар Һаҹыһәсәнлини дәрһал азадлыға бурахмагла бағлы чағырыш едирик.
Диггәт: Хәбәрдән истифадә етдикдә мәнбәјә истинад лазымдыр
